Dual PanelKapangeanna Seba
1Sirupangmi den dio tu misa’ to bulituk, disanga Seba, anakna Bikri, to Benyamin, umpannonimi napiri tanduk anna ma’kada nakua: Iatu kita tae’ tasangbilangan tu Daud, sia tae’ tasangmana’ tu anakna Isai; e to Israel pada sulemokomi lako tendami.
2Memboko’mi tu mintu’ to Israel dio mai Daud, anna unturu’ Seba, anakna Bikri, apa iatu mintu’ to Yehuda torro maruru’ unturu’ datunna randuk dio mai Yordan sae lako Yerusalem.
3Iatonna rampomo Daud tama tongkonan layukna dio Yerusalem, naalami datu tu baine sangpulo, iamotu gundi’na, tu nasua torro ungkampai tongkonan layuk, anna popa’kampai. Anna karitutui, apa tang nalombanmo datu. Torro misa bangmi tu tau iato susito baine balu sae lako matena.
4Ma’kadami datu lako Amasa, nakua: Tambai tu mintu’ to Yehuda anna sirampun; ianna ma’tallungallomo diomoko ren sule.
5Malemi tu Amasa urrampunni tu mintu’ to Yehuda, apa nalendu’i tu attu dipamanassa lako kalena.
6Nakuami Daud lako Abisai: Totemo iatu Seba, anakna Bikri, ma’din umpogau’ kadake lako kaleta mandu na iatu Absalom. Alami tu mintu’ taunna puangmu muula’i, da nalambi’i tu ba’tu pira-pira kota ditambakuku, nanii umpembuniangki’.
7Sunmi tu mintu’ surodadunna Yoab unturu’i sola to Kreti sia to Pleti sia mintu’ surodadu pa’tonno’. Tassu’mi tu tau iato mai lan mai Yerusalem la unnula’ Seba, anakna Bikri.
8Iatonna rampomo lako to’ batu kapua dio Gibeon, dolomo sae tu Amasa. Iatu Yoab ma’bayu kararran anna ma’beke’ takinan tu nanii pa’dang; iatu pa’dang sibanuapa natakin; iatonna male lako, tinonokmi natobang rokko padang.
9Nakuami Yoab lako Amasa: Malaga’-laga’ siarokoka, e siulu’ku? Natoemi lima kananna Yoab tu danggo’na Amasa, la naudung.
10Tae’mi nakatangkinni Amasa tu pa’dang dio limanna Yoab; natobokmi Yoab tu tambukna, anna tiampa’ tu tambukna rokko padang; tae’mo napenduanni natobok, belanna matemo; malemi to tu Yoab sola Abisai, adinna unnula’ Seba, anakna Bikri.
11Apa misa’i tu surodadunna Yoab torropa bendan dio, anna ma’kada nakua: Minda-minda umporai Yoab sia umperangii Daud, la naturu’ tu Yoab!
12Iatu Amasa sumpandan dio tangnga lalan umpendio’ rarana. Iatonna tiromi tau iato tu mintu’ tau torro bendan dio, nariu’mi tu Amasa dio mai lalan lako to’ padang, nasamboi sampin, belanna natiro tu mintu’ to lendu’ dio torro bendan.
13Iatonna mangkamo umpalelei dio mai lalan, mintu’ tu tau tarru’mo unturu’ Yoab la unnula’ Seba, anakna Bikri.
14Nalendu’imi tu mintu’ sukunna Israel sae lako Abel-Bet-Maakha sola tu mintu’ to Bikri, tu sirampunmo la unturu’i.
15Rampomi tu tau iato mai, natalimbung tamai tu Seba dio Abel-Bet-Maakha, napabendan tambakuku sitingoan kota iato; bendanmi sira’da’ rinding tembo’. Namintu’ tu to nasolan Yoab ungka’muk-ka’mukki tu rinding tembo’ la untuanni.
16Attu iato metambami misa’ baine kinaa lan mai kota, nakua: Perangii, perangii! Parampoi te lako Yoab; La mareke’ dio mai, angku sipa’kada.
17Nareke’mi anna ma’kada tu baine iato, nakua: Kamuraka Yoab? Mebalimi nakua: Akumora te. Nakuami tu baine iato: Perangii te kadanna taummi. Nakuami: Io kuperangiimo.
18Nakuami tu baine iato: Biasa tonna dolona iatu tau ma’kada susite, nakua: La lao dolo tu tau mekutana lako Abel, namane unturu’i.
19Iate kami te misa’ tondok marampa’ sia maruru’ dio lu to Israel; midakarammo lalan la ussanggangi tu misa’ indo’ tondok dio lu tondokna to Israel; ma’apai ammi la ussabu’i tu mana’Na PUANG?
20Mebalimi Yoab, nakua: Nadipatoyang-toyangmora dio mai kaleku la ussanggangi sia ussabu’i!
21Tae’ nasusito. Sangadinna misa’ to lu dao mai buntu Efraim, disanga Seba, anakna Bikri, mangka umbali-bali datu Daud; ia mannari la misorong, angku mane untampei te tondok. Nakuami tu baine iato lako Yoab: La kipellebaran lako kalemi tu ulunna dao mai te rinding tembo’ iate.
22Malemi tu baine iato, umpa’petimbangan meloi tu tanga’na tama to’ to buda; nata’takkimi tau tu ulunna Seba, anakna Bikri, napellebaranni lako Yoab. Napannonimi Yoab tu napiri tanduk, ke’de’mi tu tau iato mai sisarak-sarak untampe kota, pantan sule lako to’ inanna. Na iatu Yoab sulemo lako Yerusalem mennolo lako datu.
To naala parea Daud
23Iatu Yoab iamo kamandang lompona mintu’ surodadu to Israel, sia Benaya, anakna Yoyada, kamandangna to Kreti sia to Pleti.
24Iatu Adoram kapalana to umpasirundunan pa’diaman lompo, sia Yosafat, anakna Ahilud, pa’paelean.
25Sia Seya kapala to massura’; sia Zadok sola Abyatar to minaa sola duai.
26Sia Ira, iamoto Yair, rengke’ kalena Daud.