Dual PanelBunga’na pa’nubua’ diona kadilendokanna Yerusalem
1Iatonna rangimi datu Hizkia tu iannato, naserek-serekmi tu tamangkalena, anna ma’pakean karoro’, male tama banuanNa PUANG.
2Nasua dukami tu Elyakim, pangulu sandan uai, sia Sebna, pangulu to massura’, sia pangulunna mintu’ to minaa ma’pakean karoro’ anna male lako nabi Yesaya, anakna Amos.
3Ma’kadami tu tau iato mai lako, nakua: Inde sia tu kadanna Hizkia: Allo iate allo kapussakan sia ukungan sia kadibelleran, belanna la dadimo tu mai pia, apa tae’ tu kamatotoranna indo’na la kianak.
4Lala sia manii Naperangii PUANG Kapenombammi, tu mintu’ kadanna kamandang lompo, tu nasua puangna, datu Asyur umparampoangki’, kumua anna be’sei tu Puang Matua matontongan, anna ukkungi Puang tu belanna kada iato Narangimo PUANG, Kapenombammi; melo ke mipassambayanganni tu to torrona siapa, tu denna siapa.
5Pakalan rampomi tu to mase’ponna Hizkia lako Yesaya.
6Ma’kadami Yesaya lako tau iato mai nakua: Inde sia tu kada la miparampoan puangmi, kumua: Nakua kadanNa PUANG: Da mukataku’i tu mintu’ kada, mangka murangi, tu napokada to mase’ponna datu Asyur umpa’kada solangiNa’.
7Manassa Aku la umpabu’tui lan penaanna, naurunganni, ke urrangimi misa’ kareba, manassa la sule lako tondokna, sia la Kubambangan nakande pa’dang lan tondokna.
Ma’penduanna Sanherib unnaran datu Hizkia la ussorong Yerusalem
8Iatonna sulemo tu kamandang lompo narampoimi tu datu Asyur marassan sirari Libna, belanna denmo kareba narangi umpokadai, kumua ke’de’mo dio mai Lakhis.
9Apa narangi tu kadanna tau diona Tirhaka, datu Etiopia, kumua: tassu’mo sirari puangku, nasua pole’omi tu ba’tu pira-pira sumbungan puduk lako Hizkia, umparampoi te kada iate nakua:
10Inde sia tu kada la miparampoan Hizkia, datu to Yehuda, kumua: Da napakenakomi Kapenombammi, tu mirannuan, kumua: Iatu Yerusalem tae’ nala disorong tama kuasanna datu Asyur.
11Manassa kamu kalenamo urangii tu mintu’ apa napogau’ datu Asyur lako mintu’ tondok, umba nakua ummangsanni; umbao nakua ammi la dilendokan?
12Nakulleraka tu deatanna mintu’ bangsa, tu nasabu’i nene’ to doloku, ullendokanni tu tondok iato mai: iamotu Gozan sia Haran sia Rezef sia to umpa’tondokki Eden, lili’na Telasar?
13Umbamira tu datu Hamat sia datu Arpad, sia datu tondok Sefarwaim, sia Hena sia Iwa?
Passambayangna Hizkia
14Natarimami Hizkia tu sura’ iato dio mai sumbungan puduk iato, anna basai. Mangkato malemi tu Hizkia langngan banuanNa PUANG, anna balla’i tu sura’ iato dio oloNa PUANG.
15Anna massambayang dio oloNa PUANG, nakua: O PUANG, Kapenombanna to Israel, tu unnisung dao karubion! Kamu, Kamu manna tu Kapenomban, pekapuanganna mintu’ kadatuan dao kuli’na padang; Kamumo tu mangka ungkombong langi’ sola lino.
16O PUANG, tananni talinga, amMi ma’perangi, o PUANG, pamillikki tu matamMi, amMi tiroi sia perangii tu mintu’ kadanna Sanherib, tu mesua umparampoi, la umbe’se Puang Matua matontongan.
17O PUANG, tonganna iatu mai datu Asyur ussanggangimo mintu’ bangsa sia mintu’ tondokna.
18Na iatu rapang-rapang dipodeatanna napembuangan tama api, belanna tangia kapenomban, sangadinna panggaraga to lino bangsia, tu kayu sia batu digaraga, iamoto nakullei ussanggangi.
