Dual PanelPetambana Kakinaan sia petambana Kabagan
1Nabangunmo Kakinaan tu banuanna, sia napa’mo tu lentongna pitu.
2Natunumi tu patuoan direre’ sia napasito’bo’ tu uai anggoro’na sia napasakka’ tu medana.
3Nasuami tu passolanna baine, metamba dao lu inan madao lan kota, nakua:
4Minda-minda tu tang unnampui tangnga’ melo, la tibalik anna sepang lu mai; naminda-minda tu tang paissan nakua ungkuanni:
5Maimokomi, kandemi tu kandeku sia iru’mi tu uai anggoro’ku tu mangka kupasito’bo’.
6Tampemi tu mintu’ katangpaissanan, ammi tuo, sia olaimi tu lalan tangnga’ kinaa.
7Minda-minda unta’tan to patelle-telle la ungkabu’tui kalena siri’, minda-minda unnada’i to tang mekaaluk, umpadenan kalena kaditattan.
8Da muta’tanni tu to patelle-telle, da nakabiri’ko, sangadinna ta’tanni tu to kinaa, anna kamali’ko.
9Pangada’i tu to kinaa, anna sakerangngan-rangnganna tu kakinaanna, ada’i tu to malambu’, anna kerangngan tu pa’inaanna.
10Ungkataku’ PUANG iamo pamulanna kakinaan sia untandai To tarru’ masero iamo garonto’na tangnga’ kinaa.
11Belanna tete dio kaleku anna dipakerangngan tu allomu, sia anna dipamalambe’ tu sunga’mu.
12Iake kinaako iko kalena umpoupa’i, sia iake to pa’telleko, iko kalena umpassanni.
13Iatu Indo’ baga ma’pamareko, moi misa’ tae’ natandai, sia tang unnissan apa.
14Sia unno’ko’ dio to’ ba’ba banuanna dao kao’koranna dao inan madao lan kota,
15la untambai tu mintu’ to lendu’ dio lalan iato, tu to lumingka malolo, kumua:
16Minda-minda tu tang unnampui tangnga’ kinaa nasepang mai, minda-minda tu tang paissan nakua ungkuanni:
17Iatu uai diboko matappa’, sia iatu roti dikande buni mammi’.
18Apa iatu tau iato tae’ natandai, kumua inde to dio, inan bombo tomate, sia mintu’ tu to natambai diongmo likunna lino tomate.