Dual PanelBungkaran kada
1Inde sia tu kadanna Amos, misa’i tu to umpatuo domba dio mai Tekoa, tu natiro diona to Israel tonna linona Uzia, datu Yehuda sia tonna linona Yerobeam, anakna Yoas, datu Israel, duang taun dolona, namane lino’.
Pa’nubua’ diona ukungan la urrampaoi tu mai to sibala lembang Israel sia la urrampoi duka Israel
2Inde sia tu kadanna, nakua: Iatu PUANG umburrung lan mai Sion sia umpa’perangian gamaranNa lan mai Yerusalem, naurunganni mario-rio tu padang kariuanna to mangkambi’ sia marangke tu botto Karmel.
3Inde sia tu kadanNa PUANG Nakua: Belanna tallu tu kapatodo-tintinganna Damsyik, ondongpi belanna a’pa’, iamoto natae’ Kula undampai to. Belanna mangka napalullu’i panglulluran bassi tu Gilead,
4iamoto angKu la umpasae api tama banuanna Hazael naurungan unnimbakanni tu mintu’ bentengna Benhadad.
5La Kule’to tu salli’na Damsyik sia la Kusabu’i tu pa’tondokan lan mai Bikeat-Awen sia iatu to untoe tekken kapayungan lan mai Bed-Eden, sia iatu pa’tondokanna Aram la dipali’ lako Kir, – kadanNa PUANG.
6Inde sia tu kadanNa PUANG Nakua: Belanna tallu tu kapatodo-tintinganna Gaza, ondongpi belanna a’pa’, iamoto natae’ Kula undampai to. Belanna mangkamo narampa tu mintu’ pa’tondokan anna sorongi lako Edom,
7iamoto angKu la umpasae api tama rinding tembo’na Gaza, naurungan unnimbakanni tu mintu’ bentengna.
8Sia la Kusabu’i tu pa’tondokan lan mai Asdod sia iatu tekken kapayungan lan mai Askelon, sia la Kubalik tu limangKu unta’pai Ekron, naurungan iatu mintu’ to Filistin tinampepa la sanggang, kadanNa Puangta PUANG.
9Inde sia tu kadanNa PUANG, Nakua: Belanna tallu tu kapatodo-tintinganna Tirus, ondongpi belanna a’pa’, iamoto natae’ Kula undampai to. Belanna mangkamo nasorong tu mintu’ pa’tondokan lako Edom sia tae’ nakilalai tu basse kasiuluran,
10iamoto angKu la umpasae api tama rinding tembo’na Tirus, naurungan unnimbakanni tu mintu’ bentengna.
11Inde sia tu kadanNa PUANG, Nakua: Belanna tallu tu kapatodo-tintinganna Edom, ondongpi belanna a’pa’, iamoto natae’ Kula undampai to. Belanna naula’imo pa’dang lao tu siulu’na sia napa’deimo tu kamamaseanna, sia tete dio kasengkeanna, anna ma’kase’bu-se’bu bang sia unnanna bang kare’dekan ara’na,
12iamoto angKu la umpasae api tama Téman, naurungan unnimbakanni tu mintu’ bentengna Bozra.
13Inde sia tu kadanNa PUANG Nakua: Belanna tallu tu kapatodo-tintinganna to Amon, ondongpi belanna a’pa’, iamoto natae’ Kula undampai to. Belanna naballak tu baine ma’tambukna to Gilead, la umpakalua’ lili’na,
14iamoto angKu la umpadukkui api tu lanna lu rinding tembo’na Raba, naurungan unnimbakanni tu bentengna, naturu’ arrak ke attu kasirarian, sia ongngo’ angin bara’, ke attu talimpuru’;
15sia iatu datunna tau iato mai la male dipali’, la ia la iatu mintu’ arungna, – kadanNa PUANG.