Dual PanelPebali ma’penduanna Ayub lako Bildad, iamotu moi anna pomasussai tu mintu’nato, narannuan duka tu Puang Matua
1Apa mebali tu Ayub nakua:
2Sangapaporokomi la umpamasaki ara’na’ sia iatu kadammi umpabonnong penaangku?
3Pessangpulomokomi umpamatunana’; tae’ mimasiri’ umpamapa’dik penaangku.
4Manassa tonganra’ka pusa, dioraka kaleku tu kapusan?
5Iake tongannakomi ma’kada layuk lako kaleku, la mipamanassanna’ tu kadisayuangku.
6La mangakukomi, kumua Puang Matua umpogau’ tang malolo lako kaleku sia Naparampoina’ poyaNa.
7Manassa melallakna’, kukua: Dipandasana’! apa tae’ kudipebalii. Metambana’ umpalaku pa’tunduan apa tae’ naola salunna.
8Naampangi Puang tu batattaku, kuurungan tang tarru’mo, sia Nasamboi kamalillinan tu lalanku.
9Napasisayurammo’ tu kamala’birangku sia Naalaimo tu makotaku.
10Narondonnimo’ tiku lao, kuurungan sabu’, sia iatu pa’rannuanangku Nalampi’i susito sangbatang kayu.
11Napadukkumi tu kare’dekan ara’Na lako kaleku sia Nasangana’ ualinNa.
12Pada sae sirampun tu tuntunanNa, undaka’ lalan ullaoina’ sia ma’tenda untikui tendaku.
13Iatu siulu’ku Napatoyang dio mai kaleku, sia iatu a’ganna sitandangku susi to mambela lako kaleku.
14Iatu sangdadiangku tae’mo natollongina’ sia iatu sitandangku tang nakilalaimo’.
15Iatu ruranangku sia iatu kaunanku baine nasangana’ to mambela, susi bangmo to tang natandai dio pentirona.
16Iangku tambai tu kaunanku muane tae’mo namebali, kupengkamasei tonganpi.
17Iatu penaa bubaungku nakagi’gi’mo baineku sia bubosingku nakalinamo rapungku.
18Moi iatu pia muane napamatuna dukana’, iake bendanna’, ma’kada tu tau iato umbali-balina’.
19Iatu mintu’ to kusikaduluran nakasorromo’; sia iatu to kuala mase nasuleimo’.
20Iatu kuli’ku sia duku’ku le’ke’ dio bukungku sia ia mannamo tu kalleku torro.
21Kamaseina’, kamaseina’, e kamu sangmaneku, belanna nata’paimo’ limanNa Puang Matua.
22Ma’apai miula’na’ susi Puang Matua, sia tae’ paraka mipa’pediaranni tu duku’ku?
23A’a, dennoupa’ anna disura’ tu kadangku, kenna den siamo upa’ nadipatama misa’ sura’,
24disura’ misa’ peoki’ bassi dio papan tumarra, dipa’ lan buntu batu, anna tontong sae lakona!
25Apa kutandai, kumua iatu To mangla’bakku tuo, anNa ma’katampakanna la bendan dao to’ barra’-barra’.
26Na iake lollo’mi tu kuli’ku, lan mai pa’kaleangku la kutiro tu Puang Matua;
27tu aku kalena la untiroi tu kupomelona, sia matangku la untiro Puang, tangia to senga’ dio mai Puang; iatu apa-apa lan ba’tengku lendu’ tongan mamali’na.
28Iake ma’kadakomi mikua: Umba la kikua unnula’i angki kabu’tui tu garonto’na kara-kara iato!
29la ungkataku’ kalenakomi pa’dang, belanna iatu kare’dekan ara’mi ammi pobannangi dipakandei pa’dang, ammi mangaku, kumua den tu pa’paolai salu.