Dual PanelKapembalaranna to Yahudi lako ualinna
1Iatonna allo ma’pessangpulo tallunna bulan ma’pessangpulo dua, iamotu bulan Adar, tonna lambi’mi la dipogau’ tu kada sia atoranna datu, tonna allo la nanii ualinna to Yahudi ma’rannuan la untaloi, apa allo iato membali allo kapataloanna to Yahudi lako to ungkabiri’i.
2Sirampunmi tu to Yahudi lan lu kotana dio lu mintu’ propinsi parentana datu Ahasweros la umpata’pai lima tu mintu’ to undakaranni kasangganganna na moi misa’ tau tae’ nakulle unneai, belanna narampoimo kamatakuran ungkataku’i tu tau iato mai.
3Sia mintu’ arungna propinsi sia tomaraa lompo sia tomaraa sia tonaala parea datu umpa’tunduan to Yahudi, belanna narampoi kamatakuran ungkataku’ Mordekhai.
4Belanna iatu Mordekhai tarompo’mo lan tongkonan layukna datu sia kaleleammo lan lu mintu’ propinsi, ondongpi iatu Mordekhai, pia muane iato, samasai-sainna sakendek-kendekna kapaanna.
5Iatu to Yahudi umpepa pa’dang mintu’ ualinna, napatei sia nasabu’i, anna pogau’i tu pa’poraianna lako mintu’ to ungkabiri’i.
6Lan kota benteng Susan napatei sia nasabu’i to Yahudi limaratu’ muane.
7Sia Parsandata, Dalfon, Aspata,
8Porata, Adalya, Aridata,
9Parmasta, Arisai, Aridai na Waizata napatei nasang,
10iamotu sangpulo muane anakna Haman, anakna Hamedata, to ungkabiri’ to Yahudi, apa tae’ naparumbui lima tu pangrampa.
11Allo iato diparampomi lako olona datu tu bilanganna mintu’ to dipatei lan kota benteng Susan.
12Ma’kadami tu datu lako Ester, datu baine, nakua: Lan kota benteng Susan napateimo sia nasabu’imo to Yahudi tu muane limaratu’ sia iatu mintu’ anakna muane Haman. Ba’tu apamo napogau’ tau iato mai lan mintu’ propinsi senga’na datu? Apapa palakummu? Manassa la dikamaseangko. Sia apapara mukamorai? Manassa la kupasituru’.
13Ma’kadami Ester nakua: Iake nakalo’i penaanna datu, melo ke dielorampi tu to Yahudi tu lan Susan, ma’pogau’ susi atoran allo iate sia iatu anakna Haman sangpulo nasula tau.
14Napa’parentammi datu, kumua la dipogau’ susito sia dipa’peissanan tu misa’ atoran lan Susan, anna sulai tau tu muane anakna Haman sangpulo.
15Iamoto nasirampun dukapa tu mintu’ to Yahudi lan Susan tonna allo ma’pessangpulo a’pa’ bulan Adar, anna patei lan Susan tu tau talluratu’, apa tae’ naparumbui lima tau iato mai tu pangrampa.
16Sia iatu mintu’ to Yahudi senga’ lan propinsinna datu sirampun, anna ungkaritutui sunga’na sia unnappa’ karapasan dio mai ualinna; sia napatei tau iato mai tu mintu’ to ungkabiri’i pitungpulo llima sa’bu, apa tae’ narumbui limanna tu pangrampa,
17tonna allo ma’pessangpulo tallu bulan Adar. Iatonna allo ma’pessangpulo a’pa’na rapa’mi tu tau iato mai, anna padadii tu attu iato misa’ allo pa’maruasan sia kaparannuan.
Pa’maruasan Purim dipondok
18Apa iatu mintu’ to Yahudi lan Susan sirampun la ia tonna allo ma’pessangpulo tallu la ia tonna allo ma’pessangpulo a’pa’ bulan iato. Rapa’mi tu tau iato mai tonna allo ma’pessangpulo lima sia iatu attu iato napadadi misa’ allo pa’maruasan sia kaparannuan.
