Dual PanelPeada’ dandanan sangka’ narampun taunna Hizkia
1Inde dukapa tu peada’ dandanan sangka’na Salomo, tu narampun taunna Hizkia, datu Yehuda.
2Iamo Napomala’bi Puang Matua tu umbuni apa Napogau’, apa iatu napomala’bi’ datu iamotu umparessa kara-kara.
3Iatu malangka’na langi’, sia iatu mandalanna lipu daenan sia iatu penaanna datu tang dilambi’ disuka’.
4Alai tu tai salaka, anna bu’tu natiro pande bulaan tu misa’ panggaraganna.
5Pamambelai tu to tang mekaaluk dio mai olona datu, na iatu isungan kapayunganna dipabantang tete dio kamaloloan.
6Da mutendeng kalemu dio olona datu, sia da mubendan dio inanna to kapua.
7Belanna mandu melo, kema’kadai tau lako kalemu, nakua: Maleko mai, kendekko langngan!, na iake napamadiongangko tau dio olona to mala’bi’, tu mangka nata’pai matammu.
8Da mumadomi’ male ma’kara-kara, belanna apa tu la mupogau’ ma’katampakanna ke napakasiri’ko padammu tolino?
9Pemeloi kalena bangmi tu kara-karamu sola padammu tolino, apa iatu rasia to senga’ da mupasomboi,
10da nabe’seko minda-minda urrangi tu iannato; ianna susito, tae’ nala tore tu lele kadakemu.
11Iatu kada disa’bu’ melo butung bua appel bulaan dipadiong pindan salaka.
12Iatu to ma’pakilala kinaa siperangian to untananni talinga susito anting-anting bulaan sielle’ manik bulaan.
13Susitu masakka’na ambun makko, ke attu pegandungan, susi dukamoto tu misa’ pesua manappa’ lako tu ussuai, belanna iamo umpamanaman penaanna puangna.
14Susito salebu’ sia angin tang umbaa uran, susi dukato tu misa’ tau untendeng pamenganna tu tae’ gai’na.
15Diona pesuka’ kalando anna dipamalamma’ penaanna tu to paa, sia lila masokan unnisak-nisak buku.
16Iake muappa’i tu tani’ enoan, kande bangi silasanna, da mupeko’sai, mulua manii sule.
17Da mumadada’ bang lao lako banuanna padammu tolino, masorro manii, anna kabiri’ko.
18Susitu misa’ tarasulu’, pa’dang sia tinaran matata’, susi dukato tu misa’ sa’bi tang tongan lako padanna tolino.
19Susitu isi manapo sia lentek tiredok len susi dukamoto ke sande’ lakoki’ to tang manappa’ lan allo kapussakan.
20Susi to unnalai bayunna, ke attu madingin, sia susi to sukka dipasirau soda, susi dukato tu to sumengo punala bang, moi anna rosso penaanna.
21Iake tangdia’i tu ualimmu pakandei, iake ma’rangi pairu’i.
22Belanna ke mupogau’i susito, mupabumbunni ruaya tu ulunna, anna PUANG la umpakkanni lako kalemu.
23Iatu angin ma’paludaa mai umbaa uran kamban, susi dukato tu kada boko’ umpapayan kasengkean dio lindona tau.
24Mandu melo untorroi tetuk soto banua, na iatu sisola baine te’geran lan banua.
25Iatu kareba melo dio mai tondok mambela butung to uai sakka’ lako to ma’rang.
26Susi uai saruran dipamalutu sia uai kalimbuang dipamaruttak, susi dukamoto tu to malambu’ ungkalaa’ to tang mekaaluk.
27Kadake ke budai tani’ enoan dikande, apa iatu untuntun kara-kara magasa tongan iamo umpabu’tu kadipangkeran.
28Susi kota tuan rinding tembo’na, susi dukamoto tu misa’ to tang unnatta penaanna.