Dual Panel1Apa bendanna’, tonna taun bunga’na parentana Darius, to Media, dadi misa’ to patunduanna sia pentilindunganna.
2Totemo la kupokadangko tu kamanapparan. Manassa tallupa tu datu la bendan lan Persia na iatu to ma’penna’pa’na la kapuapa kasugiranna na iatu mintu’ senga’na, sia iake matoto’mi tete dio kasugiranna, la napatiangka’ tu mintu’na ullaoi tu kadatuan Yunani.
3Sia la bendan misa’ datu lalong, tu la kapua kaparentanna sia la umpogau’ lalan inaanna.
4Apa mane bendan, nata’pa la dipokamo tu kadatuanna, sia ditaa lako a’pa’ mata angin dao langi’, apa tae’ nalako bati’na, sia tae’ nakuasa susito mangkanna natoe, belanna iatu kadatuanna la disialai sia tobang lako to senga’, tangia tau iato mai.
5Attu iato la matoto’ tu datu rampe Lo’na lu, apa misa’i tu kamandangna la mandu matoto’ na ia sia la ma’parenta; sia iatu lili’ parentana la misa’ lili’ parenta kapua.
6Ba’tu pirang-pirang taun undinnato la sibassemi sola duai; iatu anakna baine datu rampe Lo’na lu la sae lako datu rampe Daanna lu la sitama, apa tae’ nala untoe manda’i tu kamatotoranna kuasanna, sia tae’ duka nala bendan matoto’ tu kuasanna datu rampe Daanna lu; iatu baine iato la ditibe, susi dukato tu to nasolan, sia iatu to padadianna sia iatu to umpobainei.
7Attu iato la tuo tu misa’ taruk dio mai uaka’na dio to’ inanna sia la male ullaoi surodadunna sia la tama bentengna datu rampe Daanna lu, anna palulun to patalo.
8Ondongpi, sae lako rapang-rapang dipodeatanna sola rapang-rapang dipodeata dipati’no’na sia pareanan keangga’na, iamotu salaka sia bulaan, la nabaa lako Mesir butung pangrampa; sia ba’tu pirang-pirang taun tae’ nala sirari datu rampe Daanna lu.
9Mangkato iatu datu rampe Daanna lu la male ullaoi kadatuanna datu rampe Lo’na lu, apa inang la diparuku sule lako tondokna.
10Na iatu mai anakna la ma’pasakka’ parari sia la urrampun ba’tu pira-pira tuntunan surodadu kamban; namisa’i tu la male ullaoi datu rampe Daanna lu, sia samasai-sainna ma’parekan susi to uai saba’, sia tonna torroi naparandukomi palaoan sae lako bentengna.
11Namapalla tu datu rampe Lo’na lu anna tassu’ sirari datu rampe Daanna lu, na iatu datu rampe Daanna lu la urrampun surodadu makamban, apa iatu surodadu makamban iato la disorong tama limanna.
12Iatonna roto’imi tu surodadu makamban iato, la napakapuamo tu penaanna; moi anna patei ma’pulo-pulo sa’bu, apa tae’ duka namatoto’.
13Na iatu datu rampe Daanna lu la urrampun poleomi surodadu makamban, mandu buda na iatu dolona, sia iatonna lendu’mo ba’tu pirang-pirang taun, la malemi ullaoi umbaa surodadu makamban sia parea kamban.
14Attu iato buda tu tau bendan la pabali-bali lako datu rampe Lo’na lu; sia den duka tu mai to masa’ga’ dio mai bangsamu la umpatarompo’ kalena, la umpalanda’i tu misa’ patiro mendeata, apa iatu tau iato mai la songka.
15Sia la sae tu datu rampe Daanna lu, la unggaragai misa’ tampo malangka’ sia la untalo misa’ kota ditambakuku; iatu surodadu rampe Lo’na lu tae’ natananni bendan mangea, moi anna surodadu pa’tonno’, ondongpi tae’ tu kamatotoranna la bendan mangea.
16Iatu to ullaoi la umpogau’ lalan inaanna sia moi misa’ tau tae’ natananni bendan mangea; sia la matoto’ bendan lan Tondok ballo; na iatu a’gan ma’kasanggang lan limanna.
17Sia undaka’ lalan la umpatundukki tu mintu’ lili’ kadatuanna datu rampe Lo’na lu sia naangga’-angga’i bang umpogau’ kasiturusan; la naben misa’ baine tu datu rampe Lo’na lu la nopobaine, kumua anna sanggangi tu kadatuan iato, apa tae’ nala dadi to sia tae’ nala umpomaupa’i.
18Undinnato ma’palulakomi tondok ma’biring tasik, anna buda natalo dio, apa misa’ kamandang lompo la napa’dei ma’pamatuna sia tae’mo nakullei umpabala’i tu kadipamatunanna.
19Undinnato ma’palulakomi tambakuku lan tondokna; apa la titodo anna tobang, sia tae’mo nala diapparan len.
20La bendan misa’ tau ussondai, tu ussua misa’ tau ma’paruku umpalaku sima ma’lele-lele unnolai lili’ tarru’ marua’na kadatuan, apa ba’tu pirang-pirang allori nala sanggangmo, tu tae’ natete dio kamarukkan sia kasirarian.
21Sia la bendan misa’ to matuna ussondai, tu tae’ naia dipamanassa la dinii ussorong kapayungan lako kalena; tae’ nadikapang nasae sia la urrampai tu kadatuan tete dio pa’pakena.
