Dual Panel1Iatu pebali malamma’ ussa’po kasengkean ma’lana-lana, apa iatu kada mapalla umpatiludak ara’na tau.
2Iatu lila to kinaa, umpaombo’ kapaissanan den gai’na, apa iatu pudukna to baga umbarrakan kabagan.
3Iatu matanna PUANG umpemaranga mintu’ inan, sia umpemaranga mintu’ to kadake sia tomelo.
4Iatu lila kaboro’ iamo garonto’na katuoan marendeng, apa iatu kada leko’ iamo ussanggang penaa.
5Iatu tobaga tang undampang peada’na ambe’na, apa minda-minda umpalan penaa peta’tan, iamo unnampui tangnga’ melo.
6Lan banuanna to malambu’ nanii ianan keangga’, apa iatu daka’na to tang mekaaluk pasanggangan.
7Iatu pudukna tokinaa umpatale’ kapaissanan, apa iatu penaanna tobaga tang malolo.
8Iatu pemala’na to tang mekaaluk Nakagalli PUANG, apa iatu passambayangna to bulo lollong naala penaanNa Puang.
9Iatu lalanna to tang mekaaluk Nakagalli PUANG, apa minda-minda tu unnula’ kamaloloan, Nakasokanni Puang.
10Iatu peada’ makarra’ urrampoi tu to untampe lalan malolo, sia minda-minda tu ungkabiri’ peta’tan la mate.
11Iatu lino tomate sia inan kasanggangan payan dio oloNa PUANG, ondong pole’ tu penaanna ma’rupa tau!
12Iatu to patelle-telle tae’ namorai, ke nata’tanni tau; tae’ nalao sola to kinaa.
13Iatu penaa parannu umpasombo kasendean dio lindona tau, apa diona pa’di’ inaa anna bonnong tu penaanna.
14Iatu penaanna to unnampui tangnga’ kinaa, undaka’ kapaissanan, apa iatu puduk tobaga umparri-parri kabagan.
15Mintu’ allona to makario-rio nasitutu’i kamasussan, apa iatu allona to parannu-rannu tontong bang nanii pa’maruasan.
16Mandu melo tu ianan sidi’ ke situangi kamatakuran lako PUANG, na iatu ianan buda, ke situangi kamagiangan.
17Moi nautan manna dikande, ke situangi kasipakaborosan, mandu melo na iatu sapi malompo ke situangi kasikabirisan.
18Iatu to madomi’ mapalla umpabu’tu kasigagan, apa iatu to kalando pesuka’ umparapa’ kasiboboran.
19Iatu lalanna to tukkunan susito rompo duri, apa iatu lalanna to bulo lollong marante bang.
20Misa’ pia muane kinaa umpaparannu ambe’na, apa iatu tobaga umpamatuna indo’na.
21Iatu kabagan napoparannu to tang unnampui tangnga’ kinaa, apa iatu to unnampui tangnga’ kinaa unnola lalan malolo.
22Iatu lalan pa’inaanta tae’ nadadi, ke tae’i nadisitimbangi, apa iatu lalan pa’inaanta dadi, ke budai tau ussitimbangi.
23Iatu misa’ tau napoparannu, ke sipatunna napebalian, sia mandu melo tu sangbuku kada, ke attunna dipokada!
24Iatu lalan katuoanna to unnampui tangnga’ kinaa ma’palulangngan, anna toyang diong mai lino to mate.
25Iatu banuanna to matampo la Narondon PUANG, apa Napabantang tu katonan padangna to balu.
26Iatu pa’inaanna to kadake Nakagalli PUANG, apa masero tu kada kaboro’.
27Minda-minda umbarakki saro bu’tu kadake, iamo ussanggangi banuanna; apa minda-minda ungkagi’gi’ pamengan iato, la tuo marendeng.
28Iatu penaanna to malambu’ natimbang dolo tu apa la napebalian, apa iatu puduk to tang mekaaluk umbarrakan manna kakadakean.
29Toyang tu PUANG dio mai to tang mekaaluk, apa iatu passambayangna to malambu’ Naperangii.
30Iatu mata dukku-dukku mekasokanni, umpakarannu penaanna tau; sia iatu kareba melo umpamatoto’ tu buku lampa.
31Minda-minda untananni talinga tu peta’tan ma’pakarimman, la torro dio lu to kinaa.
32Minda-minda untumpu peada’, iamo umpamatuna katuoanna; apa minda-minda umperangii peta’tan, unnappa’ tangnga’ kinaa.
33Kamatakuran lako PUANG iamo pangadaran mebaa lako undoloan kadipangkeran.