Dual PanelSiumpu’na kada ma’katampakanna Ayub, iamotu diona kamauparan sia kamala’biran tonna dolona
1Napatarru’mi Ayub umpokadai tu kada peada’na, nakua:
2A’a, kengku susiopara tonna bulan dolo, susi tonna allo nanii Puang Matua ungkaduttu’na’;
3tonna padukkui Puang tu lampunNa dao ulungku, naarrangna’ tu dukkunNa tongku lumingka lan kapittukan;
4susi tongku potendengpa tendengku, tonna kadamakpa’ Puang Matua lan tendaku;
5tonna rondongpa’ To umpoissan angge maritik, sia iatu mai anakku denpa untikuina’;
6tongku lumingkapa lan to’ dadi’, anna iatu buntu batu kusikandappiran umpatibollomo salu’-salu’ minna’.
7Iake tassu’na’ lako to’ babangan kota, angku mesua umbaai tu isungangku lako tana lapang,
8manassa membuni tu pia muane, ke natirona’, na iatu to matessek ke’de’ anna bendan bang.
9Iatu mai arung natoreimo ma’kada sia untampunmo pudukna;
10iatu gamara to la’bi’ tang dirangimo sia iatu lilana la’ka’mo langngan langi’-langi’na;
11iake narangimi tau tu kadangku, natendengna’ kumua maupa’, iake natirona’ tau, nasa’bu’na’ kumua to melo.
12Belanna kulendokan dio mai kamasussan tu to makario-rio metamba umpalaku pa’tunduan, tu pia biung sia to tae’ patunduanna,
13nasa’buranna’ pa’palakunna to sidi’mora namandasa, kumua angku dipamasakke sia iatu penaanna baine balu kupopela’tek-la’tek;
14umpotamangkalena’ kamaloloan, sia gau’ maloloku kupobayu lamba’ sia kupopassapu;
15napomatana’ to buta sia napolette’na to keppang;
16napoambe’na’ to kalala’ sia iatu kara-karana to tang kutandai kuparessa duka;
17kusanggang tu buangna to leko’ penaa sia kusintakki tu kandena lan mai to’ isinna.
18Kutangnga’ kumua: Situangna’ serangku la sule lako tampa rapa’ku sia urranganni alloku susito manuk-manuk penik.
19Iatu uaka’ku ullambi’ uai sia ma’bongi tu ambun dio tangkeku.
20Iatu kamala’birangku tontong ba’ru ussisolanna’, sia iatu panaku memba’ru lan limangku.
21Naperangiina’ tu mai tau sia ma’peagi, ma’pakappa tu tau umperangii tu pa’pakilalangku.
22Iake mangkamo’ ma’kada, moi misa’ tau tae’mo umbuang kada, sia iatu kadangku tontong to’do lako tau iato.
23Napeagina’ tau susito ungkamali’ uran sia umpopenganga sadangna susito ungkamali’ uran tampak.
24Iake metaana’ lako, tanggan napatongan, apa iatu arrang lindoku, tae’ nakullei umpamalillinni.
25Iake naalai penaangku male untollongi unno’ko’na’ dio to’ inan melo, unnisungna’ susi misa’ datu dio lu to’ to buda, susi misa’ to umpakatana to mario-rio.