Dual Panel1Iatu penaanna datu lan limanNa PUANG susito salu’-salu’, Napalolong lao umba-umba tu Naporai.
2Iatu mintu’ lalanna tau nasanga malolo dio pentirona, apa PUANG ussudii tu penaa.
3Umpogau’ kamaloloan sia salunna mandu naala penaanNa PUANG na iatu pemala’.
4Iatu mata pasoloran sia penaa madao, iamo parrangna to tang mekaaluk, iamora dipokasalan to.
5Iatu pa’inaanna to birisan umpaden kaseboan, apa minda-minda tu sasa-sasa bang lan kapu’duran.
6Iake urrampunki’ ianan tete dio lila ma’pakena, susito gaun titale’ sia susi poya mebaa lako kamatean.
7Iatu penggauran masa’ga’na to tang mekaaluk urriu’ bangi male, belanna manokamo tu tau iato umpogau’ tonganna.
8Iatu lalanna to ma’pakena tilekko-lekko, apa iatu to bulo lollong malolo tu penggauranna.
9Mandu melo untorroi tetuk soto banua na iatu sisola baine te’geran lan banua.
10Iatu penaanna to tang mekaaluk ungkabarii bang kadakena, sia tae’ natandai ungkamasei padanna rupa tau.
11Iake diukungi tu to pabe’se, la kinaa tu to tang unnampui tangnga’ melo; sia iake to kinaa diada’i, la unnappa’ kapaissanan.
12To malambu’ umpenunu a’gan banuanna to tang mekaaluk sia ussanggangi tu mai to tang mekaaluk.
13Minda-minda ussissinganni talinga tu pengkamoyana to bongko, manassa iake ia metamba tae’ tau umpebalii.
14Iatu pamengan dibuni umparapa’ kasengkean, sia iatu pa’kamase natambuk umpa’dei kare’dekan ara’.
15Iatu umpogau’ tonganna, napoparannu to malambu’, apa napotiramban tu umpogau’ kakelokan.
16Iatu to pusa dio mai lalan tangnga’ kinaa la melayo lan kasirampunan bombo tomate.
17Minda-minda umporai bangi ma’marua’-rua’, la kapu’duran; sia minda-minda umbudanan minna’ sia uai anggoro’, tae’ nala sugi’.
18Iatu to tang mekaaluk napopela’bak to malambu’ sia iatu to tang maruru’ ussonda to bulo lollong.
19Mandu melo tu untorroi padang pangallaran na iatu sisola misa’ baine te’geran sia sengkean.
20Lan banuanna to kinaa denmo tu mai ianan dinanna sia minna’, apa misa’ to baga untabu-tabui.
21Minda-minda unnula’ kamaloloan sia kamamasean, la unnappa’ katuoan, kamaloloan sia kadipangkeran.
22Iatu to kinaa unteka’ kota ditambakukunna to lalong sia natuan tu benteng naposanderan.
23Minda-minda ungkanandai pudukna sia lilana, iamo ungkampai kalena dio mai ma’rupa-rupa kapussakan.
24Iatu to rombo’ sia matampo, disanga to patelle-telle, iamotu to matampo liu penggauranna.
25Iatu kamailuanna to tukkunan umbaai lako kamatean, belanna iatu limanna magasa mengkarang.
26Iatu kamailuan mailu bang situ’turan allo, apa iatu to malambu’ mamengan bang sia tang ungkasayangi apanna.
27Iatu pemala’na to tang mekaaluk iamo misa’ kamagallian, ondong pole’ ke napemalaranni situang tangnga’ kadake.
28Iatu to sa’bi tang tongan la sanggang, apa iatu to ma’perangi, ditonganan ke ma’kadai.
29Iatu to tang mekaaluk ma’lindo batu, apa iatu to bulo lollong umpamanassa tongan lalanna.
30Tae’ tu kakinaan sia tae’ tu tangnga’ kinaa, tae’ duka tu bisara, ke umpennoloiki’ PUANG.
31Iatu darang dipasakka’, ke allo kapararian, apa iatu kapataloan lu dio mai PUANG.