Alkitab Mobile SABDA
[VER] : [TORAJA]     [PL]  [PB] 
 <<  Amos 6 >> 

Karapasan tae’ gai’na

1Upu’ allona tu to tang matangkin dao Sion sia ussa’ding kalena marampa’ dao buntu Samaria, to la’bi’na bangsa ditonno’ dio lu mintu’ bangsa, tu nanii to Israel rampo mengkanorong.

2Malekomi lako Kalne, ammi tiroi, sia ammi ke’de’ inde to dio mai lako Hamat kapua, ammi solo’ rokko Gat, lili’na to Filistin. Mandu meloraka to na iate kadatuan iate, mandu kalua’raka tu lili’na na iatu lili’mi?

3E kamu, tu ussangai mambelapa tu allo kamandasan, sia umpamareke’ kadera pa’pakario-rio.

4E kamu, tu matindo dao inan katindoan gading, sia melundan-lundan dao bale-balemi, sia ungkande anak domba dio mai tuntunan domba sia anak sapi lan mai lantang sapi.

5Tu unnarrak-arrak unturu’ oni dandi sia ma’tangnga’-tangnga’ unggaragai oni-onian, susi Daud.

6Tu unniru’ uai anggoro’ lan mai balubu sia umperruda’ minna’ tu mandu melo, apa tae’ mipalan penaai tu karo’pokanna Yusuf!

7Iamoto totemo la male dipali’ tu tau iato mai dio tingayona mintu’ to dipali’, sia la upu’ tu arrakna to kasode-sode.

8Iatu Puangta PUANG mangkamo umposumpa Kalena, KadanNa PUANG, Kapenombanna mintu’ ma’dandan maritik, Nakua: Kukagallimo tu kamatampoanna Yakub sia Kukabiri’mo tu tongkonan layukna; ondongpi la Kusa’biangan tu kota iato sola mintu’ apa lan.

9Attu iato, iake den sangpulo muane torro lan misa’ banua, – la mate.

10Iake naangka’i pa’amberanna, ba’tu iatu to untunui, la umpatassu’i tu bukunna lan mai banua iato, la ma’kada lako tu to dio boko’ banua lanna lu, kumua: Denparaka tau iti’ misolan? Mebalimi nakua: Tae’mo! Ma’kadami nakua: Kappakomi! Belanna tae’ tasipatu ussa’bu’ sanganNa PUANG diona te.

Ukungan la urrampoi to kapua sia to bitti’

11Belanna manassa PUANG umpasun parenta – anna dipopendaun lauan tu banua kapua sia diro’pok tu banua bitti’.

12Ma’dinraka tu mai darang ma’dondo dao lu buntu batu ba’tu ma’dinraka tu tasik natengko tau sapi? Apa kamu umpopembali rasunni tu salunna sia umpopembali apsantinni tu kamalamburan?

13E kamu, tu umposende Lodabar, tu ma’kada kumua: Tang kamatotorantaraka anta taloi tu Karnaim?

14Belanna tonganna la Kupake’de’ ullaoikomi, e bati’ Israel, kadanNa PUANG, Kapenombanna mintu’ ma’dandan maritik, tu misa’ bangsa, la umpandasakomi randuk dio mai lalan lako Hamat sae lako salu’-salu’ Araba.


  Share Facebook  |  Share Twitter

 <<  Amos 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran