Dual PanelBungkaran kada
1Iatu kada Napa’petanggungan Puang Matua, tu dipasombo lako nabi Habakuk.
Ukungan napalalo to Kasdim
2O PUANG, ba’tu sangapamo’ meongli’ umpalaku pa’tunduan, apa tae’ Miperangii, melallakna’ mati’ Kalemi, kukua: Kamasa’garan! Apa tae’ Mibengan katilendokan.
3Ma’apai amMi patiroanna’ tu kakelokan sia Mitiro, tu kamandasan? ondongpi iatu pa’pakario-rio sia kamasa’garan dio pentiroku, sia den kasigagan, sia bu’tu tu kasite’geran.
4Iamoto natangkan kepatu tu Sukaran aluk sia tae’mo napayan len tu salunna, belanna iatu to tang mekaaluk untikui to malambu’, iamoto napayan tibalik sule tu salunna.
5Tiro tikui male tu mintu’ to kapere’, sia pemarangai, ammi mangnga sia pussak, belanna Kupogau’ tu misa’ penggauran lan attummi, tu tae’ mila umpatonganni, ke diuleleanni.
6Belanna tonganna iatu to Kasdim Kupabendan, misa’ bangsa masa’ga’ sia malinta’, tu lumingka unnoloi lua’na lino, la unnala inan katorroanna tau la napoapa, tu tangia apanna.
7Megiangan sia metakuran, iatu salunna sia kataromposanna tu dio mannapi mai kalena nanii sun.
8Iatu darangna mandu malinta’ na iatu arimau buluh, sia mandu matira’ na iatu guruk ke bonginna; mintu’ tu darangna sia pakkanarangna sae tiantak-antak, mambela nanii sae langkan maega tu ussiok kandena.
9Mintu’ bangsa iato sae umpogau’ kamasa’garan, iatu to undoloanni lumumpa’ susi angin rampe matallo, sia urrampun to dirampa susi karassik budanna.
10Natelle-telle tu mai datu sia napetaai tu mai pangulu. Napetaai tu mintu’ benteng, belanna natopporan losso’ ullaoi, anna taloi.
11Tarru’ bang susi angin sia male tarru’; susimoto tu naposala, belanna kamatotoranna tu napodeata.
12O PUANG, tae’raka na Kamu tu Kapenombangku tempon dio mai sia To maseroku? Tae’ kila mate. O PUANG, Kamumo umpadenni tu tau iato mai la mangukung, sia o Buntu Batu, Kamu umpamanassai tu tau iato mai la umpalalo peada’.
13Mandu masero tu matamMi untiro kakadakean, sia tang Mitanan umpemarangai tu pa’pakario-rio, ma’apai Minenne’ umpemarangai tu to tang maruru’ sia kappaKomi, ke naampello’i to tang mekaaluk tu to mandu malambu’ na ia.
14Miurunganni umpadadi tolino, susito bale diong tasik sia susito olo’-olo’ mendonglo’, tu tae’mo to ma’parentana.
15Napekan nasang kendek, napaalai dalla’na, anna riu’i sia narampun tama bundena; iamoto naparannu sia mela’tek-la’tek.
16Iamoto anna memala’ lako dalla’na sia untunu pemala’ lako bundena, belanna bannang iarite namalompo tu taana sia sebo tu kandena.
17Iamoto anna lo’bangiraka tu dalla’na sia tontong umpateiraka ba’tu pira-pira bangsa tae’ bang nakasayangi?