Dual Panel1Da mukimburui tu to kadake sia da muporai la ussisolanni,
2belanna iatu penaanna untangnga’ bang pa’pakario-rio, sia iatu pudukna umpokada bang kamandasan.
3Tete dio kakinaan nadibangun tu misa’ banua, sia tete dio tangnga’ melo nadipabantang;
4tete dio kapaissanan nadiponnoi tu mai bilikna ianan keangga’ sia maballo sanda rupanna.
5Iatu to kinaa matoto’, sia iatu to unnampui kapaissanan umpasombo kamawatangan.
6Belanna sipatuko la parari situang pa’timbangan, sia iatu kapataloan napaden kabudanna to ma’bisara.
7Iatu to baga tae’ nalambi’i tu kakinaan; tae’na tiku’bi’ tu pudukna lan to’ babangan.
8Minda-minda tu matangnga’ bang la umpogau’ kadake, iamo digente’ to bulituk.
9Iatu tangnga’ tang kebattuan, iamo kasalan, sia iatu to pabe’se nakagalli tau.
10Iake raangi penaammu lan attu kapussakan, la moro’ tu kamatotorammu.
11Rampananni tu to ditingkan la dipatei, sia da mutoyangan kalemu dio mai tu to tipa’re’ba len la dipongko.
12Iake ma’kadako mukua: Manassa tae’ kiissanni – tae’raka nala sombo lako Puang tu ussudi mintu’ penaa sia tae’raka Nala untandai Puang, tu umpenunu ba’tengmu sia tae’raka Nala umpabala’i tu penggauranna simisa’-misa’ tau?
13Kandei tu tani’ enoan, e anakku muane, belanna melo tu iannato, sia iatu tallo’ merang matappa’ lan lingaromu.
14La mutandai kumua susi dukato tu kakinaan lan penaammu. Iake mukabu’tuimi, manassa la sae tu kameloan undinna, sia iatu pa’rannuanammu tae’ nala ka’tu.
15E kamu, to tang mekaaluk, da miodo’i tu banuanna to malambu’, sia da misanggangi tu inan katorroanna.
16Belanna iatu to malambu’ moi anna tobang pempitu, la bendan duka sule, apa iatu to tang mekaaluk tipessussuk tama kamandasan.
17Iake tobangi tu ualimmu, da muparannu; iake tipessusukki, da nasende penaammu,
18dikua da Natiroi PUANG, anNa tae’ naalai penaanNa, Naurunganni umpalelei tu kasengkeanNa dio mai.
19Da mukagi’gi’i tu to kadake, sia da duka mukimburui tu to tang mekaaluk;
20belanna tae’ nala sae tu kameloanna undinna lako to kadake, sia iatu palitanna to tang mekaaluk la dipa’dei.
21E anakku muane, kataku’i tu PUANG sola datu, sia da musisola tu tau umpaden kamarukkan.
22Belanna tang dikapang-kapang anna bu’tu tu kasangganganna, sia mindara unnissanni ba’tumba natappu’ tu taunna narampoi kamandasan.
23Inde dukapa tu ba’tu pira-pira (kada peada’na) to kinaa. Tang melo tu umpelindo tau lan kapa’paolaian salu.
24Minda-minda tu ma’kada lako tu umpogau’ kadakena, kumua: Tae’ musala, nagatai mintu’ bangsa sia la natampakki ropu to sangpetayanan.
25Apa minda-minda ma’paolai salu tongan la maupa’, sia la narampoi kamasakkean sia kasalamaran tu tau iato.
26Minda-minda mebali tongan, iamo unnudung pudukna tau.
27Posara’i dolo tu pengkaranganmu dio salian sia pasakkaranni kalemu tu pa’pa’lakan, mumane umpabendan banua.
28Da musa’bi tang kebattuan lako padammu tolino, belanna la morairokoka umpatassu’i dio pudukmu tu kamorang-morang?
29Da muma’kada kumua: Susitu nagauranna’ susi dukato tu la kugauranni; la pantan kupabala’i sitinaya penggauranna.
30Den pissan kulendu’i pa’lak to tukkunan sia ullendu’i pa’lak anggoro’ to tang unnampui tangnga’ kinaa.
31Manassa pa’lak iato nasitutu’i duri sia nasamboi riu, sia iatu rinding tembo’na puramo tuan.
32Iatongku pemarangami, kupalan penaami, sia iatongku tiromi, kualami pangadaran tu iannato.
33La mamma’pa’ sattu’, mamma’-mamma’pa’ sattu’, la ma’koko kalepakpa’ umbambangan kaleku sattu’,
34la saemo madomi’ tu kamakario-rioammu sia iatu kataerammu susi misa’ to ma’pa’buno.