Alkitab Mobile SABDA
[VER] : [TORAJA]     [PL]  [PB] 
 <<  Amsal 20 >> 

1Iatu anggoro’ sangtinti to patelle-telle sia iatu melangona ke diiru’i mongngo’ bang, minda-minda unturusanni tae’ nakinaa.

2Iatu pa’garrakna datu susito burrungna singa mangura, minda-minda untengkai, tang ungkatirinnai katuoanna.

3Iamo napomala’bi’ misa’ tau, ke toyangi dio mai kasigagan, apa minda-minda tu baga ta’pa re’dek bang ara’na.

4Iake attu lakoan padang iatu to tukkunan noka ia lao ma’tengko, iamoto ianna undaka’ bura padang, ke attu pegandungan, tae’ apa nakabu’tui.

5Iatu tanan penaanna tau lan ba’tengna susito uai mandalan, apa iatu to unnampui tangnga’ kinaa, manarang duka umpatassu’i diong mai malikunna.

6Buda tu tau umpudi kalena kamasokananna, apa iatu to matappa’, mindara ma’din ullambi’i?

7Iatu to malambu’ ma’gau’ malolo la maupa’ tu mintu’ anakna undinna.

8Misa’ datu tu unnisung dao kadera pa’paolaian salu, matanna bangsia umpasilaenanni tu kadake na melo.

9Mindara ma’din ma’kada, kumua: Mangkamo kukampai tu penaangku anna masero, sia maseromo’ dio mai kasalan?

10Duang rupa tu batu timbangan sia duang rupa tu sukaran, iatu apa iato Nakagalli dua PUANG.

11Moi anna pia muanepa, apa penggauranna umpamanassai, kumua masero sia maloloraka tu kedona.

12Iatu talinga parangi sia iatu mata patiro; mangka duamo Natampa PUANG.

13Da mubudananni tu mamma’ bang, da mumakasi-asi, palessekki tu matammu, anna silasa tu kandemu.

14Kadake!, kadake!, kadanna tu to mangalli, apa ianna malemo, massattuammi umpudi kalena.

15Moi naampui tau tu bulaan sia unnampui buda merdan, iatu ianan ballo tongan, iamotu puduk ma’kada kinaa.

16Alami tu bayu lamba’na, belanna iamo unnindo’i indanna to senga’, sia alami ammu potosandangi ussondai tu to tang ditandai.

17Iatu roti napabu’tu pa’pakena matappa’ nakande tau, apa undinna iatu sadangna naponnoi karassik.

18Mintu’ tanan penaa dipalalo tete dio pa’timbangan, iamoto timbang melomi mumane lao parari.

19Minda-minda lu lako lu dio mai ma’pakadake lele, iamo umpasombo rasia, iamoto da musikadamak tu to sangkaloloan bang.

20Minda-minda untampakki ropu ambe’na sola indo’na, la pa’de tu sulona, ke lillinan parrakki.

21Iatu mana’ disasai diala, manassa tae’ namarendeng katampakanna.

22Da muma’kada kumua: la kupabala’i tu kakadakean, sangadinna kampai tu PUANG, na Iamora untunduiko.

23Duang rupa tu batu timbangan Nakagalli PUANG, sia misa’ tu timbangan sala, iamo kadake tongan.

24Lu dio mai PUANG tu mintu’ tengkana tau, apa iatu misa’ tau-umba nakua la untandai tu la lanna?

25Iake ma’kadai tu tau, kumua: maindan, natae’ natangnga’ meloi dolo, iamo misa’ poya lako kalena, sia iake mangallonanni dolo, namane ma’timbang.

26Iatu misa’ datu kinaa unta’pii to tang mekaaluk, sia napalullu’i roda panglulluran.

27Iatu penaanna tau iamo misa’ palita lu dio mai PUANG, la umparessai tu mintu’ apa karerungan lan ba’tengta.

28Kamamasean sia kamarurusan ungkarimmanni datu, sia tete dio kamamasean anna pabantangi tu isungan kapayunganna.

29Iatu belona to mangura iamotu kamatotoranna, sia iatu kamala’biranna to matua, iamotu uban.

30Iatu lalan pebamba kerara usseroi kakadakean, sia iatu pelonga’ umbasei tu apa karerungan lan penaa.


  Share Facebook  |  Share Twitter

 <<  Amsal 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel