Dual Panel1Mangkato malemi tama batu dilobang tu Yosafat sola nene’ to dolona, anna dipeliang sola nene’ to dolona lan kotana Daud; anna Yoram, anakna muane, ussondai dadi datu.
Diona katangmekaalukanna Yoram ma’parenta
2Iatu adinna, anakna muane Yosafat, iamotu: Azaria, Yehiel, Zakharia, Azaryahu, Mikhael na Sefaca. Mintu’i te anakna muane nasang Yosafat, datu Israel.
3Nabenmi ambe’na ba’tu pira-pira pamengan tu tau iato mai, iamotu salaka, bulaan sia pareanan keangga’, sola kota ditambakuku lan Yehuda, apa iatu kadatuan naben Yoram, belanna iamo pa’bunga’na.
4Iatonna toemi Yoram tu kadatuanna ambe’na sia matoto’mo nasa’ding, napateimi pa’dang tu mintu’ adinna sia ia duka tu ba’tu pira-pira arungna to Israel.
5Iatu Yoram tallungpulo ndua taunna tonna dadi datu, nama’parenta karua taunna dio Yerusalem.
6Umpeolaimi gau’na mintu’ datu Israel, susi penggauranna to lan tongkonan layukna Ahab belanna umpobaine anakna Ahab sia umpogau’ apa kadake dio pentiroNa PUANG.
7Apa iatu PUANG tae’ namorai ussabu’i tu bati’na Daud tu diona basse Natanan sola Daud, belanna mangkamo Napokada, kumua la Nakamasei Puang misa’ palita sae lakona tu kalena sia mintu’ anakna.
8Iatonna linona memboko’mi tu to Edom, anna lendokan kalena dio mai kuasa Yehuda, naangka’i tu misa’ datu umparentai.
9Malemi tu Yoram sola mintu’ kamandangna sia mintu’ kareta, nake’de’ tonna bongi, anna taloi tu to Edom, tu umpatama limbui sola tu mai kamandang karetana.
10Moi susito memboko’ duka tu Edom, anna lendokan kalena dio mai kuasa Yehuda sae lako allo iate. Attu ia dukamoto namemboko’ duka tu Libna nalendokan kalena dio mai kuasanna, belanna naboko’imo tu PUANG, Kapenombanna nene’ to dolona.
11Sia nagaragai duka tu inan madao dao buntu Yehuda naada’i tu pa’tondokan Yerusalem lan la umpenombai deata sia napapusa tu to Yehuda.
12Attu iato saemi misa’ sura’ lako kalena dio mai nabi Elia, nakua: Inde sia tu kadanNa PUANG, Kapenombanna Daud, nene’ to dolomi: Belanna tae’ mituru’i tu bate lalanna Yosafat, ambe’mu, sia Asa, datu Yehuda,
13sangadinna unturu’ko bate lalanna tu mai datu Israel, sia unnada’i to Yehuda sia pa’tondokan Yerusalem umpenombai deata susito lan tongkonan layukna Ahab, ondongpi belanna mupatei duka tu mintu’ siulu’mu, tu musangamberan, tu mandu melo na ikos-
14manassa la Naparampoi PUANG kamandasan tu bangsamu sia mintu’ anakmu muane sia mintu’ bainemu, sia mintu’ iananmu;
15sia iko kalena la narua saki mandarra’, iamotu pa’di’ tambuk, naurunganni ba’tu sangapa undinnato la sun tu tambuk barrinni’mu napobua’ saki iato.
16Napatiakka’mi PUANG tu to Filistin sia to Arab, tu torro dio sa’dena to Kusyi la urrarii Yoram,
17naurunganni tu tau iato mai ke’de’ ullaoi Yehuda tarru’ tama, unnalai tu mintu’ ianan naappa’ lan tongkonan layuk, ondongpi nabaa nasang tu anakna muane sia mintu’ bainena, naurunganni tae’mo anakna muane torro sangadinna Yoahas, anak tampakna.
18Iatonna mangkamo tu mintu’ apa iate Naparampoimi PUANG misa’ saki tang dampi-dampian lan tambuk barinni’na.
19Sia iatonna ba’tu sangapa undinnato, iamo tonna agi-agi duang taunmo lendu’na, tassu’mi tu tambuk barinni’na, belanna saki iato, naurunganni mate, napobua’ saki metakuran iato. Apa tae’ napadukkuanni api bangsana susi dipogauran nene’ to dolona.
20Iatonna tallungpulomo ndua taunna, dadimi datu, anna ma’parenta dio Yerusalem karua taunna, matemi tang didikkanan. Napeliangmi tau lan kotana Daud, apa tae’ nalan liangna mintu’ datu.