Dual PanelKamenomban lako deata naputtai Yosia
1Iatu Yosia karuamo taunna tonna dadi datu, anna ma’parenta tallungpulo mmisa taunna dio Yerusalem.
2Napogau’mi tu apa malolo dio pentiroNa PUANG sia naturu’ tu bate lalanna Daud, nene’ to dolona, sia tae’ nasepang lako kanan ba’tu lako kairi.
3Iatonna ma’karuamo taunna ma’parenta, tonna mangurapa, naparandukmi undaka’ Kapenombanna Daud, nene’ to dolona, na iatonna ma’sangpulo duamo taunna ma’parenta naparandukmi usseroi Yehuda sia Yerusalem dio mai mintu’ inan madao, sia lentong dipodeata sia iatu rapang-rapang dipodeata dipa’ sia rapang-rapang dipodeata dipati’no’.
4Natingayo datu tonna dirondonni tu mintu’ inan pemalaranna Baal; sia mintu’ inan pemalaran pantunuan dupa, tu daona lu nasanggang-sanggang sia iatu lentong dipodeata sia iatu rapang-rapang dipodeata dipa’ sia rapang-rapang dipodeata dipati’no’ natesse-tesse sia nanisak-nisak, nasamboranni tu aunna dao lu lamunanna mintu’ to mangka umpemala’i.
5Iatu bukunna mintu’ to minaanna natunu pu’pu’ dao inan pemalaranna. Susimoto nanii usseroi tu Yehuda sia Yerusalem.
6Sia lan lu mintu’ kota Manasye, Efraim na Simeon sae lako kota Naftali, tu daun lauan nasangmo tiku lao,
7narondonni nasang tu inan pemalaran sia iatu lentong dipodeata sia nanisak-nisak tu rapang-rapang dipodeata dipa’, sia iatu mintu’ inan pemalaran pantunuan dupa tu lan lu mintu’ tondok Israel, nasanggang-sanggang nasang. Mangkato sulemi tu datu lako Yerusalem.
8Iatonna ma’sangpulo karuamo taunna ma’parenta, tonna usseroi tondok sia Banua Kabusungan, nasuami tu Safan, anakna Azalya, sia Maaseya, tu pangulu kota sia Yoah, anakna Yoahas pa’paelean, la umpemeloi tu banuanNa PUANG, Kapenombanna.
9Saemi tu tau iato mai lako tominaa kapua Hilkia, ussorongi tu doi’, tu dibaa tama banuanNa Kapenomban, tu napasirampun to Lewi, iamotu to ma’kampa babangan dio mai Manasye sia dio mai Efraim, sia dio mai mintu’ to torropa dio lu Israel, sia dio mai mintu’ Yehuda sia Benyamin sia dio mai mintu’ pa’tondokan Yerusalem.
10Nasorongmi tu doi’ lako kapala tu diangka’ la umpasirundunan pa’diaman lan banuanNa PUANG, na tau iato mai umbenni mintu’ to untoe pengkarangan, tu mengkarang lan banuanNa PUANG la ungkassa’i sia la umpemeloi;
11nasorongi lako mintu’ to mengkarang sia mintu’ to manarang, kumua naallii tu batu dipa’ sia kayu la dipomanangnga banua, la dipannii rattiangna mintu’ bilik tu tang napoinaa mintu’ datu Yehuda.
12Tau iato mai maruru’ tongan untoe pengkaranganna, na iatu to ditappu la umpasirundunanni tu tau iato, iamotu Yahat sola Obaja, to Lewi, bati’na Merari sia Zakharia sola Mesulam, bati’na Kehat. Iatu mintu’ to Lewi manarang umpannoni ma’rupa-rupa oni-onian,
13iamo ungkapalai to mamulle sia umbandoro’i mintu’ to mengkarang dio lu ma’rupa-rupa pengkarangan. Iatu to Lewi ba’tu pira-pirai tu to massura’ sia bandoro’ sia to ma’kampa babangan.
14Iatonna alami tau tu mintu’ doi’ dibaa tama banuanNa PUANG, nakabu’tuimi tominaa Hilkia tu sura’ Sukaran alukNa PUANG, tu dipa’bengan tete dio Musa.
15Ma’kadami tu Hilkia lako Safan, pangulu to massura’, nakua lako: Kukabu’tuimo tu sura’ Sukaran aluk lan banuanNa PUANG. Nasorongmi Hilkia tu sura’ iato lako Safan,
16nabaami Safan tu sura’ iato lako datu. Sia naparampo lako datu tu diona mintu’ pengkarangan, anna ma’kada nakua: Iatu mintu’ apa mipasan lako taummi, nakarangmo.
17Nabolloammi tu mintu’ doi’ lan banuanNa PUANG, nasorongi lako to ungkapalai pa’diaman sia lako to mengkarang.
