Dual PanelSiumpu’na pebali ma’pentallunna Ayub lako Elifas, nakua: Napalan penaaraka Puang Matua tu a’ganna to dipakario-rio?
1Ma’apari natae’ Natempoanni To umpoissan angge maritik tu attu kadiukungan, sia tae’ natiroi to untandai Puang tu allo pa’paolai salunNa?
2Den tu to umpalele batu katonan, sia den tu to urrampa tuntunan sapi sia domba anna laai.
3Iatu keledainna pia biung naula’i male sia iatu sapinna to balu naala pentoe.
4Iatu to mase-mase nasuale dio mai lalanna, sia iatu to makario-rio lan tondok membuni nasang.
5Manassa susi bang to keledai lampung, lan padang pangallaran tassu’ male lako pengkaranganna, undaka’ kande; padang aak umpadenanni kande tu anakna.
6Lan pa’lak nanii unnala kande, sia urruruk bua anggoro’ nasala tau.
7Ma’kale-kale bang ma’bongi, belanna tae’ tu tamangkalena, tae’ pennammu’na natampangan dingin.
8Tu makuyu nauranni dao mai tanete, sia belanna tae’ tu pentiongannanna mella’ka’mi lako buntu batu.
9Den tu to ussintakki pia biung dio mai susunna indo’na sia matampo lako to makario-rio.
10Male bang ma’kale-kale, belanna tae’ tamangkalena, ullemba uyunan gandung anna mangelo bang sia.
11Dio alla’na da’dua kalada’ nanii tu tau iato umparra minna’ sia nalullu’ tu bua anggoro’ lan pa’parran anna ia kalena ma’rang tongan.
12Lan mai kota nanii kendek tu sarro pekaindo’na to la mate sia penaanna to bangke metamba umpalaku pa’tunduan, apa tang Napalan penaa Puang Matua tu passambayangna.
13Iatu to senga’ sangbilangan ualinna masiang, tae’ natandai tu batattaNa sia tae’ natorro dio lalanNa.
14Iake la berre’i allo ke’de’mi tu to papatean sia napatei tu to makario-rio sia mase-mase, sia iake bongi susi bang misa’ to boko.
15Iatu matanna to pasandak salu lako rampanan kapa’ umpeagi bongi kasisalan tau, natangnga’ nakua: Da natirona’ tau, sia natampun tu lindona.
16Iake malillinmi nalo’po tu banua tama, iake masiangi untutu’i ba’ba kalena, tae’ namorai sitandan masiang;
17belanna iatu mintu’ tau iato, iatu lillinan parrak napasusi melambi’, belanna sialamo pa’patirambanna lillinan parrak.
18Matira’ tu tau iato unnaang dao to’ uai, narua tampak ropu tu taa mana’na lan tondok, tae’ namale lu langngan buntu nanii pa’lak anggoro’.
19Susito pealloan sia kamalassuan unnamma’ ambun makko, anna pa’de, susi dukato tu lino to mate unnampello’ to kasalan.
20Iatu pa’tambukanna indo’na tae’mo nakilalai tu tau iato, sia napokande mammiran ulli’, tau iato tae’mo tau unningaranni, iatu kakelokan dilelleng susito misa’ kayu.
21Minda-minda tu umpakario-rio to tamanang tu to tang kianak anna alai tu apanna sia tang umpatiroan pa’kamasean baine balu,
22sia moi to matoto’ nariu’ sembang tete dio kamawatanganna; bendan tu tau iato, apa tae’ nakanassai tu katuoanna.
23Puang ungkarimmanni kamarampasan tu tau iato, anna posanderanni sia matanNa Puang ummanta-mantai tu lalanna.
24Sangattu’ri umpamadao kalena anna pa’demo, mempi’di sia madodong susitu mintu’na apa dadi, la dika’ta’ susito sangbuli gandung.
25Iatu iannate, ke tae’i nasusito, mindara barani umpamanassai kumua buttokna’ sia ma’kada kumua tang kebattuan tu kadangku?