22Iatu surodadu ussabu’i mintu’ apa, la diputtai duka dio tingayona sia disanggang, ondongpi moi arung mangkamo nasibassean.
23Sia ianna sibasse tau, la ma’pakena; susimoto la sakendek-kendekna sia matoto’ moi anna sidi’ri tau nasiban!
24Tae’ anna dikapang anna saemo tama padang malompo sia umpogau’ apa tae’ bangpa napogau’i nene’na sia nene’ to dolona: iatu pangrampa sia panglo’do’ sia eanan la nasamboran lako taunna; sia la ma’tangnga’ la ullaoi tu kota ditambakuku, apa tae’ anna masae lako.
25Sia la napatiangka’ duka tu kamatotoranna sia kabaranianna situang surodadu kamban la unneai tu datu rampe Lo’na lu, na iatu datu rampe Lo’na lu la umpasakka’ surodadu kamban sia matoto’ tongan, apa tae’ nakullei la bendan mangea belanna la nasitangnga’i tau unneai.
26Na iatu to ungkande kandena la umpasosso’i tu kuasanna, sia iatu surodadunna la disabu’i, sia buda taunna la tibambang mate.
27Iatu datu iato sola duai pada ma’tangnga’ kadake lan penaanna sia ianna unno’ko’ dio misa’ meda pada la ma’kada tang tongan, apa tae’ nala dadi tu nasanganna, belanna tae’pa nalambi’i tu ma’katampakanna sae lako attu dipamanassa.
28Mangkato la sule lako tondokna umbaa ianan sanda makamban, sia la naea penaanna tu basse masero; susimo la napogau’ to, namane sule lako tondokna.
29Iake nalambi’mi tu attu dipamanassa, la male pole’ tama rampe Lo’na lu palaoan, apa iate ma’katampakanna tae’ nala susi tu bunga’na;
30la sae kappala’ to Kitim unneai, anna selang penaanna; apa iatonna sule la umpasau kare’dekan ara’na lako basse masero, anna palalo penggauranna, sia iatonna sulemo, napapatuimi penaa tu to umboko’i tu basse masero iato.
31Sia la napake’de’ tu ba’tu pira-pira surodadu, anna ruttakki tu inan maindan, iamotu tambakuku, sia la naputtai bang tu pemala’ allo-allo sia napabendanni tu apa megallian, tu ma’kasanggang.
32Na iatu to untodo tinting basse, la nasede anna memboko’, apa iatu tau untandai Kapenombanna la matoto’ sia umpalalo penggauran.
33Sia iatu to paissan dio lu bangsa iato la unnada’i buda tau, apa la songka belanna nakande pa’dang sia api sia ditarungku sia dipangrampai ba’tu sangapa-apa masainna.
34Apa iake songkai tu tau iato mai la unnappa’ pa’tunduan tang siagi, sia buda tu tau la menturu’ lako tau iato mai, apa pudukna bangri.
35Ba’tu pira-pira tu to paissan la songka, kumua anna disudi, dipamasero sia dipamatasak tu tau iato mai, sae lako attu ma’katampakanna; belanna iatu iannato tae’pa nalambi’i lako tu attu dipamanassa.
36Na iatu datu iato la umpogau’ bang apa naala penaanna; la umpalayuk sia la umpatarompo’ kalena unnea mintu’ deata, ondongpi sae lako Puang Matua undaoanni mintu’ deata napa’kada solangi; sia la maupa’ ia sae lako sundunna tu kare’dekan ara’, belanna iatu apa pura dipamanassa la dadi.
37Sia tae’ duka nabilangi tu deatanna nene’ to dolona; tae’ nabilangi tu deata naporai baine, sia moi misa’ tae’ duka tu deata senga’, belanna la napalayuk tu kalena unnea mintu’ deata.
38Apa naposondana deata iato mai la napenombai, iamo deata tambakuku, tu deata tae’ natandai nene’ to dolona la napenombai umpennoloan bulaan, salaka, parimata sia ma’rupa-rupa ianan masuli’.
39Sia la ke’de’ ullaoi tu benteng ditambakuku tete dio pa’tunduanna kapenombanna lembang senga’; mintu’ tu to umpatonganni, la unnappa’ kamala’biran kapua; la naangka’ tu tau iato mai umparenta buda tau sia la nataa-taan padang la naposaro.
40Apa iake attu ma’katampakannai la sae tu datu rampe Lo’na lu urrarii tu datu rampe Daanna lu, anna iatu datu rampe Daanna lu la ullaoi umbaa kareta sia pakkanarang sia kappala’ buda; la tama ullaoi tu tondok iato sia samasai-sainna ma’parekan susito uai saba’.
41Sia la tama duka ullaoi tu Tondok ballo sia buda tau songka; apa iatu to la tilendok dio mai limanna iamotu Edom, Moab sia pa’tonno’na to Amon.
42Sia la napake’deran surodadunna lako tu ba’tu pira-pira tondok, sia tae’ duka anna lussu’ tu tondok Mesir.
43Apa la nakuasai tu mintu’ pareanan bulaan sia salaka sia mintu’ ianan masuli’ lan Mesir, sia la naturu’ to Libia sia to Etiopia.
44Apa la napatiramban kareba dio mai rampe matallo sia daa mai rampe daanna lu, iamoto nala mandu re’dek ara’na tassu’ la ussanggang sia ussabu’i buda tau.
45Sia la naosok tu tenda kapayunganna lan kasiallaran tasik sia buntunna Padang ballo maindan, apa la nalambi’ lampakna, anna moi misa’ tau tae’ untundui.