Dual PanelKasumarroan mapai’na Ayub
1Mangkato umpatiku’bi’mi pudukna tu Ayub anna tampakki ropu tu allo kadadianna.
2Naparandukmi tu Ayub ma’kada nakua:
3La sabu’ tu allo kunii dadi; iatu bongi, tu ma’kada nakua: Mangkamo didadian tu misa’ pia muane.
4Kenna pittukora tu allo iato, da Napekutananni Puang Matua dao masuanggana tu iannato, da naarrangi masiangna.
5Kenna poapa ori kamalillinan sia kapittukan tu allo iato, kenna situtu’iori salebu’ makamban, anna patirambanni bosinna allo.
6Bongi iato la naputtai kamapittukan, da naparannu dio lu mintu’ allo lan sangtaun, da nasangbilangan mintu’ bulan.
7Kenna tamanangora tu bongi iato; da naden arrak kaparannuan lan.
8Kenna tampakkiori ropu to ma’tampak ropu allo, sia to manarang umpatiakka’ Lewiatan.
9La dipamalillin tu mai bintoen, ke tilalekki masiangna tu allo iato; la napeagi bang tu masiang, apa da nasae, da natiroi tu bulu mata katilalekanna masiang,
10belanna tae’ natutu’i tu ba’ba pa’tambukanna indo’ku sia tae’ nabunii dio pentiroku tu kamasussan.
11Ma’apai natae’ kumate tongku dadi, anna tae’ naka’tu tu sunga’ku tonna tibussananna’ indo’ku?
12Ma’apai napeagina’ pangrian, ma’apai napeagina’ susu, angku ma’din ma’susu?
13Ianna susito la mamma’na sia ma’pakari’pina’, sia la matindona’, angku rapa’
14sisola tu mai datu sia pa’bisaranna tondok, tu umpabendanan kalena sule apa daun lauan,
15ba’tu sisola tu mai arung, tu sugi’ bulaan, tu umpangannai salaka banuanna.
16Ba’tu ma’apai anna tae’ angku dadi mangura, tu ditanan, susitu pia’-pia’ tu tang untiropa masiang?
17Dio tu nanii to tang mekaaluk untorroi kamarukkan, inde to nanii melayo tu to tang mabukumo.
18Indeto nanii rapa’ tu toditarungku, tae’ narangii tu gamaranna pangarak.
19Tobitti’ sia tokapua pada bang sia dio, sia iatu kaunan to makakamo dio mai puangna.
20Ma’apai Napatiroanni masiang tu to mandasa, sia katuoan lako tu to rosso tongan penaanna?
21Tau iato umpeagi bang kamatean, apa tae’ nasae, nabo’bok tongan losong na iatu ianan membuni.
22Parannu-rannu tongan sae lako unnarrak-arrak, ke nakabu’tui tu lamunan.
23(Ma’apai Napatiroan masiang) misa’ tau, tu kabunian lalanna, sia iatu Nalontok Puang Matua mintu’ lalanna tu la naola ullendokan kalena?
24Belanna dipasondana rotingku tu pekaindo’ku, sia iatu sarroku tibarrak susito uai.
25Belanna iatu apa kukataku’, iamo urrampoina’, sia iatu apa kukagiang, iamo urruana’.
26Tae’ kumanaman, tae’ kumari’pi, sia tae’ duka kurapa’, sangadinna narampoina’ karanggangan.