Dual PanelDiona datu Yosia umputtai kamenomban sala
1Attu iato mesuami tu datu urrampunni lako kalena tu mintu’ pekaamberanna Yehuda sia Yerusalem.
2Malemi tu datu lako banuanNa PUANG sola mintu’ muane to Yehuda sia mintu’ pa’tondokan Yerusalem sia mintu’ to minaa sia nabi sia mintu’ tau randuk dio mai to bitti’ sae lako to kapua. Nabasami dio pa’peranginna tau iato mai tu mintu’ kada lan sura’ basse, tu diapparan lan banuanNa PUANG.
3Bendanmi tu datu dio to’ lentong, anna tanan misa’ basse’ dio oloNa PUANG, kumua naturu’i tau tu PUANG sia lantuk penaanna sia deatanna ungkaritutui tu pepasanNa sia kasa’bianNa sia mintu’ tu aluk Napondok sia untoe manda’i tu mintu’ kada basse tu disura’ lan sura’ iate. Iatu mintu’ to buda tamamo basse iato.
4Mesuami tu datu lako tominaa kapua Hilkia sia mintu’ tominaa undampi’i sia mintu’ pa’kampa babangan, la umpatassu’i lan mai banua kabusunganNa PUANG tu mintu’ parea, tu digaragan Baal sia Asyera sia mintu’ ma’dandan maritik dao langi’; anna ballai tu mintu’nato dio saliananna kota Yerusalem dio rante salu Kidron, na iatu aunna nabaa lako Betel.
5Natassu’i duka datu tu mintu’ to minaa deata tu naangka’ mintu’ datu to Yehuda untunu pemala’ dao inan madao, lan lu mintu’ kota Yehuda sia lan lu lili’na Yerusalem, sia iatu mai to untunuan pemala’ Baal sia mata allo sia bulan sia ma’rupa-rupa bintoen sia mintu’ ma’dandan maritik dao langi’.
6Sia napatassu’ duka datu tu lentong kayu dipodeata lan mai banuanNa PUANG lako salianna Yerusalem, lako salu’-salu’ Kidron, sia natunu dio biring salu’-salu’ Kidron sia nanisak-nisak nadadi au, namane ussamboranni dio to’ lamunanna to kamban.
7Narondonnimi tu mintu’ inan to ma’gau’ sala dio to’ dipa’deatainna lan banuanNa PUANG, tu inan nanii baine biasa ma’tannun sampin dipakean Asyera.
8Nasuami tu mintu’ to minaa tassu’ lan mai mintu’ kota Yehuda sia naruttakki tu mintu’ inan madao tu nanii mintu’ to minaa untunu pemala’ randuk dio mai Geba sae lako Bersyeba. Sia narondonni tu mai inan madao tu dio lalan tama babanganna Yosua, pangulu kota, iamo dio rampe kairinna babangan kota, ke tamai tau.
9Apa iatu mintu’ to minaa inan madao tae’ nadieloran kendek langngan inan pemalaranNa PUANG dio Yerusalem, apa ma’din ungkande roti tang diragii dio lu mintu’ siulu’na.
10Sia naruttakki tu Tofet diong lombok Ben-Hinom, kumua anna moi misa’ tau tae’mo api napamaindananni tu anakna muane ba’tu anakna baine la napemalaran lako Molokh.
11Naputtai tu mintu’ darang tu napake ba’tu pira-pira datu Yehuda menomba lako mata allo, dio mai lalan tama banuanNa PUANG sikandappi’ bilikna Natan-Melekh, to mase’ponna datu lan banua bitti’; sia iatu kareta napake menomba lako mata allo naballa.
12Iatu mintu’ inan pemalaran dao papa, sikandappi’ bilik mengkadaoanna Ahas, tu nagaragai datu Yehuda, sia mintu’ tu inan pemalaran napabendan Manasye, tu lan da’dua tarampak banuanNa PUANG, narondon datu sia naangka’i inde to dio mai tu barra’-barra’na, anna buangi rokko salu’-salu’ Kidron.
13Sia iatu mintu’ inan madao dio rampe matallona Yerusalem sia rampe lo’na lu buntu Kasanggangan, tu nanii Salomo, datu Israel, umbangunnanni Astoret, apa megallianna to Sidon, sia Kamos, apa megallianna to Moab, sia Milkom, apa megi’giranna to Amon, ia dukato naruttakki datu.
14Sia natesse tu batu dipodeata sia nalelleng tu lentong kayu dipodeata sia naponnoi buku to mate tu mai inanna.
15Sia ia duka tu inan pemalaran dio Betel, – iamotu inan madao dinii memala’ tu napabendan Yerobeam, anakna Nebat, tu ussua to Israel umpogau’ kasalan –, narondonni, iamotu inan pemalaran sola inan madao. Iatu inan madao iato naballa, sia nanisak-nisak nadadi au sia naballa tu lentong kayu dipodeata.
16Iatonna messaile tu Yosia, anna tiroi tu lamunan inde to dao lu tanete, nasuami unnalai tu buku lan mai lamunan iato, anna ballai dao inan pemalaran sia naruttakki, susi kadanNa PUANG tu napokada taunNa Kapenomban, tu mangka umpa’peissananni te apa iate.
