Dual PanelPa’pakilala la toyang dio mai bainena to senga’
1E anakku, palan penaai tu kakinaangku, sia tananni talingammu tu diona tangnga’ kinaangku,
2ammu karitutui tu pa’timbang melo, sia nakaduttu’i pudukmu tu kapaissanan.
3Belanna iatu pudukna baine to senga’ to’do tani’ enoan, sia iatu lingarona mandu malannang anna boka’,
4apa ma’katampakanna mapai’ susi apsantin sia mataran susi pa’dang mataran patomali.
5Iatu lette’na lu rokko kamatean, sia iatu tengkana lu lako lino tomate.
6Dikua da musepang lako lalan katuoan, iamoto nama’papusa tu tengkana, natae’ mutandai tu iannato.
7Iamoto, e anakku sola nasang, perangiina’ sia da miboko’i tu kada sun dio pudukku.
8Toyangangko lalanmu dio mai tu baine susito, sia da mureke’i tu ba’ba banuanna,
9kumua da musorongi tu kamala’birammu lako to senga’ sia iatu taun katuoammu lako to tang untandai kamamasean;
10kumua da anna to sae umpediaranni kalena tu iananmu, sia saro ra’ta’mu, da natama banuanna to tang ditandai,
11muurunganni sumarro, ke ma’katampakannai, ke pu’pu’ nasangmi tu duku’mu sia kalemu.
12Sia ma’kadako kumua: Umba kukua to kukagi’gi’i tu peada’ sia nasayui penaangku tu pa’pakilala!
13Ma’apari natae’ kuperangii tu kadanna gurungku, sia tae’ kutananni talinga tu to unnada’ina’!
14Sidi’mora kulamma’ rokko mintu’ kamandasan – lan lu tangnga kombongan sia kasirampunan.
15Melo ke unniru’ko uai lan mai bubun batummu siamo, tu nanii uai uran, sia uai tuo diong mai bubunmu siamo.
16Mueloranraka tu kalimbuangmu lolong dao lu batatta, sia salu’-salu’mu dao lu tana lapang?
17Melo ke iko manna umpoapai, da naden to senga’ musolan.
18Namasakke-sakkemora tu kalimbuangmu, sia la parannuko diona tu bainemu, tommu mangurapa,
19iamotu misa’ donga birang maelo sia misa’ donga’-donga’ maballo; da’ito natontong tarru’ umpasendeko tu susunna, sia tontong umpatiakka’ penaammu tu kamamaliranna.
20Ma’apai, e anakku, ammu lamban bainena to senga’ sia urraka’ dadanna to tang ditandai.
21Belanna iatu lalanna simisa’-misa’ tau payan dio pentiroNa PUANG, Napenunu tu mintu’ tengkana.
22Iatu to tang mekaaluk la napungo kalena kakadakeanna, sia la napurru’ poya kasalanna.
23Belanna tae’ naturu’i tu peada’, iamoto nala mate, sia napapusamo kaliu-baganna.