Dual PanelDiona kadipateianna Ishboset
1Iatonna rangimi anakna muane Saul, kumua matemo tu Abner dio Hebron, langga’mi tu penaanna sia tigiangmo tu mintu’ to Israel.
2Iatu anakna muane Saul unnampui da’dua pangulu tuntunan surodadu, misa’ disanga Baana na misa’ disanga Rekhab, anakna dua Rimon, to Beerot, dio mai suku Benyamin. – Belanna ia duka tu tondok Beerot naala lili’na Benyamin.
3Iatu Beerot dolona mallai lako Gitaim, anna to sae dio sae lako allo iate.
4Iatu Yonatan, anakna Saul, den anakna misa’ pia muane, kupi’ dua tu lentekna. Limangtaunmo dadinna tonna sae kareba dio mai Yizreel tu diona Saul sia Yonatan; naangka’mi to mantaranakna anna mallai, apa belanna sasa-sasa mallai, tobangmi anna keppa. Disanga Mefiboset.
5Malemi sola duai anakna Rimon to Beerot, iamotu Rekhab sola Baana, anna tama tongkonan layukna Ishboset, tonna mapana’ allo; iatu anak arung mamma’ bangsia dao patindoanna tonna tangnga allo.
6Tarru’mi sola duai tama tangnga tongkonan layuk, naangga’-angga’i la unnala gandung, natobokki tu tambukna anak arung, namane lussu’ mallai tu Rekhab sola Baana, siulu’na.
7Malemi tama tongkonan layuk tonna mamma’ tu Ishboset dao patindoanna lan bilik nanii mamma’; napateimi tu anak arung, napoloi tu ulunna. Naalami tu ulunna anna lumingka situ’turan bongi unnolai tu Araba-Yordan iato.
8Nabaami tu ulunna Ishboset lako Daud dio Hebron anna ma’kada lako datu, nakua: Iamote tu ulunna Ishboset, anakna Saul, ualinna puangku, tu undaka’ lalan la umpateikomi, apa allo iate Nakamasei PUANG, tu puangku datu pepakkan lako Saul sia lako mintu’ tarrukna.
9Apa mebali tu Daud lako Rekhab sia Baana, siulu’na, anakna Rimon, to Beerot, nakua: La lelukraka tuoNa PUANG, tu mangka urrampananna’ dio mai mintu’ kamaparrisan,
10akkenna dolona dio Ziklag kutingkan sia kupatei tu to umbaa kareba lako kaleku, nakua: Matemo tu Saul, moi anna sanga kalena pebaa kareba melo, apa susite kuben tu saro pebaa karebanna.
11Ondong pissan totemo to bulituk mangkamo umpongko misa’ to malambu’ lan tongkonan layukna dao patindoanna, tang sipaturaka kutuntun tu pakkan rarana dio mai limammi sia kusabu’ikomi dao mai kuli’na padang?
12Mesuami tu Daud lako surodadunna umpatei sola duai, napoloi tu limanna sia lentekna, natoke’i sikandappi’ limbong dio Hebron, apa iatu ulunna Ishboset naala anna lamunni lan lamunanna Abner dio Hebron.