Alkitab Mobile SABDA
[VER] : [TORAJA]     [PL]  [PB] 
 <<  Ayub 7 >> 

Siumpu’na pebali bunga’na Ayub lako Elifas, kumua mandu masussa tu katuoanna tolino

1Tang mandu mara’ta’raka tu tolino dao kuli’na padang, tang susiraka allona tosumaro tu katuoanna?

2Susitu misa’ kaunan ungkamali’ pentionganan, ba’tu susi misa’ to sumaro umpeagii tu sarona.

3Susi dukato tu aku dipaketaa kamaparisan pirang-pirang bulan, sia dipapatuanna’ kamandasan pirang-pirang bongi.

4Iake malena’ mamma’ kutangnga’ kumua: Piranra kula millik? Apa malambe’ tu bongi, angku mosomo membaliang-liang sae lako tilalekna masiang.

5Iatu kaleku nasitutu’imo ulli’-ulli’ sia tikkurrung-kurrung tu kuli’ku, sia iatu kuli’ku massendang-sendang sia ma’nana.

6Kamatirasanna alloku losong anna panikuan, sia madomi’ sae lako upu’na sia tae’ tu dirannuan.

7Kilalai iatu katuongku sangpenaanri; sia iatu matangku tae’mo nala untiroi tu melona.

8Minda-minda umpata’paina’ mata, tae’mo nala untirona’; mipapatuimo’ matammi, apa ta’demo’.

9Susito gaun pa’demo sia sumayo-mayo male kabu’, susi duka tu minda-minda mengkalao rokko lino tomate, tae’mo nakendek sule.

10Tae’ lenmo nasule lako banuanna, sia tang natiromo tu inan katorroanna.

11Apa totemo ia duka tu aku tang kupadapamo tu lilaku, sangadinna la ma’kadana’ lan kapussakan penaangku, sia la sumarrona’ lan kamapairan deatangku.

12Susira’ka tasik ba’tu naga tasik, amMi padenanna’ toma’kampa?

13Iake kutangnga’i, kumua iatu inan kamammarangku la umpakatanana’, sia iatu katindoangku umpamaringan sarroku,

14attu iato Mipatirambanna’ pangimpi sia Mipamataku’na patiro mendeata,

15naurungan kupalosongmo tu susito la dikalessek, sia kupalosongmo tu la mate na iatu kamaparrisangku.

16Namosomo’, tae’mo kula tontong tuo. Rampanammo’, belanna iatu alloku sangpenaanri.

17Apa todara ia tu tolino, amMi sangari tarompo’ tongan, Miurungan umpariba’tangi.

18AmMi paressai, ke melambi’oi, sia Misudi lan mintu attu?

19Sangapaporokomi la umpatampeina’ mata, amMi rampananna’, kuurungan ma’din unnamma’ elo’ku?

20Iake kasalammo’, la kupatumbari tu Puang, To umpenunu bang tolino? Ma’apari Mipapatui bangna’ passandaMi, naurungan kupomagasamo tu kaleku?

21Ma’apari amMi tang umpagarri’ri tu kapatodo-tintingangku? sia ma’apari amMi tang umpa’dei tu kakelokangku? Belanna madomi’na’ sumpandan lan to’ barra’-barra’; attu iato la Midaka’na’, apa ta’demo’.


  Share Facebook  |  Share Twitter

 <<  Ayub 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel