Dual PanelSiumpu’na pebali bunga’na Ayub lako Bildad kumua: Apara patu penaanNa Puang Matua tu umparampo kamaparrisan pada budannato
1Iatu penaangku mosomo tuo, kulendokan bang tu sarroku, sia ma’kadana’ lan kamapairan penaangku.
2La ma’kadana’ lako Puang Matua: Da Mira’ta’i kumua sipatuna’ diukung; paissannina’, ma’apai Milaoina’.
3Denraka upa’Mi, ke Mipakario-rioi sia Mitibe tu panggaraga limamMi sia Mipaparrangi masiang tu pa’tangngaranna to tang mekaaluk?
4Miampuiraka tu mata tolino, patiroroKomika susi patirona ma’rupa tau?
5Padaraka allo katuoamMi tu allona ma’rupa tau sia padaraka tu taunMi na allona misa’ muane,
6amMi daka’i tu kakelokangku sia Mipenunu tu kasalangku,
7moi amMi tandai, kumua tae’ angku sala, sia moi misa’ tau tae’ nama’din ullendokanni lan mai limamMi?
8LimamMimo tu unggaragana’ sia ungkombongna’, upu’mo sia sanda rupamo; sia la morairoKomika ussabu’ina’?
9Kilalai, kumua losso’ pitti’ tu Mikombong angku dadi, sia morairoKomika umpasulena’ angku dadi barra’-barra’?
10Tae’ raka Mibolloanna’ susitu bumbungan sia Mipasusina’ to dadi’ makko,
11umpapakeina’ kuli’ sia duku’, sia Mipakkannina’ buku sia ura’?
12Mikamaseina’ katuoan sia kamaturu-turuan, sia pa’kaduttu’Mi ungkampai penaangku.
13Apa inde sia tu Mibuni lan penamMi-kutandai kumua iatu iannate mipangudumo –,
14kumua iake kasalammo’, manassa Mipemarangana’ sia tae’ Mibilang maserona’ dio mai kakelokangku.
15Iake manassana’ sala – upu’ alloku! sia iake tae’i kusala – manassa tae’ kubelai unnadongan ulungku, belanna namosomo’ kadisayuan sia untiro kamandasangku.
16Iangku adongan ulungku, manassa iatu Puang susito singa unnula’na’ sia Mipakitan pole’na’ kuasa kalle-kalleamMi.
17Tontong bangna’ Mitamban sa’bi ba’ru unneana’, sia umpabudaKomi kamapa’diran penaamMi lako kaleku susi to sangtuntunan, ondongpi sangpampangan surodadu ullaoina’.
18Apa ma’apai amMi patibussanna’ lan mai pa’tambukanna indo’ku, anna tae’ naka’tu sunga’ku, tonna tae’pa misa’ mata untirona’.
19Iake susito susina’ to tae’pa kudadi; tongku tassu’ dio mai pa’tambukanna indo’ku, angku ta’pa male dilamun.
20Tang sidi’raka tu allo katuoangku? Eloranna’, angku perasai kaparannuan sidi’,
21ke tae’pi angku male sia tang sule lako tondok kamalillinan sia kapittukan,
22lako tondok lillinan parrak, tu nanii, kapittukan sia nanii atoran tang ma’rundunan, sia nanii arrang susito kamalillinan.