19Iamoto, o PUANG, Kapenombangki, lendokangkan dio mai kuasanna, anna issanni mintu’ kadatuan lan te lino, kumua Kamu mannari, o PUANG, tu Kapenomban.
Ma’penduanna pa’nubua’ diona kadilendokanna Yerusalem
20Attu iato mesuami Yesaya, anakna Amos, umpokadanni Hizkia, nakua: Inde sia tu kadanNa PUANG, Kapenombanna to Israel, kumua: Iatu passambayangmu lako Kaleku tu diona Sanherib, datu Asyur, Kurangimo.
21Inde sia tu kada Napokada PUANG diona datu iato, Nakua: Iatu simbolong manik, iamo anak dara Sion, untapa’ko sia untelle-telleko; iatu anak dara Yerusalem unniling-iling dio boko’mu.
22Mindara tu mube’se sia mupa’kada solangi, sia mindara mupekapuan gamarammu sia mupasolo’i matammu? Lako To Maserona to Israel!
23Tete dio sumbungan pudukmu ammu be’sei tu PUANG, sia ma’kada kumua: Kabudanna karetaku angku kendekki tu bottona buntu sae lako malangka’na Libanon; sia kulelleng tu mintu’ garonto’ arasi’ kalandona, sia mintu’ sendana mellongna, sia la rampona’ tama inan mandalanna sia tama pangala’ tamman makampunna.
24Mambo’bokna’ sia unniru’na’ uai dio lu padang senga’, sia mintu’ messarakna salu Nil lan Mesir kurangkean pala’ lentekku.
25Tae’ lenparaka murangii, kumua mintu’na te Kulampakmo tempon dio mai sia randuk dio mai tipamulanna inang Kubori’mo? Totemo Kuparampo randannamo: manassa la musanggang tu mintu’ kota ditambakuku anna daun lauan.
26Sia langga’mo tu mintu’ to umpa’tondokki sia magiang sia kasirisan; tau iato mai susito merriunna dio lu padang, susito lolo mangura, susi riu dao papa, susi gandung malayu tonna tae’pa nabulung.
27Apa Kutandai tu diona kao’korammu sia lu tama lu lanmu mai sia kapabali-balian masarrangmu lako Kaleku.
28Belanna kapabali-balian masarrangmu lako Kaleku sia kamatampoammu, tu rampomo tama pa’perangingKu, manassa Aku la umpalakoi kale’ke’Ku tu illongmu sia sanga’Ku tu sadangmu, angKu pasuleko lako tu lalan muola sae.
29Iamote tu tanda lako kalemu: Lan taun iate la mukande tu apa tuo kalena, na taun ma’penduan iatu apa tuo poleo, apa lan taun ma’pentallun la mangambo’komi ammi megandung sia untanan garonto’ anggoro’, ammi kandei tu buanna.
30Sia iatu bati’na Yehuda tu tilendokna sia tinampena la mennuaka’ pole diong sia membua dao.
31Belanna dio mai Yerusalem la nanii tassu’ male tisambo’-sambo’ tu apa tinampepa sia dao mai buntu Sion tu apa tilendok; kamakaritutuanNa PUANGna mintu’ ma’dandan maritik la umpadenni.
32Iamoto, inde sia tu kadanNa PUANG diona datu Asyur, Nakua: Inang tae’ nala tama kota iate, sia tae’ nala umpa’panan misa’ tinaran tama, sia tae’ nala umpabendan tambakuku la urraka’i.
33La sulemo lako tu lalan naola sae, apa tae’ nala tama kota iate, kadanNa PUANG.
34Sia la Kurinding pala’ te tondok iate, angKu lendokanni, belanna sangangKu sia belanna Daud, taungKu.
Diona kadilendokanna Yerusalem
35Iatonna bongi iato tassu’mi tu Malaeka’Na PUANG, Napateimi tu surodadunna to Asyur saratu’ karuapulona llima sa’bu. Iatonna millik tu tau melambi’, natiroi tu mintu’nato, batang rabuk mannamo.
36Sangtiangkarammi sule tu Sanherib, datu Asyur, anna torro dio Niniwe.
37Den pissan tonna menomba lan banuanna Nisrokh, tu napodeatanna, napateimi pa’dang anakna, disanga Adramelekh sia Sarezer, anna mallai lussu’ sola duai lako tondok Ararat, anna Esarhadon, anakna, ussondai dadi datu.