Dual PanelKada ma’penduanna Elifas: tontong tu kadanna, kumua la sanggang tu to tang mekaaluk
1Ma’kadami tu Elifas, to Téman, nakua:
2Denraka to kinaa umpatassu’ kapaissanan tang kebattuan, sia umponnoi angin dio mai rampe matallo tu ba’tengna?
3Nata’tanraka tau umpokada kada tae’ gai’na, sia ulelean tang ma’run-dunan?
4Den dukapa iamotu mulullu’ tu kapengkaolan lako Puang Matua sia umpasosso’ko pa’pakaraya dio oloNa Puang Matua.
5Belanna iatu kakelokammu unnada’iko ma’kada susito, ammu pilei tu kada to ma’pakena.
6Lilamu kalena umpasalako, tangia aku; ondongpi pudukmu kalena ussa’biiko, kumua salako.
7Ikoraka tu bunga’na tolino dadi, ba’tu dipadadirokoka dolo na mintu’ tanete?
8Ma’perangirokoka lan kombonganNa Puang Matua, sia iatu kakinaan mupalulakoraka kalemu?
9Apara tu mutandai, anna tae’ kitandai? Apara tu muissan, anna tae’ kiampui?
10Den duka dio kaleki tu to ubanan sia to matua induk, tu mandu matua anna ambe’mu.
11Musanga bitti’raka tu pa’pakatana dio mai Puang Matua sia kada masokan, tu dipokada lako kalemu?
12Ma’apai nataloiko penaa mapallamu, sia ma’apai nadukku-dukku tu matammu,
13ammu barani umbali-bali Puang Matua sia umpatassu’ kada susito dio randan pudukmu?
14Umbara nakua tu tolino, anna masero, sia anna malolo tu mai to nadadian misa’ baine?
15Manassa iatu to maseroNa tae’ Nakatappa’i Puang, moi anna mintu’ to untorroi suruga tae’ duka namasero dio pentiroNa;
16ondongpissan tu to megi’giran sia to kadake liu, iamotu tolino, tu unniru’ kakadakean butung uai.
17La moraina’ unnada’iko, perangiina’; sia mintu’ apa mangka kutiro, la kuuleleanangko,
18iamotu mai apa napa’peissanan to kinaa tu nanannanni nene’ to dolona, sia moi misa’ tae’ nabunii,
19tonna misa-misapa diben untorroi tondok, sia tae’pa to salian lembang tama urraui.
20Iatu to tang mekaaluk mataku’ lan mintu’ allo katuoanna, sia iatu to ma’pakario-rio lan mintu’ taun tu mangka dilampakanni.
21Iatu oni apa mepatiramban tialling lan talinganna, iake lanni kamarampasan tongan narampoimi to ma’kasanggang.
22Tae’ napatonganni, kumua la sule lan mai kamalillinan: dilampakmo tu kalena la nakande pa’dang.
23Salamba salaomo undaka’ kande umbara nanii? Natandaimo, kumua sakka’mo lako kalena tu allo kamalillinan.
24Napamataku’ kamasussan sia kapussakan, narampoi anna sau’i susito misa’ datu sakka’mo la palaoan situang kamaparranganna.
25Belanna nae’te’mo tu limanna unnea Puang Matua, sia umbali To umpoissan angge maritik.
26Ma’dondo umbali Puang situang kamadongngaranna, sola balulang dikararran bassi.
27Belanna napabungku’i lompo tu lindona sia napalapikki lompo tiku lao tu aakna;
28napa’tondokkimo tu kota disanggang, sia lan banua tu tang sipatu nanii tau torro, tu dilampakmo tontong daun lauan.
29Tae’ natontong sugi’ sia iatu mai iananna tang la marendeng, sia iatu mai apanna tang la kerangan dao kuli’na padang.
30Tae’ natilendok dio mai kamalillinan, sia iatu dukku api ungkande mampu’i tu tarukna sia napa’dei penaa sun dipudukNa Puang.
31Da narannuanni tu apa tang kebattuan, napakena manii tu apa iato, belanna tang kebattuan tu pepak-kanna.
32Tae’pa nalambi’ tu attunna, anna upu’mo tu allona, sia tae’mo namamata tu mai palapa koromana.
33La susito garonto’ anggoro’ tu ronno’ mintu’ bua makkanna sia susito garonto’ saitun, tu rondon mintu’ ta’binna.
34Belanna iatu tuntunan to tang umbilang Puang Matua tang danun sia api ungkande pura mintu’ tendana to ungkande pappe’.
35Susito ungkia’tangan kakadakean sia untibussanan kakelokan sia iatu ba’tengna umpopembua pa’pakena.