Dual PanelMa’rupa-rupa pa’pakilala
1E anakku, iake unnindo’iko indanna padammu tolino, sia iake mupessala’panni tu limammu diona to senga’;
2iake napoyamoko kada sun dipudukmu, sia natingkanmoko ba’tikan dara’ lengko lilams-
3pogau’mi te, e anakku, ammu lendokan kalemu, belanna tobangmoko tama lisu pala’na padammu tolino; malemoko, ammu pakasa-kasai sia pandasa tonganni;
4dapa mueloranni tu matammu mamma’ sia kulimbang matammu tikkaru’du’;
5lussurangko kalemu susito kijang dio mai limanna to rumangngan, sia susito manuk-manuk dio mai limanna to ma’poya.
6E pong tukkunan, maleko lako to’ sirrin, pemarangai tu lalanna ammu kinaa;
7moi anna tae’ ia tu pangulunna, ba’tu mantari’na, ba’tu to ma’parentana,
8naparandan duka ia tu mai kandena, ke pealloanni, sia narampun duka ia tu kinallona, ke pegandunganni.
9Sangapaporoko la mamma’, e pong tukkunan, pirampira mumane millik dio mai kamammarammu?
10La mamma’pa’ sattu’, la mamma’-mamma’pa’ sattu’, la umpasikala’pa’ limangku umbambangan kaleku sattu’.
11Iammu susito la narampoiko kamakario-rioan butung misa’ to sae ma’dondo, sia iatu kataerammu susi misa’ to ma’pa’buno.
12To bulituk sia to umpabu’tu kakadakean, iamotu to umbulang leko’ kada,
13napopa’kidi’-kidi’ tu matanna, sia napopassodo-sodo tu lette’na sia napopa’dullu-dullu tu tarunona,
14tu untannun bang tangnga’ bulituk lan penaanna, sia tontong bang untampa kakadakean, sia umpabu’tu kasigagan.
15Iamoto iatu kasangganganna urrampoi tang dikapang-kapang, ta’pa la diru’puk, naurungan tae’mo nakullei dipamondo.
16Inde sia tu annan pasirua tu Nakabiri’ PUANG, ondongpi pitu tu Nakagalli tongan:
17Mata tumongnga’, lila kamorang-morang, lima umpatibollo rarana to tang kasalan,
18penaa untannun tangnga’ pepayu sia lette’ tang tipodo’ lako kaka-dakean,
19tu umpenaan buttok susito sa’bi tang tongan sia umpabu’tu kasigagan dio lu to massiulu’.
Pa’pakilala la toyang dio mai pasandak salu lako rampanan kapa’
20E anakku, karitutui tu pepasanna ambe’mu sia da musuale pa’pangada’na indo’mu.
21Palanni lakka buamu, sia pomanikki lan barokomu.
22Iake lumingkako, denno upa’ naia ussolangko: sia iake pana’dingmoko, denno upa’ naia umpa’kadaiko.
23Belanna iatu pepasan iamo misa’ palita, iatu pa’pangada’ iamo misa’ arrang, sia iatu pa’pakilala lu dio mai peada’ iamo lalan ma’palulako katuoan,
24tu la umpatoyangko dio mai baine sala’ kedo, dio mai lila panglono’ to tang ditandai.
25Da nabu’tu lan penaammu tu kamoraian lako pantarisan melona, sia da naalako kidi’ matanna.
26Belanna pa’katumangna baine bualang anna kapu’duran kande tau, sia bainena to senga’ unnula’ katuoan mala’bi’na tau.
27Ma’dinraka tu tau untambuk api, anna tang la ungkandei tu tamangkalena?
28Ma’dinraka tu tau lumingka dao ruaya anna tae’ namampu’ tu lette’na?
29La susi dukato tu to umpasurruk kalosi dibuni lako bainena solana; tae’ misa’ tu to ungkaka’i, la dibilang masero dio mai sala.
30Tae’ nalo’boi tau tu toboko, ke bokoi la umpedia’i tambukna ke tang dia’i.
31Apa iake diapparanni, manassa la nasondai sule pempitu manglokkon, sia mintu’ tu apa lan banuanna la nasorong.
32Minda-minda tu ma’pangan buni sola misa’ baine, iamoto tae’ inaanna; minda-minda tu umpogau’i te, ussanggang kalena.
33Kamatilakan sia kadipamatunan la nalolongan, sia iatu kaditattanna tae’ nala dipa’dei.
34Belanna iatu kamangimburuan iamo api ma’lulu-lulunna misa’ muane, sia tae’ natandai tu kamamasean, ke allo nanii ma’pabala’;
35tae’ natarimai moi umba susitu pela’bak, sia tae’ nakamorai pamengan, moi anna mandu buda.