Dual PanelPebali ma’pentallunna Ayub lako Bildad, nakua: Mindara ma’din untandai tu kapasareongananNa Puang Matua?
1Apa mebali tu Ayub nakua:
2Lendu’ tongan melona tu pa’tulungmu lako to malamma’ sia untulak takia’ to tang pa’bela!
3Lendu’ tongan melona tu pa’pakilalammu lako to sisayuran kakinaan, sia lendu’ tongan kapuanna tu kapaissanan tu buda tongan mupokadanni!
4Mindara pa’tunduan ammu sa’bu’i tu kada susito, sia mindara penaa tu tassu’ dio pudukmu?
5Ma’parondo tu bombo tomate diong to’ uai, sia to umpa’tondokki inan iato.
6Iatu lino tomate tibungka’ lako Puang sia iatu bambana mukkun tae’ sambona.
7Nae’te’ tu rampe daanna lu daona lu apa tang tibori’pa, Natoke’ tu lino dao apa tae’.
8Napori tu uai anna sirampun lan salebu’Na, natae’ natessei uai iato tu lapik salebu’.
9Nasaludungi tu isungan kapayunganNa, natae’ napaan, belanna Nasamboi salebu’Na.
10Natarik tu malepongna dao to’ uai, sae lako passaparanna masiang anna malillin.
11Tirodan tu lentongna langi’ sia tiramban napobua’ pa’garrakNa.
12Naparapa’ tu tasik tete dio kamatotoranNa, sia Napessambakan tu Rahab tete dio kamanaranganNa.
13Tete dio penaanNa namasero tu langi’ sia limanNa urrokki tu ula’ naga malinta’.
14Manassa iatu iannato tampakna manna tu lalanNa, sia ia manna tu kada pa’bisikNa tarangi dio mai Puang. Mindara ma’din unnattai tu gumalugunna kamatotoranNa?