Dual PanelDiona Ahas, datu Yehuda
1Iatonna taun ma’pessangpulo pitu kadatuanna Pekah, anakna Remalya, dadimi datu tu Ahas, anakna Yotam, umparenta to Yehuda.
2Iatu Ahas duangpulomo taunna, tonna dadi datu; ma’parentami sangpulo annan taunna dio Yerusalem. Tae’ napogau’ apa malolo dio pentiroNa PUANG, Kapenombanna, susi Daud, nene’ to dolona.
3Sangadinna unturu’ bate lalanna mintu’ datu to Israel. Sia api napamaindananni tu anakna susi penggauran megallianna mintu’ bangsa tu Naula’i PUANG dio mai tingayona to Israel.
4Sia mantunu sia memala’ dao inan madao, dao lu buntu sia diong lu garonto’ kayu maluna.
5Attu iato ke’de’mi tu Rezin, datu Aram, sola Pekah, anakna Remalya, datu Israel la lao urrarii Yerusalem, napatama limbui tu Ahas, apa tae’ nakullei patalo lan kasirarian.
6Attu iato iatu Elat, napasule Rezin, datu to Aram, lako to Aram, naula’i tu to Yehuda dio mai Elat; saemi tu to Edom lako Elat anna torro dio sae lako allo iate.
7Nasuami datu Ahas tu ba’tu pira-pira pesua male umpennoloi Tiglat-Pileser, datu to Asyur, kumua: Akumote tu taummi sia anakmi; la malekomi urrampanangkan dio mai kuasanna datu Aram sia dio mai kuasanna datu Israel tu ke’de’mo ullaoina’.
8Naalami Ahas tu bulaan sia salaka tu lan banuanNa PUANG sia lan mai bilik pangnannan tongkonan layuk, anna pa’peai butung pamengan lako datu Asyur.
9Napasituru’mi datu Asyur tu palakuanna Ahas, anna male tu datu Asyur urrarii tu kota Damsyik, nataloi, anna pali’i tu tau lan lako Kir, sia napatei tu Rezin.
10Malemi tu datu Ahas lako Damsyik umpessitammui Tiglat-Pileser, datu to Asyur. Iatonna tiromi tu inan pemalaran dio Damsyik, napa’peanni datu Ahas to minaa Uria tu pattana sia misa’ pandiri tu susi bang inan pemalaran iato.
11Napabendanmi to minaa Uria tu inan pemalaran iato. Susitu napepasanan datu Ahas dio mai Damsyik, susi dukamoto nagaragai to minaa Uria sae lako sulena tu datu Ahas dio mai Damsyik.
12Iatonna sulemo tu datu dio mai Damsyik, natiromi tu inan pemalaran iato, nareke’mi sia kendek langngan.
13Natunumi tu pemala’ ditunu pu’pu’ sia iatu kande dipemalaran, nabolloanni tu pemala’ pantedok sia napa’pi’pikan inan pemalaran tu rara pemala’ kasalamaranna.
14Iatu inan pemalaran tambaga, tu bendan dio oloNa PUANG, nasua umpalelei dio mai tingayo banuanNa PUANG, dio mai inan kasiallaranna inan pemalaran (ba’ru) na banua iato, anna padioi rampe rekkena inan pemalaran (ba’ru).
15Mesuami tu datu Ahas lako to minaa Uria, nakua: Dao te inan pemalaran kapua la minii untunui tu pemala’ ditunu pu’pu’ melambi’ sia pemala’ dikande makaroen, sia pemala’ ditunu pu’pu’na datu sia kande pemala’na, sia pemala’ ditunu pu’pu’na to buda sia kande pemala’na sia pemala’ pantedokna; sia iatu mintu’ rara pemala’ ditunu pu’pu’ sia rara pemala’ pangrere’ la mipa’pi’pikan inan pemalaran iato. Apa iatu inan pemalaran tambaga la kupa’paressampa.
16Napogau’ nasangmi to minaa Uria susitu mintu’ napepasanan datu Ahas.
17Nata’takkimi datu Ahas tu papan tangdan pembasean, naangka’i tu pembasean dao mai sia naangka’i duka tu tasik dao mai sapi tambaga, anna patorroi dao sali batu.
18Iatu tangdo’ allo katorroan dio banuanNa PUANG, tu nagaragai tau dio sa’de banua, susi duka tu lalan naola datu, ma’iringanna dio salian mesua umpalelei belanna datu Asyur.
19Iatu tang dipokadannapa tu mintu’ tuna’na Ahas, sia mintu’ tu apa napogau’, tang tisura’moraka lan sura’ ossoranna mintu’ datu Yehuda?
20Iatu Ahas tamamo batu dilobang dipasola nene’ to dolona, anna dipeliang dipasola nene’ to dolona, lan kotana Daud, anna Hizkia, anakna muane, ussondai dadi datu.