Dual PanelAhazia napatei Yehu
1Attu iato natappumi pa’tondokan Yerusalem tu Ahazia, anak tampakna, ussondai dadi datu, belanna iatu mintu’ kakanna mangka napatei sangtuntunan to mangrampa sola to Arab tama inan surodadu. Susito dadimi datu tu Ahazia, anakna Yoram, datu Yehuda.
2Iatu Ahazia patangpulo ndua taunna tonna dadi datu, anna ma’parenta sangtaun dio Yerusalem. Iatu indo’na disanga Atalya, ampona Omri.
3Unturu’ duka bate lalanna bati’na Ahab belanna indo’na tu dadi to ma’pana’ta’na la umpogau’ penggauran kadake.
4Umpogau’mi apa kadake dio pentiroNa PUANG, susi penggauranna bati’na Ahab belanna tau iato mai tu to ma’pana’ta’na temponna mate tu ambe’na, naurunganni umposanggangi.
5Pa’pana’ta’na tau iato mai anna male sola Yoram, anakna Ahab, datu Israel, nasirari Hazael, datu Aram, sikandappi’ Ramot, lan lili’na Gilead. Apa nabangkei to Aram tu Yoram.
6Sulemi tu Yoram lako Yizreel la umpopedampi bangkena, tu basana dio Rama, tonna sirari Hazael, datu Aram. Saemi tu Ahazia, anakna Yoram datu Yehuda untollongi Yoram, anakna Ahab, dio Yizreel belanna masaki bangmo.
7Iatu Ahazia male untollongi Yoram, anna pobannangi kasangganganna tete dio panglampakNa Puang Matua, belanna tonna rampomo dio, tassu’mi sola Yoram la umpessitammui Yehu, anakna Nimsi, tu mangka Natokko PUANG, la ussabu’i mintu’ to lan banuanna Ahab.
8Iatonna parampo Yehu ukungan lako to lan banuanna Ahab, naappa’mi tu mintu’ pangulu Yehuda sia mintu’ anakna muane siulu’na Ahazia, iamotu to mase’ponna Ahazia, anna patei tu tau iato mai.
9Nadaka’mi Yehu tu Ahazia, Natingkanni tau, tonna membuni dio Samaria, anna baai lako Yehu, napatei; apa napeliang tau, belanna nakua: Anakna Yosafat, tu lantuk penaanna undaka’ PUANG. Iatu bati’na Ahazia moi misa’ tae’ tu ungkullei ma’parenta.
Penggauranna sia kadipateianna Atalya. Yoyada untokko Yoas dadi datu
10Iatonna issanmi Atalya, indo’na Ahazia, kumua mangkamo mate tu anakna, ke’de’mi anna patei nasangi tu mintu’ bati’na datu lan banuanna Yehuda.
11Apa naala Yosabat, anakna baine datu, tu Yoas, anakna muane Ahazia, nabaa bunii sola to mantaranakna dio mai mintu’ anakna muane datu tu dipongko, anna patamai bilik dinii manganna inan kamammaran. Susimoto tu Yosabat, anakna baine datu Yoram, bainena to minaa Yoyada – belanna anak daranna Ahazia – umbunianni Atalya, naurungan tae’ napatei.
12Torromi sola membuni annan taunna lan banuanNa Puang Matua, tonna Atalya ma’parenta lan tondok.