Dual PanelUpu’na kada ma’katampakanna Ayub, iamotu tampakna nanii umpamanassai kumua tang kasalan
1Siallu’mo matangku, umbara kukua umpenniroi misa’ anak dara?
2Belanna apara tu taa Napamanassa Puang Matua dao mai madaona, sia taa mana’ Nalampak To umpoissan angge maritik dao mai masuanggana?
3Tangiaraka kasanggangan tu taana to leko’ sia tangiaraka kamandasan tu taana to umpogau’ kakelokan?
4Tae’raka Napenunui Puang tu lalanku sia tae’raka Naia’i tu mintu’ tengkaku?
5Iangku kamorang-morang len ba’tu matira’ tu lentekku umpogau’ pa’pakena,
6la Natimbangna’ Puang dio timbangan tongan, manassa Naaku Puang Matua, kumua tae’ angku sala.
7Ianna sumepang tu tengkaku dio mai lalan tongan, sia iatu penaangku unturu’ kamailuanna matangku, sia iake denni kadisayuan le’ke’ dio limangku,
8elo’namo na iatu apa kuambo’ nakande to senga’, na iatu apa dipabu’tuanna’, elo’namo nadilampi’i situang uaka’!
9Iangku turu’ pa’naran penaangku lako misa’ baine, sia kuodo’ dio to’ ba’bana solaku,
10elo’namo na to senga’ napa’lambukan baineku, sia elo’namo na to senga’ urraka’i.
11Belanna iatu iannato penggauran mesirisan, ondongpi misa’ kakelokan sipatu naukung to ma’paolai salu.
12Manassa iatu iannato susito misa’ api ma’kande pura sae lako sanggangna sia ulletta’i tu bura ra’ta’ku.
13Iangku tang umbilangi katongananna kaunanku muane sia kaunanku baine, ke sisalana’ tu tau iato,
14apa tu sipatu la kupogau’, ke tunannangi tu Puang Matua ma’penniro sia iake ma’paressal, apa tu sipatu la kupebalian lako?
15Iatu Puang umpadadina’ lan pa’tambukanna indo’ku, tang Napadadi dukaraka tu tau iato? Tang Misa’raka tu to ungkombongki’ lan pa’tambukanna indo’ta?
16Iangku tang umpasiolai len palakunna to bitti’ sia umpabussu mata baine balu,
17ba’tu ussuak misa kandeku, anna tae’ nakandei pia biung pira
18– ondong pissan tempon mangurangku kupelobo’i, susina’ to misa’ ambe’ sia tempon dio mai’ pa’tambukanna indo’ku kunii ungkaduttu’i tu pia baine biuns-
19ianna den len misa’ to salamba salao kutiro tang ma’tamangkale sia misa’ to mase-mase tang mennammu’;
20ianna tae’ napassakkena’ aakna sia tae’ napemalassui bulu dombaku tu kalena,
21iangku pata’pai lenni lima tu pia biung, belanna kutiro tu to untunduina’ lan babangan,
22iake susito, elo’namo natantang tu palempengku dio mai lesokanna sia le’to tu buku lampa takia’ku.
23Belanna napatirambanna’ tu kamandasan Napamanassa Puang Matua; sia tete dio kapasareongananNa angku tang ungkullei umpogau’ misa’ apa.
24Ianna bulaan kurannuan, sia ma’kadana’ lako bulaan tasak, kukua: Iko tu sanderangku;
25iangku parannumo, belanna makambanmo tu iananku sia iatu bura rangka’ku kuposugi’ lallangmo;
26iangku penunumo mata allo, ke parrangmi, sia iatu bulan, ke lumilingi nakabu’ kamala’biran,
27naurungan iatu penaangku dinaran buni, sia limangku unnudung pudukku,
28manassa iatu iannato misa’ duka kakelokan, sipatu naukung to ma’paolai salu, belanna kupeonganni tu Puang Matua dao masuanggana.
29Iangku parannu diona kamandasanna to ungkabiri’na’ sia mela’tek ke narampoi kamatilakan,
30– tonganna tae’ kueloranni tu pudukku kasalan, belanna kugatai kumua namats-
31iannato kusisolan lan tenda tang ussa’biina’, kumua: Mindara tang dipedia’i duku’na?
32– moi misa’ to tama sae tae’ ma’bongi dio salian, iatu ba’baku kubungkaran to lumios-
33iangku samboi tu kapatodo-tintingangku susi Adam, belanna kubuni tu salaku lan ara’ku,
34belanna ungkataku’na’ to buda, sia napatirambanna’ kadipamatunan dio mai to ma’rapu, kuurungan ma’pakappa sia tang tassu’ lan mai ba’ba!
35A’a, kenna den siamo misa’ tau umperangiina’! Tiromi inde sia tu tanda bate limangku-dennoupa’ Napebaliina’ To umpoissan angge maritik, sia ia duka tu sura’ tu nasura’ balingku.
36Manassa iatu iannato la kupadao palempengku, sia kupomakota dao ulungku.
37Iatu mintu’ tengkaku la kupoissan dio oloNa Puang, la kureke’ tu Puang butung misa’ datu.
38Ianna sarroina’ pa’pa’lakangku sia sitangiran tu mai kalo’na;
39iangku peburai anna tae’ kubaya’i tu to sumaro sia kupamapa’di’ penaa tu puangna,
40iake susito, elo’namo naduri tuo ussonda gandung, sia sirope ussonda dalle sisikan. Upu’mo tu kadanna Ayub.