Dual PanelEzra umpa’gagai to Israel sirampean to senga’
1Iatonna mangkamo tu mintu’ apa iato, saemi tu mintu’ pangulu lako kaleku sia ma’kada nakua: Iatu to Israel sia tominaa sia to Lewi tae’ natoyangan kalena dio mai mintu’ bangsa lan tondok diona tu apa megallian, iamotu dio mai to Kanaan, to Het, to Feris, to Yebus, to Amon, to Moab, to Mesir na to Amori.
2Belanna naala tu anakna tau iato mai napobainei sia napasibali anakna muane, napobannangi iatu bati’ masero dipasirau mintu’ bangsa lan tondok iato, ondongpi iatu mai pangulu sia to paa undoloanni umpoka kamarurusan.
3Iatongku rangimi te apa iate, kuserekmi tu bayu lanku lu sia bayu lamba’ku, kudu’dukki tu beluak dao mai ulungku sia kudu’dukki tu danggo’ku, angku unno’ko’ tang unnissan apa.
4Sirampunmi lako kaleku tu mintu’ to ma’parondo ungkataku’ kadanNa Kapenombanna to Israel, belanna iatu to dipali’ umpokamo kamarurusan, apa iatu aku torro bangna’ unno’ko’ tang unnissan apa sae lako pemala’ makaroen.
5Apa iatonna dipemalarammo tu pemala’ makaroen, ke’de’mo’ diong mai to’ kuninna umpamadiongan kaleku, angku malinguntu’ ma’kameja serek sia ma’bayu lamba’ serek, sia umballa’ pala’ku lako PUANG, Kapenombangku,
6sia ma’kadana’ kukua: O Kapenombangku, masiri’na’ sia maila’na’ mentingara lako Kalemi, o Kapenombangku, belanna iatu kakadakeangki kendekmo ussamboi ulungki sia iatu kasalangki sumpumo langngan langi’.
7Randuk dio mai linona nene’ todoloki sae lako allo iate tonangkan lan sala kapua sia belanna kakadakeangki, angki disorong la kami la mintu’ datungki la mintu’ tominaangki tama kuasanna datunna tondok iato mai, la nakande bassi mataran sia la dipali’ sia la dipangrampai sia la ditoding siri’ susite totemo.
8Na totemo tae’pa namasai alla’na dinii umbenkan kamaturu-turuan dio mai PUANG, Kapenombangki, belanna Napatorroangkan tu tau dirampanammo sia umbenkan misa’ tana’ lan inan maindanna, tu Nanii Kapenombangki umpamarorrongan pentiroki sia umpopenaa melokan sidi’ lan kakaunanangki.
9Belanna kami te kaunanpakanni, apa lan kakaunanangki tae’ Napopa’elo’nakan Kapenombangki: Napalulako kaleki tu kamaturu-turuanna mintu’ datu Persia, naurunganni tu tau iato mai umbenkanni penggirikan la umpabendanni sule tu banuanNa Kapenombangki sia umpemeloi tu daun lauanna, sia umbenkanni misa’ perompo lan Yehuda sia lan Yerusalem.
10Apa totemo apamo la kipokada te mangkannate, o Kapenombangki? Belanna kiboko’i tu mintu’ pepasanMi,
11tu mangka Mipokadangkan nalopian taumMi, iamotu mintu’ nabi, nakua: Iatu tondok mipatu la miala mipomana’, iamo padang burere bannang dio kaburereanna mintu’ bangsa lan tondok iato, tu belanna mintu’ penggauran megallian tu naponnoanni randuk dio mai randanna sae lako randan sangbalinna napobua’ kamaruttakanna.
12Iamoto da mibenni tu anakmi baine napobaine anakna tau iato mai sia da mialai tu anakna baine mipasibali anakmi; sia da midakaran lenni tu napomelona sia napomaupa’na, kumua mimatoto’ sia mikandei tu bura maelona padang iato sia mibenni bati’mi napomana’ tontong sae lakona.
13Iatonna mangkamo tu mintu’ apa iato rampo lako kaleki napobua’ penggauran kadakeki sia kasalan kapua, anna Kamu, o Kapenombangki, umpasosso’i tu ukungan sipatunna la urrampoikan, sia ungkamaseangkan buda tongan tau dirampanan,
14– sipatukanniraka la untengkai pole’i tu pepasanMi, angki sipoipa’ pole te bangsa megallian iate? Tae’raka nala re’dek ara’Mi lako kaleki amMi sabu’ikan, naurunganni tae’mo torro ba’tu lussu’?
15O PUANG, Kapenombanna to Israel, Kamumo tu malambu’, belanna torro siapakanni pira tu tilendokna, susite allo iate. Manassa bendankan dio oloMi nakabu’kan kasalangki. Tonganna moi misa’ tau tae’ nakullei torro bendan dio oloMi.