Dual PanelYosia umpakaraya Pa’pasa
1Undinnato napakarayammi Pa’pasa Yosia tu PUANG dio Yerusalem. Natunumi tau tu Pa’pasa tonna allo ma’pessangpulo a’pa’na bulan bunga’.
2Napatakoimi tu mintu’ to minaa dio lu pengkaranganna sia napatiakka’ tu tau iato mai lako kamenomban lan banuanNa PUANG.
3Ma’kadami lako mintu’ to Lewi, tu unnada’i mintu’ to Israel sia umpamasero kalena lako PUANG, nakua: Patorroi tu patti maindan lan Banua Kabusungan, tu nabangun Salomo, anakna Daud, datu Israel. Tae’omo mimanggi’ umbullei. Iamoto pengkaolai totemo tu PUANG, Kapenombammi, sia mintu’ taunNa, iamotu to Israel.
4Ammi rundunanni tu atorammi urrundu’ rapummi sia urundu’ golongammi susi pa’pana’ta’na Daud, datu Israel, sia pepasanna Salomo, anakna.
5La bendankomi lan lu inan maindan situru’ rapunna mintu’ siulu’mi, iamotu mai to buda: ke sangtandoanoi, iamotu sanggolonganoi rapunna to Lewi, sangtandoanoi rapunna to buda,
6tunumi tu Pa’pasa, ammi pamasero kalemi sia parandananni mintu’ siulu’mi sia pogau’i susitu kadanNa PUANG nalopian Musa.
7Napa’bengammi Yosia lako to buda tu mai domba sia bembe’ la napopemala’ Pa’pasa tu mintu’ to dio ren, den tallungpulo sa’bu, sia sapi tallungpulo sa’bu. Apanna nasang datu to.
8Umpa’bengan duka pamengan tu arungna datu lako to buda sia lako tu mai to minaa sia to Lewi. Iatu Hilkia na Zakharia sia Yehiel, pangulu banuanNa Puang Matua, sola tallui ussorongi lako mintu’ to minaa tu domba sola bembe’ duangsa’bu nnannanratu’ na sapi talluratu’, la dipopemala’ Pa’pasa.
9Na iatu Konanya sia siulu’na Semaya sola Netaneel sola Hasabya, Yeiel na Yozabad, pangulunna to Lewi, umpa’bengan domba sola bembe’ limangsa’bu na sapi limaratu’ lako to Lewi, la napopemala’ Pa’pasa.
10Attu iato dipasirundunammo tu pentoean: iatu mai to minaa bendanmo dio lu inanna, susi dukato tu to Lewi situru’ golonganna, unturu’ pepasanna datu.
11Natunumi tu Pa’pasa iato sia (iatu rarana) napa’pi’pikan to minaa, tu natadoanni to Lewi, naliu’ nasang to Lewi tu patuoan dipemalaran.
12Napasenga’mi tu pemala’ ditunu pu’pu’, la disorong lako mintu’ rapunna to buda, ke sisangtandoanoi, la dipopemala’ lako PUANG, susitu apa tisura’ lan sura’na Musa; napasusi dukato tu mai sapi.
13Natollo’mi tu Pa’pasa iato napadukkui api susitu atoranna siamo; iatu diira’-ira’na tu dipamaindan ditollo’ lan kurin, pamuntu sola panti, anna tikarai umbanni mintu’ to buda.
14Mangkato naparandanan pole’mi kalena sia mintu’ to minaa, belanna iatu mai to minaa, bati’na Harun, umpennoloan pemala’ ditunu pu’pu’ sia lompona sae lako bonginna. Iamoto tu naparandanan kalena to Lewi, sia mintu’ to minaa, iamotu bati’na Harun.
15Iatu mintu’ to menani, bati’na Asaf, bendan dio to’ inanna situru’ pepasanna Daud, Asaf, Heman na Yedutun, to patanda-tandanna datu, susi duka tu mintu’ to ma’kampa babangan dio lu simisa’-misa’ babangan. Tae’ namanggi’ ussalai pentoeanna, belanna siulu’na, to Lewi, umparandananni tu tau iato mai.
16Susimoto tu mintu’ kamenomban lako PUANG dipasirundunan melo lan allo iato la umpakaraya Pa’pasa sia la umpemalaran pemala’ ditunu pu’pu’, dao inan pemalaranNa PUANG, situru’ pepasanna datu Yosia.
17Attu iato napakarayami mintu’ to Israel, dio ren tu Pa’pasa sia pa’gauran roti tang diragii lan pitung allo.
18Randuk dio mai linona nabi Samuel tae’pa nadipakaraya len tu Pa’pasa susite lan Israel; sia moi misa’ datu to Israel; tae’ bang umpakaraya Pa’pasa susitu napakaraya Yosia sola tu mai to minaa sia to Lewi sia mintu’ to Yehuda sia to Israel dio ren sola pa’tondokan Yerusalem.
19Iatonna taun ma’pessangpulo karuamo kadatuanna Yosia dipakarayami te Pa’pasa iate.
Kamateanna Yosia
20Iatonna upu’ nasangmo napemeloi Yosia tu Banua Kabusungan, ke’de’mi tu Nekho, datu Mesir, la parari dio Karkemis, tu dio biring salu Efrat; malemi tu Yosia umpentammui la ullaoi.
21Napake’de’mi tu sumbungan puduk lako kalena, nakua: La siapariki’, e datu Yehuda? Allo iate tangia kamu, tu kulaoi, sangadinna iari tu tongkonan, tu kusirarian, anna mangkamo ma’kada tu Puang Matua lako kaleku, Nakua: madomi’ko. Iamoto toreimi unnea Puang Matua, tu urrondongna’, da Nasanggangkomi.
22Apa iatu Yosia tae’ namemboko’ dio mai, sangadinna umbaliliora kalena la urrarii; tang naperangiimo tu kadanna Nekho, tu ombo’ dio pudukNa Puang Matua sangadinna randukmo parari dio rante Megido.
23Naparuaimi to ma’pana tu datu Yosia; ma’kadami tu datu lako taunna nakua: Solanna’ tassu’, belanna mandalanmo tu basaku.
24Naangkarammi taunna lan mai karetana, napalelei dao kareta senga’, tu kareta ma’penduanna, nabaai lako Yerusalem. Ka’tumi angin dipudukna tu datu, anna dipeliang lan liangna nene’ to dolona, sia mintu’ to Yehuda sia to lan Yerusalem umpassanda bolonganni tu Yosia.
25Natonorammi Yeremia misa’ bating tu Yosia sia mintu’ to menani muane sia baine unggente’ sanganna Yosia lan mintu’ kadong batingna landa’ lako allo iate, belanna tipondok ada’mo lan Israel. Manassa mintu’nato tisura’mo lan Sura’ Sarro.
26Iatu tang dipokadannapa tu mintu’ tuna’na Yosia, sia mintu’ penggauran matinuru’na situru’ tu apa tisura’ lan Sukaran alukNa PUANG,
27na iatu mintu’ tuna’na, la dolona la undinna, manassa tisura’mo lan Sura’ diona mintu’ datu Israel sia Yehuda.