Alkitab Mobile SABDA
[VER] : [TORAJA]     [PL]  [PB] 
 <<  Bilangan 6 >> 

Atoran diona nasirinNa PUANG Matua

1Ma’kadami tu PUANG lako Musa, Nakua:

2Ma’kadako lako to Israel sia kuanni kumua: Iake den misa’ tau, muane ba’tu baine, mangallonan ma’iringanna, iamotu mangallonan la dadi nasirinNa Puang Matua, la umpamarimbangan kalena lako PUANG,

3manassa la untoyangan kalena dio mai uai anggoro’ sia pangiru’ mepamalango, sia da’ nairu’i tu uai anggoro’ messu’mo ba’tu pangiru’ mepamalango tu messu’mo, sia da’ nairu’i moi misa’ pangiru’ dio mai bua anggoro’ sia da’ nakandei tu bua anggoro’ la tang marangkena la marangkena.

4Lan mintu’ attu nanii nasirinNa Puang Matua da’ nakandei tu misa’ apa dio mai garonto’ anggoro’ randuk dio mai lise’na sae lako taru’-taru’na.

5Lan mintu’ attu nanii mangallonan nasirinNa Puang Matua, tae’ na la urrampoi piso peku’ku’ tu ulunna; sae lako ganna’na tu allo nanii umpamarimbangan kalena lako PUANG, la masero sia la naeloran bang tu beluakna tuo.

6Lan mintu’ attu nanii umpamarimbangan kalena lako PUANG, da’ nareke’i tu to mate.

7Da’ naruttakki kalena, ke untoei batang rabukna ambe’na ba’tu indo’na, ba’tu siulu’na muane ba’tu siulu’na baine, belanna iatu tanda nasirinNa Puang Matua dao ulunna.

8Lan mintu’ attu nanii nasirinNa Puang Matua, la masero dio oloNa PUANG.

9Apa iake den misa’ tau mate tang dikapang-kapang dio sa’dena, anna ruttakki tu beluakna, tanda nasirinNa Puang Matua, la naku’ku’i tu ulunna, ke allo kadipamaseroanna, ke allo ma’pempitu la nanii ungku’ku’i.

10Ianna allo ma’pengkarua la nabaa tu da’dua bu’ku’ ba’tu da’dua anak dangan-dangan lako to minaa dio to’ ba’ba Tenda Kasitammuan.

11La napemalaran to minaa tu misa’ diposuru’ pengkalossoran na iatu senga’na la dipopemala’ ditunu pu’pu’, anna padenanni kadiseroian kasalan, belanna kasalan untoe batang rabuk, anna allo ia dukato la nanii umpamasero ulunna.

12Anna pamarimbanganan polei PUANG tu attu nasirinNa Puang Matua, anna pennoloanni tu misa’ domba sangtaunmo la diposuru’ pangakuan sala; iatu attu dolo tang la dibilangmo, belanna iatu Kanasirinna maruttakmo.

13Inde sia tu atoran diona nasirinNa Puang Matua, Iake ganna’mi tu allo nanii kanasirianna, manassa la disolan lako to’ ba’ba Tenda Kasitammuan,

14sia la napennoloan lako PUANG tu pemala’na, iamotu misa’ domba sangtaunmo tu tang tattan la dipopemala’ ditunu pu’pu’ sia misa’ domba birang sangtaunmo tu tang tattan la diposuru’ pengkalossoran sia misa’ domba laki tu tang tattan la dipopemala’ kasalamaran,

15sola misa’ baka nanii roti tang diragii, tu ta’pung manisak digaraga, sia pa’ranggina dipasigerok minna’ sia roti manipi’ tang diragii, tu disapu’ minna’ sola kande dipemalaran tu tontong dipasisola sia iatu pemala’ pantedok dipasisolanni.

16La napennoloan to minaa tu iannato dio oloNa PUANG, anna pemalaranni tu suru’ pengkalossoranna sia pemala’ ditunu pu’pu’na.

17Mangkato la napemalaran tu domba laki dipopemala’ kasalamaran lako PUANG sisola tu baka nanii roti tang diragii; la napemalaran duka to minaa tu kande dipemalaran tu tontong dipasisola sia iatu pemala’ pantedok dipasisolanni.

18Naku’ku’imi to nasirinNa Puang Matua tu beluak tanda nasirinNa Puang Matua dio tingngo ba’ba Tenda Kasitammuan, anna alai tu beluak tanda nasirinNa Puang Matua, nabuangi tama to’ api, diongna lu pemala’ kasalamaran.

19La naala to minaa tu sepak dolona domba laki iato, tu mangka ditollo’ sia misa’ deppa tang diragii lan mai baka, sia misa’ deppa manipi’ tang diragii, anna parokkoi pala’na to nasirinNa Puang Matua, ke mangkami naku’ku’i tu beluak tanda nasirinNa Puang Matua.

20Mangkato la nasorong natarima sule to minaa te ianna te dio oloNa PUANG susi pemala’ disorong ditarima sule; iamote tu maserona napotaa to minaa sola tu dada disorong ditarima sule sia pesesena tu dipamarimbangan. Mangkato namane ma’din unniru’ uai anggoro’ tu to nasirinNa Puang Matua.

21Iamote tu atoranna to nasirinNa Puang Matua. Iatu apa napopangallonan la napemalaran lako PUANG tete dio nasirinNa Puang Matua, senga’pi tu ma’din napemalaran la’bi, la napogau’. La napogau’ tu iannato, susitu allu’na unturu’ atoranna nasirinNa Puang Matua.

Pa’passakkena to minaa

22Ma’kadami tu PUANG lako Musa, Nakua:

23Ma’kadako lako Harun sia lako anakna, mukua: Susimote tu kada la mipassakkean to Israel:

24Na PUANGmora umpamasakkekomi sia ungkatirinnaikomi;

25na PUANGmora umpaarrangikomi lindoNa sia ungkaturu-turuikomi;

26na PUANGmora umpatiroangkomi lindo masokanNa sia umpasiriakomi kamarampasan.

27Susimoto iatu sangangKu la napatorro dio lu to Israel, angKu pamasakkei tu tau iato mai.


  Share Facebook  |  Share Twitter

 <<  Bilangan 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran