Dual PanelKada ma’penduanna Bildad, nakua: Manassa la sanggang tu to tang mekaaluk
1Ma’kadami tu Bildad, to Suah, nakua:
2Sangapaporoko ma’kada umpoyakan? Iake muissan melomi, kimane ma’kada-kada pole’.
3Ma’apai angki disanga susito patuoan sia susito tang paissan dio pentiromu?
4Iko kalena, napobua’ kasengkeammu ammu se’bu kalemu, ikoraka anna la dipasisayuran tolino tu kuli’na padang sia dipalele tu buntu batu dio mai inanna?
5Apa moi susito iatu arrang to tang mekaaluk la dipa’dei sia iatu dukku apinna tae’ nala tontong parrang.
6Iatu arrang lan to’ tendana la malillin sia iatu lampu daona lu la dipa’dei.
7Iatu pentengka matoto’na la diampangi sia pa’timbanganna kalena la ussongkanni.
8Belanna pentengkana kalena anna tipoya sia unnolai patuang disamboi panganan.
9Naala ba’tikan tu kambutu’na, sia naarra’i poya purrusan tu kalena.
10Iatu ulang dibunianni diong padang, sia pepoya ditananammi dio to’ lalan.
11Tiku lao narampoi tu apa mepatiramban sia naula’ dio to’ pentengkana.
12Iatu kamandasan tangdia’mo la unnampello’i sia iatu kasanggangan ma’parandanmo la untobanganni.
13Iatu pa’bunga’na kamatean ungkande sisanginanni tu kuli’na sia unnimbakan pa’kaleanna.
14Disintakki dio mai to’ tendana, tu nanii manaman nasa’ding; anna popentengkai lako datu ma’patiramban.
15Lan to’ tendana naniimo apa tang sipatu ussisolanni, sia la diambo’i solo’ tu inan katorroanna.
16La marangkemo diong mai tu uaka’na sia malayumo dao mai tu takke’-takke’na.
17La pa’demo tu kadipengkilalaianna dao kuli’na padang, tang disa’bu’mo tu sanganna dio lu batatta.
18La di suale dio mai to’ maserona tama to’ malillinna sia diula’i dio mai to’ naninna tau.
19Tang la membati’ sia tang la mentaruk dio lu bangsana, sia tae’mo misa’ tau la torro lan inan nanii.
20Iatu to mangura nakagiangan tu allona, sia ma’parondo la narampoi to matua.
21Manassa susimoto tu katorroanna to kadake, sia susimoto tu pa’tondokanna to tang umbilang Puang Matua.