17Ma’kadami tu datu nakua: Batu lamunan apara te kutiro? Mebalimi tu pa’tondokan lako datu nakua: Iamoto tu lamunanna taunNa Puang Matua, tu sae dio mai Yehuda sia umpa’peissananni te apa urrampoi tu inan pemalaran dio Betel, tu mipogau’.
18Ma’kadami nakua: Da’ito namari’pi, da naden misa’ tau urrumbui tu bukunna. Iamoto napakari’pii tau tu bukunna sola tu bukunna nabi sae dio mai Samaria.
19Ia duka tu mintu’ inan kamenomban dao inan madao lan mintu’ kota Samaria, tu napabendan mintu’ datu Israel la umpa’dikki penaanNa PUANG, naputtai Yosia, sia napogau’ lako susitu mintu’ apa mangka napogau’ dio Betel.
20Sia napatei tu mintu’ to minaa inan madao, tu torro inde to dio, dao inan pemalaran sia naballa dao tu buku to mate. Mangkato sulemi tu datu lako Yerusalem.
21Mesuami tu datu lako mintu’ to buda, nakua: Pakarayanni PUANG, Kapenombammi, tu Pa’pasa, susitu disura’ lan sura’ basse iate.
22Belanna iate Pa’pasa susite inang tae’ lenpa dipakaraya randuk dio mai mintu’ to parengnge’, tu umparenta to Israel, sia tonna mintu’ allona datu Israel sia datu Yehuda.
23Apa iatonna taun ma’pessangpulo karua kadatuanna Yosia dipakarayami te Pa’pasa lako PUANG dio Yerusalem.
24Sia naputtai duka tu mintu’ to untambai bombo to mate sia to pakita-kita, sia mintu’ balo’ tau, sia rapang-rapang dipodeata sia mintu’ apa megallian, tu kanaan lan tondok Yehuda sia lan Yerusalem, anna dipamanda’ tu mintu’ apa disura’ lan sura’ iato, tu naapa’ to minaa Hilkia lan banuanNa PUANG.
25Dolona na iate datu iate tae’ tu misa’ datu ponno penaanna sia deatanna sia kamatotoranna mengkara’pa susito lako PUANG, unturu’ mintu’ sukaran alukna Musa; sia undinna na datu iate tae’mo bu’tu tu sangtende’na.
26Apa moi susito tae’ duka natibalik tu PUANG dio mai kare’dekan kapuaNa, tu dukku ma’lulu-lulu urrampoi Yehuda diona mintu’ pa’di’ penaa tu napa’dikanNi Manasye.
27Ma’kadami tu PUANG nakua: La Kusabu’i duka tu to Yehuda dio mai oloKu, susi to Israel mangka Kusabu’i; sia la Kuboko’i te kota iate, tu mangka Kupilei langsa’, iamotu Yerusalem, sia iatu banua, tu mangka Kunii ma’kada kumua: La nanii sangangKu dio.
28Iatu tang dipokadannapa tu mintu’ tuna’na Yosia, sia mintu’ apa napogau’, tang tisura’moraka lan sura’ ossoranna mintu’ datu Yehuda?
29Iatonna linona ke’de’mi tu Firaun Nekho, datu Mesir, lako salu Efrat la sirari datu Asyur. Malemi tu datu Yosia umpentammui la unneai; napateimi tu Yosia dio Megido, tonna tiroi.
30Napopa’karetami taunna tu batang rabukna dao misa’ kareta dio mai Megido, nabaai lako Yerusalem, napeliangi tama liangna. Naangka’mi pa’tondokan tu Yoahas, anakna Yosia; nabolloi minna’, natokkoi dadi datu ussonda ambe’na.
Diona Yoahas, datu Yehuda
31Iatu Yoahas duangpulomo ntallu taunna, tonna dadi datu, anna ma’parenta tallung bulan dio Yerusalem. Iatu indo’na disanga Hamutal, anakna Yeremia dio mai Libna.
32Napogau’mi tu apa kadake dio pentiroNa PUANG susitu mintu’ napogau’na nene’ to dolona.
33Napattangmi Firaun Nekho dio Ribla dio tondok Hamat, kumua damo nama’parenta dio Yerusalem, sia nadosa tu tondok iato saratu’ talenta salaka na misa’ talenta bulaan.
34Naangka’mi Firaun Nekho tu Elyakim, anakna Yosia, dadi datu ussonda Yosia, ambe’na, anna sondai tu sanganna, disangamo Yoyakim. Nasolammi tu Yoahas lako Mesir, anna mate dio.
Diona Yoyakim, datu Yehuda
35Nasorongmi Yoyakim tu salaka sia bulaan lako Firaun; anna durukki tu sima dio mai mintu’ pa’tondokan, anna sorongi tu doi’ iato susi parentana Firaun; natuntunmi dio mai pa’tondokan tu salaka sia bulaan sitinaya tassere’na simisa’-misa’ tau, anna benni Firaun Nekho.
36Iatu Yoyakim duangpulo llima taunna, tonna dadi datu, anna ma’parenta sangpulo misa taunna dio Yerusalem. Iatu indo’na Zebuda, anakna Pedaya dio mai Ruma.
37Napogau’mi tu apa kadake dio pentiroNa PUANG, susitu mintu’ napogau’na nene’ to dolona.