18Naparampomi Safan, pangulu to massura’, lako datu, nakua: Nabenna’ to minaa Hilkia misa’ sura’. Nabasami Safan ba’tu pira-pira kada lan mai sura’ iato lako datu.
19Iatonna rangimi datu tu mintu’ kada Sukaran aluk, naserek-serekmi tu tamangkalena.
20Mepasanmi tu datu lako to minaa Hilkia, sola Ahikam, anakna Safan, sia lako Abdon, anakna Mikha, sola Safan, pangulu to massura’ sia lako Asaya, to mase’ponna datu, nakua:
21Malekomi umpekutanan timbanganNa PUANG, anNa pamanassai lako kaleku sia lako tu mai mintu’ to torropa dio lu Israel sia Yehuda tu diona mintu’ kada lan te sura’ dikabu’tui, belanna mandu tu kare’dekanna ara’Na PUANG, tu Nabarrakan lako kaleta, belanna tae’ nakaritutui nene’ to dolota tu kadanNa PUANG sia tae’ napogau’i susitu disura’ lan sura’ iate.
22Malemi tu Hilkia sola tu mintu’ to nasua datu lako Hulda, nabi baine, bainena Salum, to ma’kampa pakean anakna Tokhat, anakna Hasra. Iatu Hulda torro dio Yerusalem lan kampung ba’ru. Naparampomi lako tu kada iato.
23Ma’kadami lako tau iato mai nakua: Inde sia tu kadanNa PUANG, Kapenombanna to Israel, kumua: Pokadanni tu to ussuakomi sae umpelambi’iNa’:
24Inde sia tu kadanNa PUANG, kumua: Manassa la Kuparampoi kamandasan te inan iate sia mintu’ to torro lan, iamotu mintu’ tampak ropu, tu disura’ lan sura’, tu mangka dibasan datu Yehuda,
25belanna naboko’iMo’ tau iato mai sia untunumo pemala’ lako kapenomban senga’, la umpa’dikki penaangKu napobua’ mintu’ panggaraga limanna. Bannang iamoto angKu barrakanni tu kare’dekan ara’Ku indete inan iate sia tang la dipa’deimo.
26Apa lako datu to Yehuda, tu ussuakomi umpekutanan timbanganNa PUANG, la mipokadan susite: Inde sia tu kadanNa PUANG, Kapenombanna to Israel. Iatu diona mintu’ kada mangka mirangis-
27belanna malamma’ tu penaammu sia umpamadiongangko kalemu dio oloNa Puang Matua, tommu rangimi tu kadanna diona te inan iate sia mintu’ to torro lan, ondongpi mupamadiongammo tu kalemu dio oloKu sia muserek-serekmo tu tamangkalemu, ammu tumangi’ dio oloKu, bannang iamoto angKu perangii dukamoko, kadanNa PUANG.
28Manassa la Kupasisolako nene’ to dolomu sia la dipatama marampa’ko liangmu, sia tae’ nala untiro lenni matammu tu mintu’ kasanggangan tu la Kuparampoanni te tondok iate sia mintu’ to torro lan. Naparampomi tau iato mai lako datu te pebali iate.
29Attu iato mesuami tu datu umpasirampunni lako kalena tu mintu’ pekaamberanna Yehuda sia Yerusalem.
30Malemi tu datu lako banuanNa PUANG sola mintu’ muane to Yehuda sia mintu’ pa’tondokan Yerusalem sia mintu’ to minaa sia to Lewi sia mintu’ to buda randuk dio mai to kapua sae lako to bitti’. Nabasami tu mintu’ kada lan sura’ basse, tu dikabu’tui lan banuanNa PUANG, anna rangi talinga ma’pampangna tau iato mai.
31Bendanmi tu datu dio inanna, anna tanan misa’ basse dio oloNa PUANG, kumua naturu’i tau tu PUANG sia lantuk penaanna sia deatanna ungkaritutui tu pepasanNa sia pa’pangada’Na sia iatu mintu’ apa Napondok sia unturu’i tu mintu’ kada basse tu disura’ lan sura’ iate.
32Nasua dukami tama basse iato tu mintu’ tau dio Yerusalem sia dio lu Benyamin, anna pogau’i to lan Yerusalem susi basseNa Puang Matua, iamotu Kapenombanna nene’ to dolona.
33Naputtai nasangmi Yosia tu mintu’ apa megallian dio lu mintu’ lili’na to Israel, napatundukki tu mintu’ to lan Israel la umpengkaolai PUANG, Kapenombanna. Lan mintu’ allo katuoanna datu, tae’ nasorong boko’ tu tau iato mai dio mai PUANG, Kapenombanna nene’ to dolona.