Dual PanelDiona ma’rupa-rupa pa’pabendanna Salomo sia umboronganni pengkarangan kamenomban
1Iatonna ganna’mo duangpulo taunna, malisanmi nabangun Salomo tu banuanNa PUANG sola tu banuanna.
2Napematoto’imi Salomo tu kota nabenni Huram, anna suai tu to Israel umpa’tondokki.
3Malemi tu Salomo lako Hamat-Zoba, anna taloi.
4Mangkato napematoto’imi tu Tadmor lan padang pangallaran sia mintu’ kota pa’palumpunan kande, tu mangka nabangun dio Hamat.
5Napematoto’imi tu Bet-Horon Daona lu sia Bet-Horon Diongna lu, iamotu kota ditambakuku, dibenteng tembo’ sia disalliranni tu babanganna.
6Napematoto’imi tu Baalat sia mintu’ kota pa’palumpunan kande tu naampui Salomo, sia mintu’ kota nanii kareta sia mintu’ kota nanii pakkanarang sia mintu’ tu apa nasanga la nabangun Salomo lan Yerusalem sia dao Libanon sia mintu’ lili’ parentana.
7Iatu mintu’ to torrona siapa, iamotu to Het, to Amori, to Feris, to Hewi, sia to Yebus, tu tangia bati’ to Israes-
8iamotu mintu’ bati’na tu torrona siapa undinna lan tondok iato, tu tang nasabu’i to Israel, naarak Salomo napopa’diama lompoi sae lako allo iate.
9Apa iatu to Israel moi misa’ tae’ napopa’diama lompo Salomo, sangadinna napotoparari, sia napopangulu mintu’ to lalongna, sia napopangulu pa’karetana sia pakkanarangna.
10Inde sia tu to diala parea ma’iringanna dio datu Salomo: duaratu’ limangpulo tu umparenta to buda.
11Nasolammi Salomo sun lan mai tondokna Daud tu lai’na Firaun lako tu banua mangka nabangunanni, belanna nakua: Moi misa’ baineku tae’ nama’din torro lan banuanna Daud, datu to Israel, belanna iatu mintu’ inan, tu nanii rampo pattinNa PUANG, maindan nasang.
12Attu iato napemalarammi Salomo lako PUANG tu pemala’ ditunu pu’pu’ dao inan pemalaranNa PUANG, tu napabendan dio tingo sarambi,
13iamotu apa dipamanassa la dipemalaran keallo situru’ pepasanna Musa sia lan mintu’ allo katorroan sia dio mintu’ sombona bulan sia dio mintu’ attu pa’gauran dipamanassa pentallun lan sangtaun, iamotu: pa’gauran roti tang dirangii sia pa’gauran minggu, sia pa’gauran pekalumban.
14Napamanassami unturu’ atoranna Daud, ambe’na, tu pengkarangan dipaborongan to minaa sia pentoeanna to Lewi la umpopenani pa’pudi-pudian sia ma’kamaya untundui to minaa, susi dipamanassa kiallo-kiallo; susi dukato tu pentoeanna to ma’kampa babangan urrundunan golonganna, ke misa’o babangan, belanna susimoto tu pepasanna Daud, taunNa Puang matua.
15Tae’ nalendai tau tu pepasanna datu tu diona mintu’ to minaa sia to Lewi lan mintu’ apa, susi dukato tu mintu’na kadipopa’rundunanna ianan.
16Iatu mintu’ pengkaranganna Salomo malisan nasangmo, randuk dio mai allo diparandanganninna tu banuanNa PUANG sae lako upu’na. Susimoto tu kasundunanna banuanNa PUANG.
Diona kapassombaranna Salomo
17Attu iato malemi tu Salomo lako Ezion-Geber sia lako Elot, tu dio biring tasik, lan tondok Edom.
18Nasuami Huram tu taunna umbaa kappala’ sia ba’tu pira-pira pa’lopi lako Salomo; massombarammi tu tau iato mai sola taunna Salomo lako Ofir, anna alai inde to dio mai tu bulaan a’pa’ratu’ limangpulo talenta, nabaai lako datu Salomo.