Dual PanelPalakunna Salomo la unnappa’ kakinaan
1Iatu Salomo anakna muane Daud, untoe manda’mo kaparentanna, belanna Narondong PUANG, Kapenombanna, sia Napatarompo’ tongan.
2Umpatassu’mi misa’ parenta tu Salomo lako mintu’ to Israel, iamotu lako mintu’ kamandang sangsa’bu surodadu sia saratu’ surodadu, lako mintu’ to ma’paolai salu sia lako arungna mintu’ to Israel, iamotu mintu’ pangulu rapu.
3Malemi tu Salomo sola mintu’ kombongan lako inan madao dinii memala’ dio Gibeon, belanna inde to nanii tu Tenda KasitammuanNa Puang Matua, tu nagaragai Musa, taunNa PUANG, lan padang pangallaran.
4Iatu pattinNa Puang Matua inang nabaamo Daud dio mai Kiryat-Yearim lako tu inan mangka naparandananni – belanna mangkamo naballaran Daud misa’ tenda lan Yerusalem,
5apa iatu inan pemalaran tambaga, tu mangka nagaragai Bezaleel, anakna Uri, anakna Hur, napatorro Daud dio tingayo kemaNa Puang. Malemi tu Salomo sola mintu’ kombongan umpalaku pa’timbangan lako PUANG.
6Memala’mi tu Salomo dao inan pemalaran tambaga dio oloNa PUANG, tu sanglili’ Tenda Kasitammuan; napemalaranni dao tu pemala’ ditunu pu’pu’ sangsa’bu.
7Iatonna bongimo ombo’mi tu Puang Matua lako Salomo sia ma’kada lako nakua: Palakui, apara tu la Kubenko?
8Ma’kadami tu Salomo lako Puang Matua, nakua: Mangkamo Mipakitan kamasokanan kapua tu Daud, ambe’ku, amMi angka’na’dadi datu ussondai.
9Totemo, o PUANG Kapenomban, la dadi tonganmo tu kadamMi lako ambe’ku Daud, belanna Miangka’mo’ datu umparenta misa’ bangsa makamban, susi barra’-barra’ dao kuli’na padang.
10Iamoto kamaseina’ tu kakinaan sia kapaissanan, angku ma’din lu tama lu lan mai dio pentirona bangsa iate, belanna mindara ma’din umparentai tu mintu’ taumMi pada budanna te?
11Ma’kadami tu Puang Matua lako Salomo Nakua: Belanna susite tu apa lan penaammu sia tae’ mupalaku kasugiran sia ianan sia kamala’biran sia sunga’na to ungkabiri’ko sia tae’ duka tu kamalamberan sunga’, sangadinna kakinaan sia kapaissanan mupalakuan kalemu la umparentai tu taungKu, tu Kunii unnangka’ko datu,
12iamoto iatu kakinaan sia kapaissanan la dikamaseangko; ondongpi la Kubenko kasugiran sia ianan sia kamala’biran, susitu tae’pa naampui mintu’ datu tu dolo na iko sia tae’ nala unnampui mintu’ datu undi na iko.
13Mangkato sulemi tu Salomo dio mai inan madao dio Gibeon, dio mai Tenda Kasitammuan, lako Yerusalem, anna parentai tu to Israel.
Kasugiranna Salomo
14Narampunmi Salomo tu ba’tu pira-pira kareta pakkanarang, naurunganni unnampui sangsa’bu a’pa’ratu’ tu kareta na sangpulo dua sa’bunna pakkanarang; napalanni lu ba’tu pira-pira kota inan kareta sia napadio sola datu dio Yerusalem.
15Belanna sara’na datu anna iatu salaka sia bulaan dio Yerusalem tarru’ buda susi batu sia iatu kayu arasi’ sangtinti kayu ara pangala’ tu buda tuo dio Padang Merrantena.
16Iatu dinii umpasaean darang Salomo lu dio mai Misraim sia dio mai Kewe; iatu to ma’balilinna datu unnalai tu darang iato mai dio mai Kewe susitu allian pasa’.
17Iatu misa’ kareta dio mai Misraim ke saei dibaluk, dilampak tu allinna annan ratu’ sikele’, anna misa’ darang saratu’ limangpulo sikele’; nabalili dukato ma’balilinna Salomo pira lako mintu’ datu to Het sia datu to Aram.