Dual PanelDaud mesua unnia’ mintu’ to naparenta
1Re’dek pole’omi ara’Na tu PUANG lako to Israel sia Nasarrang tu Daud la umpogau’i tu apa la naposanggang to Israel. Nakua: Maleko unnia’i tu to Israel sia to Yehuda.
2Ma’kadami tu Daud lako Yoab, pa’baraninna tu nasisolan, nakua: Maleko ullelei tu mintu’ suku Israel, randuk dio mai Dan sae lako Bersyeba, paressai sia ia’i tu mintu’ tau, angku issanni budanna tu tau.
3Nakuami Yoab lako datu: Na PUANG, Kapenombammimora, urrangnganni te tau iate pessaratu’ manglokkon na iatu dennamo, anna matannamora puangku datu untiroi, apa ma’apai nakamorai puangku datu tu apa susite?
4Apa patalo tu kadanna datu lako Yoab sia lako mintu’ kamandang surodadu; sunmi tu Yoab sia mintu’ kamandang surodadu iato unturu’ parentana datu la unnia’i tu to Israel.
5Ullambanmi Yordan tu tau iato mai anna ma’tenda dio Aroër, rampe lo’na lu kota, lan tangngana lombok Gad, sia dio Yaezer.
6Saemi tu tau iato mai lako Gilead sia lako padang Kadesh dio tondok to Het, natarru’ lako Dan, sia ma’lele-lele namane rampo lako Sidon.
7Rampomi tu tau iato mai lako bentengna Tirus sia lako kotana to Hewi sia to Kanaan, anna rampo lako padang rampe lo’na lu dio Bersyeba.
8Susimoto tu tau iato mai ullelei tu mintu’ tondok iato. Iatonna kaseramo bulanna nduangpulo allona, sulemi tu tau iato mai lako Yerusalem.
9Napennoloammi Yoab lako datu tu budanna to diia’: dio lu to Israel den karua ratu’na sa’bu tu surodadu ma’pa’dang na dio lu to Yehuda den limaratu sa’bu.
10Apa iatonna mangkamo unnia’i tu mintu’ pa’tondokan, ma’parondomi tu penaanna Daud, anna ma’kada tu Daud lako PUANG, nakua: Mandu tonganmo’ kasalan umpogau’i tu iannato; melo, o PUANG, pa’dei dikka’ tu kasalanna taumMi, belanna ma’gau’ to bagana’.
Belanna kasalan tu Daud Naukungi PUANG
11Iatonna melambi’ millikmi tu Daud: attu iato rampomi tu kadanNa PUANG lako nabi Gad, to patanda-tandanna Daud, nakua:
12Maleko, pokadanni Daud: Susite tu kadanNa PUANG: tallu te apa Kupapatuangko; pileimi sala umbanna misa’, angku parampoangko.
13Saemi Gad lako Daud umpokadanni tu kada iato, nakua: Umbannara miporai: ra’pak padangraka pitungtaun lan tondokmi, iaraka tu la mallaikomi naula’ ualimmi lan tallungbulan, ba’tu iaraka tu ropu tallungallo lan tondokmi? Totemo la mitangnga’ sia mitimbang melo, umbara tu pebali la kuparampoanni sule tu To ussuana’.
14Ma’kadami tu Daud lako Gad nakua: Lendu’mo pussakku; melomo ke tobang rokkoki’ limanna PUANG, belanna kapua tu kamamaseanNa, podo da angku tobang rokko limanna to lino.
15Iamoto Naparampomi PUANG tu ropu lako to Israel tempon melambi’ sae lako attu mangka Napamanassa. Matemi tu pa’tondokan randuk daa mai Dan sae sau’ Bersyeba pitungpulo sa’bu.
16Iatonna e’te’mi malaeka’ tu limanna langngan Yerusalem, la ussanggangi, Napenassannimi PUANG tu kamandasan iato. Nakuami lako malaeka’ tu umparampo kasanggangan dio lu pa’tondokan: Silasamo to! Riu’mi sule tu limammu. Attu iato, iatu malaeka’ bendan sikandappi’ panglulluranna Arauna, to Yebus.
17Iatonna tiromi Daud tu malaeka’ umparampo kasanggangan dio lu pa’tondokan, nakuami lako PUANG: Akumora te, akumo tu kasalan, sia akumo umpogau’i tu kakadakean. Apa iate mai domba, apara ia napogau’? Elo’namo Mipata’paina’ lima sola mintu’ rapungku.
Daud umpabendan inan pemalaran sikandappi’ Yerusalem
18Allo iato saemi tu Gad umpelambi’i Daud, nakua lako: Malekomi langngan ammi pabendananni PUANG tu misa’ inan pemalaran dao inan panglulluranna Arauna, to Yebus.
19Naturu’mi Daud tu kadanna Gad susitu Napepasanan PUANG, namale langngan.
20Mentiromi tu Arauna, natiroi tu datu sola mintu’ taunna sae umpellambi’i, tassu’mi tu Arauna umpenombai datu tukku sae rokko padang.
21Nakuami Arauna: Apara natungkanan puangku anna sae umpellambi’i taunna? Nakuami Daud: Iamotu la moraina’ unnalli te inan panglullurammu, la kunii umpabendanan misa’ inan pemalaran PUANG, denno upa’ anna soro’ te kasanggangan dio mai pa’tondokan.
22Nakuami Arauna lako Daud: Naala bangmi puangku, napemalaranni tu apa nasanga melo; indemo tu sapi la dipopemala’ ditunu pu’pu’ sola parea panglulluran sola parea sapi la ditutung.
23O datu, mintu’na te napennoloan nasang Arauna lako datu. Sia nakuapa Arauna lako datu: Na PUANG, Kapenombammimora unnala masekomi.
24Apa nakua tu datu lako Arauna: Tae’ nasusito, sangadinna inang la kualli dio mai kalemu sipatunna allinna, belanna tae’ kumorai umpemalaran pemala’ ditunu pu’pu’ lako PUANG, Kapenombangku, tu apa tang kualli. Naallimi Daud tu inan panglulluran sia sapinna limangpulo sikele’ salaka.
25Na inde to nanii Daud umpabendananni PUANG tu misa’ inan pemalaran, napemalaranni tu pemala’ ditunu pu’pu’ sia pemala’ kasalamaran. Natarimami PUANG tu passambayangna sia Nakamasei tu tondok anna dipatoyang tu kasanggangan dio mai to Israel.