Dual PanelUmpasakka’ kalingkan
1(7-28b) Iamoto angku pabatta’ penaangku belanna kamatotoranNa PUANG, Kapenombangku, urrondongna’, angku rampunni tu mintu’ pangulunna to Israel angku ke’de’ sola. Inde sia tu pangulu rapunna sia sura’ ossoranna tu to kusolan ke’de’ dio mai Babel, tonna kaparentanna datu Artahsasta:
2Dio mai bati’na Pinehas, iamotu Gersom; dio mai bati’na Itamar, iamotu Daniel; dio mai bati’na Daud, iamotu Hatus,
3anakna Sekhanya; dio mai bati’na Paros, iamotu Zakharia, sola mintu’ tu disura’ lan sura’ ossoran saratu’ limangpulo muane;
4dio mai bati’na Pahat-Moab, iamotu Elyoënai, anakna Zerahya, sola muane duaratu’;
5dio mai bati’na Zatu, iamotu Sekhanya, anakna Yahaziel sola muane talluratu’;
6sia dio mai bati’na Adin, iamotu Ebed, anakna Yonatan, sola muane limaratu’;
7dio mai bati’na Elam, iamotu Yesaya, anakna Atalya, sola muane pitungpulo;
8dio mai bati’na Sefaca, iamotu Zebaja, anakna Mikhael, sola muane karua pulona;
9dio mai bati’na Yoab, iamotu Obaja, anakna Yehiel, sola tu muane duaratu’ sangpulo karua;
10dio mai bati’na Bani, iamotu Selomit, anakna Yosifya, sola tu muane saratu’annan pulona;
11dio mai bati’na Bebai, iamotu Zakharia, anakna Bebai, sola tu muane duangpulo ngkarua;
12dio mai bati’na Azgad, iamotu Yohanan, anakna Hakatan, sola tu muane saratu’ sangpulo;
13dio mai bati’na Adonikam tu undinna, inde sia tu sanganna; Elifelet, Yehiel sia Semaya, sola tu muane annan pulona;
14dio mai bati’na Bigwai, iamotu Utai sia Zabud, sola tu muane pitungpulo.
15Mintu’nato kurampun dio biring salu, tu lolong lako Ahawa, angki ma’tenda dio tallung allo. Ia tongku paressai tu to buda sia tominaa, moi misa’ tu to Lewi tae’ kuappa’ inde to dio.
16Iamoto kusuai tu Eliezer, Ariel, Semaya, Elnatan, Yarib, Elnatan, Natan, Zakharia sia Mesulam, mintu’i pangulu sia Yoyarib sia Elnatan, toma’pangada’,
17angku suai tu tau iato umparampo pepasan lako Ido, tu pangulu dio misa’ inan, disanga Kasifya, sia kupokadan melomo tu kada sipatu la naparampoan Ido, sia mintu’ siulu’na sia topabali-balian lan Banua Kabusungan, dio inan, disanga Kasifya, kumua nasuai sae tu ba’tu pira-pira toma’paraka lan banuanNa Kapenombanta.
18Belanna pa’kaboro’Na Kapenombanta urrande pala’kan, nasuami tau iato mai tu ba’tu pira-pira topaissan dio mai bati’na Mahli, anakna Lewi, anakna Israel, iamotu Serebya sola anakna sia siulu’na, mintu’i sangpulo karua;
19sia Hasabya sola Yesaya dio mai bati’na Merari, mintu’ siulu’na sola anakna den duangpulo;
20dio mai to pabali-balian lan Banua Kabusungan, tu napa’bengan Daud sola tu mai arungna la ungkamayai to Lewi; mintu’i to den duaratu’ duangpulo tu to pabali-balian lan Banua Kabusungan, disa’bu’ nasang sanganna.
21Attu iato kupetambammi inde to dio biring salu Ahawa tu misa’ pa’puasa la umpopengkadiongan kaleki dio oloNa Kapenombanta, la umpalakui lako Kalena angki malaga-laga’ lan kalingkangki sola anakki sia mintu’ barang apangki.
