Dual PanelIatu kakadakean natangnga’ Haman naparampo Ester lako datu
1Tamami tu datu sola Haman la kumande sola Ester lan pa’maruasan.
2Ma’kada dukami tu datu tonna allo ma’penduan tonna marassan unniru’ uai anggoro’ lako Ester nakua: Apara palakummu, e datu baine Ester? Manassa la kupasituru’. Sia apara mukamorai? Moi anna sangsese kadatuan, la kuben dukako.
3Mebalimi tu datu baine Ester nakua: Iake denni kamaturu-turuammi lako kaleku, o datu, sia iake nakalo’i penaanna datu, ke ma’dinni mikamaseanna’ tu sunga’ku diona palakungku sia iatu sunga’na bangsaku sitinaya tu kukamoraianna.
4Belanna kami te mangkamokan dibaluk la aku la bangsaku, la disanggangi, dipatei sia disabu’i. Moronganna angki la dibaluk la mendadi kaunan sia kaunan baine, manassa la kappana’, apa iate kamandasan iate tae’ padanna tu mintu’ apa umparugi datu.
5Ma’kadami tu datu Ahasweros lako datu baine Ester, nakua: Mindara to sia umbara nanii, tu ponnomo penaanna la umpogau’i tu apa susito?
6Ma’kadami tu Ester nakua: Iatu pa’pakario-rio sia uali, iamotu Haman, to kadake iate. Tirambanmi tu Haman untiro lindona datu sia datu baine.
7Ke’de’mi tu datu re’dek ara’na, nasoro’i mangiru’ anggoro’, namale tama pa’lak tongkonan layuk; apa iatu Haman torro bendan la umpengkamoyan sunga’na lako datu baine Ester, belanna natandaimo, kumua manassamo tu kasanggangan lako kalena dio mai datu.
Haman disula
8Iatonna tibalikmo tu datu lan mai pa’lak tongkonan layuk tama bilik nanii mangiru’ anggoro’, lumbangmi tu Haman rokko bale-bale, tu nanii Ester mamma’-mamma’. Ma’kadami tu datu nakua: La morai dukako unggau’ sala datu baine lan tongkonan layukku! Iatonna tassu’mo te kada iate dio pudukna datu, nabungku’mi tau tu lindona Haman.
9Ma’kadami tu Harbona, misa’i to mase’ponna datu tu lan diamanna, nakua: Ondongpi tiro dukai tu lentong mangka nagaragai Haman la napassulai Mordekhai, tu mangka umpokada kameloanna datu bendanmo sikandappi’ banuanna Haman, limangpulo siku langka’na. Ma’kadami datu nakua: Sulai tu Haman dao.
10Nasulami tau tu Haman dao lentong tu napabendanan Mordekhai. Namane pa’de tu kare’dekan ara’na datu.