Dual Panel1Minda-minda ditole-tole dipakilala, anna tontong bang matoro, ta’pa la disabu’i anna tang tundu-tunduannamo.
2Iake sakerang-rangngannai kamatotoranna tu to malambu’ parannu tu to buda, apa iake ma’parentai tu to tang mekaaluk, sumarro tu to buda.
3Minda-minda tu umporai kakinaan, umpaparannu ambe’na, apa minda-minda tu sikadamak baine bualang, ussa’sakan iananna.
4Diona parenta malambu’ nanii datu umpabantang tondokna, apa iatu to ma’pasanta’i sima, iamo ussanggang tondok.
5Iatu to ussede-sede bang padanna tolino, natananni porro’ tu pentengkana.
6Iatu kapatodo-tintinganna to kadake iamo umpoyai, apa iatu to malambu’ la mela’tek sia la sende.
7Iatu to malambu’ untonganan tobongko, apa iatu to tang mekaaluk tae’ napalan penaai tu iannato.
8Iatu to matampo umpaden kamarukkan lan kota, apa iatu to kinaa umparapa’ kasengkean.
9Iake sikara-karai tu to kinaa na tobaga, tae’ natorei sumaraba-raba sia metaa.
10Iatu to umpatibollo rara, ungkabiri’ to sallo’, apa iatu to bulo lollong untuntun kamakarimmananna.
11Iatu tobaga umbarrakan bang mintu’ kasengkeanna, apa iatu to kinaa umpadapa sia umpa’dei kasengkeanna.
12Misa’ to ma’parenta umperangii bang kada tang tongan – iatu mintu’ to naala parea tang mekaaluk nasang.
13Iatu to kalala’ sia to ma’pakario-rio tontong sitammu, PUANG umbenni pentiro masero sola duai.
14Iatu misa’ datu untonganan kara-karana tobongko, manassa la bantang tu isungan kapayunganna sae lakona.
15Iatu pebamba sia peada’ umpaden kakinaan, apa iatu pia muane disa’biangan bang, umpamasiri’ indo’na’.
16Iake kerangnganni tu to tang mekaaluk, sakerangngan-rangnganna tu kapatodotintingan, apa iatu to malambu’ napopaiman, untiroi tu katobanganna tau iato.
17Pa’dikki tu anakmu muane, anna padenangko karapasan penaammu sia napabu’tuangko kaparannuan.
18Iake tae’i tu kada dipaombo’, iatu pa’tondokan lao sala, apa la maupa’ tu to ungkaritutui sukaran aluk.
19Iake kada manna tang silasapa to tu peada’ lako misa’ kaunan, belanna moi natandaimo, apa tae’ napalan penaai.
20Iake mutiroi den tu tau ussasai kada, mandu dirannuan tu to baga na iatu tau iato.
21Minda-minda tu umpamolle’ misa’ kaunan tempon manguranna, katampakanna la pabali-bali tu kaunan iato.
22Iatu to arasan umpabu’tu kasigagan sia iatu to tarru’ ara’ umpogau’ buda penggauran kadake.
23Diona kamadoan penaa anna dipamadiongan tu misa’ tau, apa iatu to umpopengkadiongan penaanna la unnappa’ kamala’biran.
24Minda-minda mantaa sola to boko, iamo ungkabiri’ kalena; moi narangimo tu tampak ropu, apa tae’ napokada lenni tu kara-karana.
25Kamatakuran lako tau, iamo untananan poya kaleta, apa minda-minda tu umposande’ PUANG, mentilindung dio inan marampa’.
26Buda tau untuntun pa’kamaseanna to ma’parenta, apa lu dio mai PUANG nanii tau unnappa’ katonganan.
27Iatu to kelok napomagalli to malambu’, apa minda-minda unnola tonganna iamo napomagalli to tang mekaaluk.