19Iamoto napakarayai mintu’ to Yahudi lan lu tondok, iamotu mai tau torro lan lu kota, tu tang dirinding tembo’, tu allo ma’pessangpulo a’pa’ bulan Adar susi misa’ allo kaparannuan sia pa’maruasan sia susi misa’ allo tu nanii tau pada sikada’pan.
20Nasura’ nasangmi Mordekhai te mintu’ apa dadi sia umpa’pea sura’ lako mintu’ to Yahudi la mandappi’na la mambelanna lan mintu’ propinsinna datu Ahasweros,
21la umpapassanni tau iato mai tu atoran la umpakaraya la allo ma’pessangpulo a’pa’na la allo ma’pessangpulo limanna bulan Adar, ke taunoi,
22belanna allo iamote tu nanii to Yahudi unnappa’ karapasan dio mai ualinna sia bulan iamote tu nanii kamasussan membali kaparannuan lako tau iato mai sia passanda bolongan membali misa’ allo pa’gauran, sia allo iato la dipadadi allo pa’maruasan sia kaparannuan, tu nanii tau pada sikada’pan sia umpa’bengan pa’kamase lako to mase-mase.
23Natarimami to Yahudi butung to apa dipondok; naparandukki tau iato mai umpogau’i, tu apa mangka nasurasanni Mordekhai.
24Belanna den tangnga’na Haman, anakna Hamedata, to Agag, to ungkabiri’ to Yahudi, la ussabu’i tu mintu’ to Yahudi sia umbuang Pur – iamotu pa’loterei – la ussanggangi tau iato mai sia la ussabu’i.
25Apa iatonna malemo (tu Ester) mennolo lako datu, napatassu’mi datu tu sura’ parenta, kumua iatu tangnga’ kadake tu natangnga’ unnea to Yahudi, la sule ta’pa dao ulunna. Iatu Haman sia mintu’ anakna muane nasula tau lako misa’ lentong.
26Iamoto nasangai tau Purim tu allo iato, unturu’ sa’buran Pur. Tu belanna mintu’ kada lan sura’ iato sia diona tu mintu’ apa natiro sia diona tu mintu’ apa urrampoimo tau iato mai,
27iamoto napamanassai to Yahudi sia natarima butung apa dipondok lako kalena sia lako bati’na tau iato mai sia lako mintu’ tu to naala bilanganna, kumua tae’ len nala ullendai napakaraya te allo iate da’dua, ke taunoi, susitu mangka disura’ diona allo iato sia attu mangka dipamanassan pa’maruasan iato,
28sia iate allo iate la dikilalai sia dipakaraya lan lu mintu’ pa’rapuan, lan lu mintu’ rapu, lan lu mintu’ propinsi, sia lan lu mintu’ kota, naurunganni iatu allo Purim tae’ nala pa’de dio lu to Yahudi sia kapengkilalanna allo iato tae’ nala ka’tu dio lu mintu’ bati’na.
29Sia massura’ tu datu baine Ester, anakna Abihail, sola Mordekhai, to Yahudi iato, situang kapa’belanna la umpamatoto’ tonganni tu sura’ ma’penduan diona pa’maruasan Purim.
30Umpakatumi sura’ lako mintu’ to Yahudi lan saratu’ duangpulo mpitu propinsi kadatuanna Ahasweros tu nanii passalama’ sia kada kamarurusan,
31kumua anna pakarayai tu allo Purim iate lan attu dipamanassa, susitu mangkamo napamanassa Mordekhai, to Yahudi iato, sia datu baine Ester lako tau iato mai sia susitu atoran nagaragan kalena sia bati’na diona attu pa’puasan sia kasumarroan.
32Na iatu parentana Ester umpamanda’i tu atoran diona Purim, sia disura’ lan misa’ sura’.