Dual PanelYoram ullaoi to Moab
1Iatu Yoram, anakna Ahab, dadi datu umparenta to Israel dio Samaria, tonna taun ma’pessangpulo karua kadatuanna Yosafat, datu to Yehuda anna ma’parenta sangpulo dua taunna.
2Napogau’mi tu apa kadake dio pentiroNa PUANG, apa tae’ nasusi ambe’na sia indo’na; naputtai ia tu batu Baal dipodeata tu nagaragai ambe’na.
3Moi nasusito la’ka’ duka lako kasalan, tu napesuan Yerobeam, anakna Nebat lako to Israel umpogau’i; tae’ naboko’i tu kasalan iato.
4Iatu Mesa, datu to Moab, umpatuo domba; napa’kasianammi lako datu to Israel tu anak domba saratu’ sa’bu sola bulu domba laki saratu’ sa’bu.
5Iatonna matemo tu Ahab, memboko’mi tu datu to Moab dio mai datu to Israel.
6Attu iato tassu’mi tu datu Yoram dio mai Samaria, nabilangi tu mintu’ to Israel.
7Mesuami lako Yosafat, datu to Yehuda, nakua: Iatu datu to Moab memboko’mo dio mai kaleku; morairokomika take’de’ sola urrarii? Mebalimi nakua: La malena’, umba-umba mipasusi susi dukana’ to, iatu bangsami susi dukato tu bangsaku na iatu mai darangmi susi dukato tu darangku.
8Mekutanami tu datu nakua: Lalan umbara tu la taola lako? Nabalimi nakua: Dio lalan padang pangallaran Edom.
9Susito ke’de’mi tu datu to Israel sola datu to Yehuda sia datu to Edom. Apa iatonna ma’pitung-allomo mengguliling tae’mi uai la nairu’ surodadu sia patteke’, tu unturu’i.
10Attu iato ma’kadami tu datu to Israel nakua: A’a, ma’apai Natambai PUANG te datu tallu la Nasorong tama limanna to Moab?
11Ma’kadami tu datu Yosafat nakua: Tae’raka nabinNa PUANG inde te, tu la tapotete mekutana lako PUANG? Mebalimi tu misa’tomase’ponna datu to Israel nakua: Inde siate tu Elisa, anakna Safat, tu umbolloi limanna Elia.
12Nakuami tu Yosafat: Dio kalena tu kadanNa PUANG. Malemi tu datu to Israel sia Yosafat sia datu to Edom lako.
13Apa ma’kada tu Elisa lako datu to Israel nakua: La siapariki’? Malemokomi lako tu mai nabinna ambe’mi sia lako tu mai nabinna indo’mi. Apa nakua tu datu to Israel lako: Da mima’kada susito, belanna Natambaimo PUANG tu datu tallu la Nasorong tama limanna to Moab.
14Ma’kadami tu Elisa nakua: La lelukraka tuoNa PUANG na mintu’ ma’dandan maritik, tu kupengkaolai, iake la tangiai Yosafat, datu to Yehuda, kudampang, manassa la kupasalaikomi penaa sia tae’ kusailekomi.
15Totemo suami mai tu misa’ pa’katapi. Iatonna umpannoni katapinna tu pa’katapi, narampoimi kamatotoranna limanNa PUANG tu Elisa.
16Anna ma’kada nakua: Inde sia tu kadanNa PUANG: La migaragai ba’tu pira-pira kalo’ diong te lombok.
17Belanna inde sia tu kadanNa PUANG Nakua: Tae’ mila ussa’ding angin sia tae’ mila untiro uran, apa moi susito iate lombok iate la ponno uai, miurunganni ma’din unniru’i la kamu la patuoammi la patteke’mi.
18Iate penggauran iate bitti’pa dio pentiroNa PUANG, iatu la ma’iringanna iamotu la ussorong Moab tama kuasammi.
19Miurunganni untaloi tu mintu’ kota ditambakuku, iamotu mintu’ kota pa’tonno’ sia la milelleng tu mintu’ kayu melo sia la milepe’ tu mintu’ kalimbuang sia mintu’ pa’lak melo la misanggang batu.
20Iatonna masiang siappa’ tu kapemalaran, pakalan denmi tu uai sae dio mai rampe Edom, naurungan nasitutu’i uai tu padang iato.
21Iatonna rangimi mintu’ to Moab, kumua iatu datu tallui saemo la urrarii, natambaimi tu mintu’ tau tu ma’dinnamo ma’takin sia ia duka tu matuannamo napada bendan tu tau iato mai dio lu lili’ tondokna.
22Iatonna masiang melambi’pa, tonna berre’mo tu allo unnarrangi tu uai, pakalan natiromi to Moab tu uai dio tingayona mararang susi rara.
23Nakuami tu tau iato mai: Rara te; manassa iatu mintu’ datu iato sirari sia sipateammo. Totemo, e to Moab malemokomi unnala pangrampa.
24Apa iatonna rampomo lako to’ tenda surodadu to Israel, bendanmi tu to Israel, anna taloi tu to Moab, naurungan mallai dio mai tingayona; naula’mi to Israel sia natalo tu to Moab.
25Iatu mintu’ kota nasanggang, sia mintu’ pa’lak melo pantan natombonni batu, naurunganni nasitutu’i, sia mintu’ kalimbuang nalepe’, sia mintu’ kayu melo nalelleng sae lako batu mannamo dio Kir-Hareset napatorro. Napatama limbumi to ma’kolak, anna kolakki batu tama.
26Iatonna tiromi datu to Moab tu diona rari kapua umpatui, naalami tu tau pitu ratu’, tu manarang ma’pa’dang, la messuang tarru’ lako datu Edom, apa tae’ nakullei.
27Naalami tu anak pa’bunga’na, tu la ussondai dadi datu, napemalaranni butung pemala’ ditunu pu’pu’ dao rinding tembo’ iato. Attu iato narampoimi misa’ kasengkean kapua tu to Israel, naurunganni tu tau iato mai tibalik dio mai kalena anna sule lako tondokna.