22Belanna masiri’na’ umpalakui lako datu tu surodadu sia pakkanarang la ungkampaikan dio mai ualingki dio lu kalingkangki, belanna ma’kadakanni lako datu, kumua: Pa’kaboro’Na Kapenombanta urrande pala’i tu mintu’ to undaka’i, apa iatu kuasanNa sia kare’dekan ara’Na unneai tu toumboko’i.
23Iamoto angki ma’puasa sia umpengkamoyai Kapenombanta tu iannato, anNa palaloi tu pengkamoyaki.
24Undinnato kutonno’mi tu pangulu to minaa sangpulo dua, iamotu Serebya, Hasabya sola siulu’na sangpulo.
25Kutimbangammi tu bulaan sia salaka sia mintu’ pareanan, iamotu pamengan dipennoloan lako banuanNa Kapenombanta, tu napennoloan datu sola pa’bisaranna sia arungna sia mintu’ to Israel tu ma’dio ren.
26Kutimbangammi tau iato mai tu salaka annanratu’ llimangpulo talenta; sia pareanan salaka saratu’ talenta; sia bulaan saratu’ talenta;
27sia irusan bulaan duangpulo, sangsa’bu dirham magasanna sia da’dua pareanan suasa, pandila-dila susi bulaan, keangga’ pada bulaan.
28Ma’kadana’ lako tau iato mai kukua: To dipamarimbanganangkomi PUANG, susi duka te pareanan iate dipamarimbangan sia iatu salaka sola bulaan iamo misa’ pa’kamasean tanning inaa lako PUANG, Kapenombanna nene’ todolomi.
29Kampai sia kanandai sae lako mitimbangna pole’ dio tingayona mintu’ pangulu tominaa sia to Lewi sia mintu’ pangulunna rapu to Israel dio Yerusalem, lan bilik banuanNa PUANG.
30Natarimami tominaa sia to Lewi tu salaka sia bulaan tu mangkamo ditimbang la nabaa lako Yerusalem lako banuanNa kapenombanta.
Kake’deranna Ezra sia karampoanna dio Yerusalem
31Mangkato ke’de’mokanni dio mai salu Ahawa tonna allo ma’pessangpulo duanna bulan bunga’ tarru’ lako Yerusalem, narande pala’mokan Kapenombanta sia Nakampaikan dio mai ualingki sia dio mai to ma’gora’.
32Rampomokan lako Yerusalem, angki torro dio tallung allo.
33Iatonna allo ma’penna’pa’ ditimbangmi tu mintu’ salaka sia bulaan sia pareanan lan banuanNa Kapenombanta, nakampai Meremot, anakna Uria, iamotu tominaa; iatu nasisolan dio iamotu Eleazar, anakna Pinehas, sia ia duka tu nasisolan tau iato mai, iamotu Yozabad, anakna Yesua, sia Noaja, anakna Binui, iamotu to Lewis-
34mintu’nato situru’ bilanganna sia timbanganna, na mintu’ timbanganna dipatama sura’.
35Attu ia dukato iatu to dipali’ tu sulemo dio mai pa’paliran umpemalaran pemala’ ditunu pu’pu’ lako Kapenombanna to Israel, iatu apa napaden mintu’ to Israel iamotu sapi laki sangpulo dua, domba laki kasera pulona nnannan, anak domba pitungpulo mpitu na sangpulo dua bembe’ laki, la diposuru’ pengkalossoran; mintu’nate butung to misa’ pemala’ ditunu pu’pu’ lako PUANG.
36Naparampo dukami tau iato mai tu sura’ parenta dio mai datu lako tomaraa lompona sia tomaraanna datu dio lu lili’ sambalinna lu Salu; napangeaimi tau iato mai tu bangsa iato sia iatu banuanNa Puang Matua.