Dual PanelKada ma’penna’pa’na Elihu, nakua: Iatu kamandasan ma’toba umpatu kamengkatobaran
1Napatarru’mi Elihu ma’kada nakua:
2Kampaipa’ sattu’, angku ada’ikomi, belanna denpa ba’tu pira-pira tu kada la dipokada dioNa Puang Matua.
3La kuala mambela tu kapaissanangku sia la ussanda tonganni To tumampaku;
4belanna tonganna iatu kadangku tae’ natang kebattuan, iatu tau situang pa’inaan bendan dio tingayomi.
5Manassa pasareongan tu Puang Matua, apa moi misa’ apa tae’ tang Naangga’, kapua tongan tu kamandalananna tangnga’ kakinaanNa.
6Tae’ Napopa’elo’nai tuo tu to tang mekaaluk, apa Nasanda tonganni tu to dipakario-rio;
7tae’ Natampunanni mata tu to malambu’, sangadinna Napaunnisung dao isungan kapayungan sola datu, naurungan matande tongan.
8Apa iake dipungoi rante bassi, sia dipumpung pepori kamandasan,
9Napakilalami tu penggauranna, sia iatu kapatodo-tintinganna, belanna unturu’ bang kamatampoan,
10sia Nabungka’ tu talinganna tau iato anna perangii tu pangadaran, sia Nasua mengkatoba’ dio mai kakadakean.
11Iake ma’perangii sia mengkaola tu tau iato, sipeupu’ allo katuoanna sikambi’ kamauparan sia sipeupu’ taun kadadianna siria karongkosan.
12Apa, iake tang ma’perangii, namangsanni kandean doke sia ka’tu sunga’na lan katangpaissananna.
13Apa iatu to bulituk umpasipapa’ kasengkean; tae’ nameongli’ umpalaku pa’tunduan, ke Napungoi Puang;
14ka’tu sunga’na, ke mangurapi, sia pada tang marendeng muane bualang.
15Tete dio kamandasanna Narampananni Puang tu to mandasa, sia tete dio kadipakario-rioan Nabungka’i tu talinganna.
16Susimoto tu Puang unnarankomi lan mai sadang kamaparrisan lu lako padang malona’, tu tae’ anggenna, sia lako medamu, tu munii kumande manaman sia ponno kande sanda malompo.
17Apa sipatu tongankomi narampoi tu ukungan urrua to tang mekaaluk, ukungan sia pa’pandasa untoe manda’komi;
18da na iatu kasengkean umbaakomi ma’telle-telle sia da napasepangkomi pangla’bak masuli’ dio mai lalan malolo.
19Ma’dinraka tu kasugirammi la pada timbang tu iannato, ke tae’i nasola kamaparrisan, ba’tu mintu’ pakullena kamatotorammi?
20Da mianga’i tu bongi, tu nanii ke’de’ mintu’ bangsa dio mai inanna.
21Kanandai, da milulako kakadakean, belanna iamo napobannang to narampoikomi kamandasan.
22Manassa iatu Puang Matua mala’bi’ tu penggauranNa situang kamatotoranNa; mindara misa’ to mangada’ susi Puang?
23Mindara umpadulluanNi lalan, sia mindara barani ma’kada, kumua mangkamoKomi umpogau’ tang malambu’?
24Kilalai ammi pakala’bi’i tu penggauranNa, tu napudi to lino lan penanian.
25Mintu’ tolino umpemarangai sia ma’rupa tau untiro mambelai.
26Manassa iatu Puang Matua pasareongan, sia tang nalambi’ paissanta, tang dikemba’ diia’ tu taun umuru’Na.
27Belanna Naangka’ Puang langngan tu damo’, anna dipamakamban tu salebu’ dadi uran,
28tu napatibollo-bollo gaun sia napato’doan mintu’ tau.
29Sia minda dukara untandai katiballaranna salebu’ sia iatu oni gumaluntu’Na tu tassu’ lan mai tendaNa Puang?
30Manassa Puang umballa’ arrangNa dao salebu’ sia ussamboi mandalanna tasik diong.
31Belanna iamoto Nanii Puang unnukungi tu mintu’ bangsa sia Napaseboan kande Puang.
32Nasamboi kila’ mellepa’ Puang tu limanNa patomali, sia Napasan ussiok to palaoan.
33Iatu arrakNa umpa’peissananni, kumua saemo tu Puang, Napengkulleimi unnea pa’pakario-rio situang kare’dekan ara’Na.