Dual PanelDiona rampanan kapa’na Simson sia pa’karrumena
1Malemi tu Simson lako Timna, natiroi dio Timna tu misa’ baine, misa’ pia baine to Filistin.
2Sulemi umpokadai lako ambe’na sia indo’na, nakua: Mangkamo’ untiro misa’ baine dio Timna, misa’ pia baine to Filistin; melo totemo, ke malekomi umpalakuanna’, angku pobainei.
3Apa ma’kada tu ambe’na sola indo’na lako, nakua: Tae’ bangmoraka baine dio lu sukunta sia dio lu mintu’ bangsata, ammu la maleora unnala baine dio lu to Filistin, to tang disunna’i. Apa mebali tu Simson lako ambe’na, nakua: Palakuan bangmo’, belanna naala penaangku.
4Tae’ naissanni indo’ ambe’na kumua iatu apa iate lu dio mai PUANG, kumua anna daka’ posanga la unnea to Filistin. Belanna attu iato naparenta to Filistin tu to Israel.
5Malemi tu Simson sola ambe’na sia indo’na lako Timna. Iatonna rampomo lako buntu nanii pa’lak anggoro’na to Timna, pakalan sitammumi misa’ singa mangura umburrung-burrung.
6Apa Narampoi PenaanNa PUANG, naurungan ussapekki tu singa, susito ussapek anak bembe’ laki, moi natae’ bang apa lan limanna. Apa tae’ napaissanni ambe’na sia indo’na tu apa mangka napogau’.
7Mangkato malemi tu Simson sipa’kada-kada tu baine iato, anna alai penaanna.
8Ba’tu pirang-pirang allo to sulemi la urrampanni kapa’ tu baine iato; sepangmi la untiroi tu singa mate, nalan kalena tu singa mate iato den sangtuntunan enoan lan ma’banua sia tani’ enoan.
9Naalami tu tani’ enoan iato napadiongi pala’na, anna male ungkande lolananni. Iatonna rampomo lako indo’ ambe’na naben dukami pira, anna kandei. Apa tae’ napokada lenni, kumua iatu tani’ enoan iato naala lan mai singa mate.
10Attu iato malemi tu ambe’na Simson lako baine iato, napogau’i Simson tu pa’maruasan, belanna susimo kabiasanna pia muane to.
11Iatonna tiromi tau iato mai tu Simson, napileammi tau tallungpulo la ussolanni ma’rampanan kapa’.
12Ma’kadami Simson lako tau iato mai, nakua: La kupokadangkomi misa’ karrume. Iake mipokadan tonganna’ tu battuananna lan te pa’maruasan iate pitung allo sia iake mitandaimi, la kubenkomi bayu lanna lu tallungpulo lamba’na sia bayu lamba’ tallungpulo.
13Apa iake tae’i mipokadanna’ tu battuananna, inang la mibenna’ bayu lanna lu tallungpulo lamba’na sia bayu lamba’ tallungpulo. Ma’kadami tu tau iato mai, nakua: Pokadami tu karrumemu, angki rangii.
14Ma’kadami lako tau iato mai, nakua: Den ia kande tassu’ lan mai to pakande, sia apa matanning lan mai to mawatang. Apara to? Ma’tallung-alloammo tae’ bangpi unnissanni battuananna tu karrume iato.
15Apa iatonna allo ma’pempitumo ma’kadami tu tau iato mai lako bainena Simson nakua: Naranni tu muanemu napokadangkan battuananna tu karrume iato; iake tae’i, la kiballako sola sangdadiammu. Iaraka mitambaiangkan tu la mipeapai angki kalala’; inang manassa.
16Saemi tu bainena Simson tumangi’ dio tingayona Simson anna ma’kada nakua: Manassa kumua tae’ mupa’apaina’ sia tae’ mukamaseina’; mupokadan karrume te mai bangsaku, natae’ mupokadanni tu battuananna. Mebalimi lako nakua: Akkenna ambe’ku sola indo’ku natae’ kupokadanni, apa pole’ tu iko.
17Apa lan to pitung allo tu tau ma’marua’-rua’, tumangi’ bang tu bainena lako. Iatonna allo ma’pempitu napokadami tu battuananna tu karrume iato lako bainena, belanna naparuku-ruku tongan. Attu iato napokada tu battuananna karrume iato lako solana.
18Iatonna allo ma’pempitu, tonna tae’pa nalambun tu allo, ma’kadami lako tu muane dio lu kota iato, nakua: Apara tu mandu matanning anna tani’ enoan, apara tu mandu mawatang anna misa’ singa? Apa mebali tu Simson lako, nakua: Iakenna tae’ ammi pa’tengkoanni tu anak sapingku, manassa tae’ mitandai battuananna tu karrumeku.
19Narampoimi PenaanNa PUANG tu Simson, anna male lako Askelon umpatei tallungpulo muane dio, naala nasangi tu mintu’ tamangkalena, anna benni tu pakean iato tu to untandai karrumena. Apa re’dek bang tu ara’na, iamoto nasule lako banuanna ambe’na.
20Iatu bainena Simson dibenmo to pasolanna Simson tonna diparampo.