Dual PanelPebali ma’penduanna Ayub lako Elifas, iamotu palakunna Ayub kumua Natonganni Puang Matua tu kara-karana
1Apa mebali tu Ayub nakua:
2Budamo tu kada susite mangka kurangi, manassa kamu tu to ma’pakatana, apa ma’pamasussaorokomi.
3Tae’raka upu’na tu mintu’ kada tang kebattuammi? Apara tu umpatiakka’ko, ammu ma’kada pole’pa?
4Ma’din dukana’ ma’kada susi kamu, ke susinna kamu narampoi kamandasan susi aku; la kutolorangkomi kada mammi’ sia kuiling-ilingangkomi ulu.
5Pudukku la umpabatta’ penaammi sia pa’pakatanangku la umpamaringankomi.
6Apa moi angku ma’kada tae’ nakurang tu kamaparrisangku, sia iake kappana’, denraka kamaringanan kupolean?
7Apa totemo Naalaimo’ Puang tu mintu’ kamatotorangku; Mipatisambo’mo male mintu’ sangdadiangku,
8sia Miparampoina’ kamandasan; iatu iannato dadi sa’bimo unneana’: iatu sakingku bendanmo umbalina’ sia umparapa’na’.
9Kare’dekan ara’Na Puang usse’buse’buna’ sia ullaoina’, Ia umpasisange’ isinNa unta’paina’, iatu Ualingku umpatibulia’ matanNa unneana’.
10Iatu tau iato umpopenganga sadangna umbalina’, sia napamatunana’ sia ussala’pa popoku, sangbara’ tu tau iato sae sirampun unneana’.
11Nasorongna’ Puang Matua lako tau iato, sia Naeloranna’ tama limanna to tang mekaaluk.
12Tuona’ lan kamanamanan, apa Puang umpatirambanna’; Nadammak tu sokkongku sia Napessambakanna’ rokko padang, sia Napamanassana’ Napopassandan.
13Buda tu mai tinaran sipettiaran untikuina’, tang untandai kamamasean tu Puang umpatarru’i bale’ke’ku, sia Nabolloan rokko padang tu pa’dungku.
14Nale’to-le’to bang Puang tu kaleku, sia ma’dondo ullaoina’ susi misa’ to lalong.
15Misa’ karoro’ diposanda bolong kudasiran kuli’ku, sia tandukku kupentanaran rokko to’ barra’-barra’;
16iatu lindoku mararang napobua’ katumangiran, sia iatu kulimbang matangku nasamboi lillinan parrak,
17moi anna tae’ pa’pakario-rio dio limangku sia masero tu passam-bayangku.
18O kuli’na padang! da musamboi tu raraku, sia peongli’ku da nalambi’i tu inan kapelayoan!
19Apa moi nasusito, tonganna denmo totemo tu Sa’bingku dao suruga, iamotu To ma’tonganangku dao masuanggana.
20Moi natelle-tellena’ tu mai sangmaneku, apa iatu matangku ma’palulako bang Puang Matua;
21kumua na Puang umpaolai salu tu ma’rupa tau siea sia urra’ta’ kara-karana tolino, tu siea solana.
22Belanna sidi’ bangri tu taun la sae, angku olai tu lalan, tu tae’ angku la unnolai sule.