Dual Panel1Ma’kadami tu Bileam lako Balak nakua: Pabendananna’ pitu inan pemalaran inde te sia parandananna’ pitu sapi laki sia pitu domba laki inde te.
2Napogau’mi Balak susitu napokada Bileam, anna pemalaranni Balak sola Bileam tu misa’ sapi laki sia misa’ domba laki, ke misa’oi inan pemalaran.
3Mangkato ma’kadami tu Bileam lako Balak nakua: Malekomi bendan dio to’ pemala’ ditunu pu’pu’mi, angku male; umbai la sae tu PUANG umpessitammuina’, sia apa tu Napamanassanna’, iamoto la kupa’peissannan lako kalemi. Attu iato tuka’mi langngan misa’ tanete karing.
4Saemi tu Puang Matua umpessitammui Bileam, nama’kada tu Bileam lako nakua: Mangkamo kuparandan tu pitu inan pemalaran, simisa’ inan pemalaran misa’ sapi laki sia misa’ domba laki kupemalaran.
5Napatamami PUANG tu misa’ kada dio pudukna Bileam, Nama’kada Nakua: Sulemoko lako Balak, ammu ma’kada susite.
6Iatonna sulemo lako, bendan bangsiapa tu Balak dio to’ pemala’ ditunu pu’pu’na, la ia la iatu mintu’ arungna Moab.
7Naparandukmi tu Bileam umpokadai tu kada peada’na, anna ma’kada nakua: Dio mai Aram, nanii ussolanna’ Balak, datunna Moab, dio mai ma’buntunna rampe matallo, nakua: Malekomi mai, mitampakanna’ ropu tu Yakub, sia malekomi mai ullangdo Israel.
8Umba la kukua untampakki ropu, anna tau iato tae’ Natampakki ropu Puang Matua? Umba la kukua ullangdoi, anna tau iato tae’ Nalangdoi PUANG?
9Belanna dao mai potok buntu batu kunii untiroi, sia dao mai tanete kunii umpenunui. Kutiro misa’ bangsa, tu torro misa sia tae’ nasangai sangbilangan dio lu bangsa senga’.
10Mindara ma’din umbilangi tu barra’-barra’na Yakub sia mindara unnia’i kabudanna Israel? Kumatemora susitu kamateanna to bulo lolong sia iatu lampakku la susi duka tau iato!
11Ma’kadami tu Balak lako Bileam nakua: Apara tu mupogau’? Kutambaikomi la untampakki ropu tu ualingku, ammi ma’passakkeora.
12Apa mebalimi nakua: Iatu aku, tae’ kutang la umpokada tonganna susitu apa Napatama PUANG dio pudukku.
13Ma’kadami tu Balak lako nakua: Tamale pole’ sola lako inan senga’, tu minii ma’din untiroi (tu tau iato mai); tampakna manna la mitiro tu tau iato, apa iatu mintu’na tae’ mitiroi; na inde to minii untampakanna’ ropu tu tau iato.
14Nasolammi lako padangna To ma’penunu, langngan bottona Pisga, napabendanmi pitu inan pemalaran, anna pemalaranni tu misa’ sapi laki sia misa’ domba laki, ke simisa’o inan pemalaran.
15Anna ma’kada lako Balak nakua: Malemokomi bendan inde te to’ pemala’ ditunu pu’pu’mi, angku dikamasei kasitammuan inde to dio.
16Sitammumi PUANG tu Bileam, anNa patamai pudukna tu misa’ kada, anNa ma’kada tu Puang Nakua: Sulemoko lako Balak, ammu ma’kada susite.
17Iatonna sulemo lako, bendan bangsiapa tu Balak dio to’ pemala’ ditunu pu’pu’na sisola tu arungna Moab. Ma’kadami tu Balak lako nakua: Apara tu Napokada PUANG?
18Naparandukmi tu Bileam umpokadai tu kada peada’na anna ma’kada nakua: Ke’de’komi, o Balak, sia perangii; tanannina’ talinga, e anakna Zipor.
19Iatu Puang Matua tangia tolino, anNa ma’kada tang tongan; ba’tu misa’ ma’rupa tau, anNa menassan. Ma’kadaraka anna tang umpogau’i, ba’tu mangallu’, anNa tang umpadadii?
20Manassa dibenmo’ parenta la ma’passakke sia iake Puang ma’passakke, umba la kukua undampai.
21Tae’ napenunui tau tu kamandasan dio lu Yakub, sia tae’ natiroi tu kasanggangan dio lu Israel. Iatu PUANG, Kapenombanna, urrondongi, sia arrakna to untendeng Datu den dio lu tau iato mai.
22Puang Matua, tu ussolanni lan mai Mesir, Iamo napomatoto’ butung to tanduk sapi laki lampung,
23belanna tae’ gai’na tu kada la ullangdo Yakub, sia pa’basa-basa la dinii unnea Israel. Totemo melo ke dipokadai tu diona Yakub sia diona Israel apa tu la Napogau’ Puang Matua.
24Tiromi, misa’ bangsa tu bendan butung to misa’ singa birang, sia tunannang butung to misa’ singa laki, tu tae’ nabambangan kalena, ke tae’pi nakande pealanna sia unniru’ rara to mate tibambang.
25Ma’kadami tu Balak lako Bileam nakua: Iake tonganna tae’ miporai untampakki ropu tu tau iato mai da pissanmo mipassakkei.
26Apa mebali tu Bileam nama’kada lako Balak nakua: Tae’raka kupokadangkomi, kumua: Mintu’na apa la Napokada PUANG, iamoto tu la kupogau’?
27Ma’kadami tu Balak lako Bileam: Malekomi mai, angku solangkomi lako inan senga’; umbai nasipatu sia dio pentiroNa Puang Matua, na inde to dio mai minii untampakanna’ ropu tu tau iato.
28Nasolammi Balak tu Bileam langngan bottona Peor, tu nanii untiroi tu Padang aak.
29Ma’kadami tu Bileam lako Balak nakua: Pabendananna’ pitu inan pemalaran indete sia parandananna’ pitu sapi laki sia pitu domba laki indete.
30Napogau’mi Balak susitu mangka napokadanni Bileam, sia napemalaran tu misa’ sapi laki sia misa’ domba laki, ke misa’o inan pemalaran.