Dual PanelPassambayangna nabi
1Inde sia tu passambayangna nabi Habakuk, unturu’ baenan sengo Syigyonot,
2O PUANG, kurangimo tu karebamMi, mataku’na’, o PUANG, lako penggauramMi; palaloi tu iannato lan taun-taun la sae, pasomboi tu iannato lan taun-taun la sae; lan attu kasengkean la Mikilalai tu pa’kamasean.
3Saemo tu Puang Matua dio mai Téman, sia iatu To masero dao mai buntu Paran. Sela Iatu kamala’biranNa ussamboi mintu’ langi’, sia nasitutu’i kadipudianNa tu lino.
4Den misa’ silo susi arrangna matallo, dio sa’deNa nanii dukku arrang pandila-dila, den dio tu pa’bungku’ kamatotoranNa.
5Dio oloNa lumingka tu ra’ba biang, sia lassu lalla’ sibaa melako lette’Na.
6Ke’de’Mi anNa patigega’i te lino; mentiro tiku lao anNa patike’kenni tu mintu’ bangsa, mintu’ buntu tempon dio mai bake, sia mintu’ tanete dolo-dolona tuan; iatu mintu’ lalan dolo-dolona, lalanNa Puang.
7Kutiro tu mintu’ tenda to Kusyan nati’tin kapussakan, sambo tenda tondokna to Midian ma’parondo-rondo.
8SengkeroKomika lako mintu’ salu, o PUANG, dukkuraka tu kasengkeamMi lako mintu’ salu, ba’tu re’dekraka tu ara’Mi lako tasik, amMi sakei tu darangMi, ba’tu kareta kapataloamMi?
9Dilossokammi tu panaMi, Miparandanmo tu anak pana buda tongan. Sela Mipiakmo tu kuli’na padang, Mipopendadi salu.
10NatiroKomi tu mintu’ buntu, anna ma’parondo, lendu’mi tu uai buda tibarrak dao mai, iatu uai buda diong aa’ mi’lan mongngo’ sia unnangka’ limanna langngan.
11Iatu mata allo sia bulan sorong boko’mo lako inanna; napobua’ arrang anak panaMi tu sumaang lendu’, napobua’ marorrongna doke pandila-dilaMi.
12Tete dio Kare’dekan ara’Mi Miolai te kuli’na padang, sia tete dio kasengkeamMi amMi lullu’i tu mintu’ bangsa.
13Tassu’moKomi amMi rampananni tu taumMi, amMi rampananni tu to mangka Mitokko. Miro’pok dao mai tu bubungan banuanna to tang mekaaluk, sia Mitesse tu parandangan banuanna sae lako batu ringki’ diongna lu.
14Anak panana duka ia la Mitossokan tarru’i, tu ulunna surodadunna, tu sae palaoan la mela’tek umpatisambo’na’, butung to unnampello’ to mandasa lan inan kabunianna.
15Mipatetei darangMi tu tasik, iamotu uai kapua pambura-bura.
16Iatongku rangii tu iannato, ma’rundedemi tu ba’tengku, bannang dio oni iato anna ma’parondo tu pudukku, sia langgang tu bukungku, angku ma’parondo dio inan kunii bendan; moi susito la rapa’na’ umpeagii tu allo kapussakan, ke narampoi tu bangsa iato, tu ma’tuntunan sae ullaoikan.
17Moi anna tae’ namenta’bi tu garonto’ ara, anna tang membua tu garonto’ anggoro’, sia moi tae’ nama’pakarannu-rannu tu bua garonto’ saitun; moi anna tae’ napakendek burana tu mai pa’lak, sia diula’i tu domba lan mai bala sia tae’ tu sapi lan lu bontong,
18la parannu dukana’ unnarrak tete dio PUANG, sia la mela’tekna’ tete dio Puang Matua, oto’na kasalamarangku.
19Iatu PUANG Puangta Iamo oto’na kamatotorangku: Napasusi lette’ donga birang tu lette’ku, sia Napalesei lette’ku tu inan matandeku. Lu lakona pangala sengo. Dipasiala oni katapi.