Dual PanelPangadaranna indo’na Lemuel
1Inde sia tu kadanna Lemuel, datu dio Masa, tu naadaranni indo’na.
2Apara, e anakku, (tu la kupokadangko)? io apara, e anak sun dikaleku? io apara, e anak pangallonangku?
3Da mupalulakoi baine tu kamatotorammu, sia iatu kasikadamakammu baine iato umpamandasa datu.
4Tang sipatu tu mai datu, e Lemuel, tang sipatu tu mai datu, ke pa’anggoro’i, sia iatu mai to paa ungkaduangi pangiru’ palango,
5kumua da namangiru’ sia da nakalupai tu apa dipondok sia nasondai tu katongannanna mintu’ to dipakario-rio.
6Benni pangiru’ palango lako minda-minda tu kapu’duran sia uai anggoro’ lako minda-minda tu rosso tongan penaanna.
7Da’ito nairu’i anna kalupai tu kakalalaranna sia anna tae’ naingaranni tu kamandasanna.
8Bungkaranni pudukmu tu to tang naissan ma’kada, belanna la untonganan mintu’ to mandasa tongan.
9Bungka’i tu pudukmu, ammu mangra’ta’ malambu’, sia sanda tonganni tu to dipakario-rio sia to bongko.
Kadipudianna misa’ baine birisan sia kinaa lan tananan dapo’na
10Mindara la unnappa’ misa’ baine birisan sia kinaa? iatu angga’na mandu losong na merdan.
11Iatu muanena ungkatappa’i, naurungan tang kurang tu bua sara’na.
12Kameloan bang tu napogau’ lako kalena, tangia kakadakean lan mintu’ katuoanna.
13Umpasirundunan ia bulu domba sia rami, sia matipa tu limanna ungkarangi tu apa iato.
14Susi ia kappala’ pa’balili, sia unnala kandena dio mai tondok mambela.
15Millikmo ia, ke mabongi bang siapi, sia umben kande to nakurinni sia napamanassan pengkarangan tu mai baine rurananna.
16Iake la morai unnampui misa’ pa’lak manassa la naappa’, sia diona bunga rangka’na natananni misa’ pa’lak anggoro’.
17Ma’kamandi’ anna matoto’ mengkarang, sia umpabussu limanna.
18Nasa’dingmo, kumua maupa’ tu pa’balilinna, iake bongi tang pa’de lenmo tu palitanna.
19Tontong bang natoe tu unuran sia umpasule-sule panikuan.
20Tontong nabungkaran pala’na tu to bongko, sia natadoi lima tu to mase-mase.
21Tae’ namataku’, narampoi ambun makko tu rurananna, belanna mintu’ rurananna ma’tamangkale karamisi.
22Nagaragammi kalena tu paramadani; iatu lenang melo sia lango-lango makaseda tu napotamangkale.
23Iatu muanena katandan dio lu babangan, ke unno’ko’i sola mintu’ pekaamberan lan tondok.
24Nagaragaimi tu tamangkale lenang anna balukanni; sia beke’ naparandan la nabalukan lako to ma’baluk.
25Kamatotoran sia kamala’biran tu napotamangkale, iatu allo undi napokaparannuan.
26Situang kakinaan, ke tiku’bi’i tu pudukna, masokan tu pa’pangada’ dara’ lengko lilana.
27Natiro melo tu lalan pengkaranganna to lan banuanna, sia tang ungkande roti tang nakara’ta’i.
28Iatu mai anakna muane bendan sia napudi tu kamauparanna, sia ia duka tu muanena untendengi, nakua:
29Buda tu mai pia baine mandu matipa, apa musau’ nasang tu mintu’nato!
30Iatu kamaballoan pa’kaleanna misa’ baine ma’pakena sia iatu kameloan pantarisanna tae’ gai’na, apa misa’ baine ungkataku’ PUANG, iamo sipatu dipudi.
31Benni lako tu bunga rangka’na, sia iatu penggauranna la umpudi lan babangan tondok!