Dual PanelDiona to Dan male mangrampa
1Attu iato tae’ tu datu dio to Israel sia attu ia dukato nanii suku to Dan undaka’ misa’ padang mana’ la nanii ma’tondok, belanna sae lako allo iato tae’pa naappa’i tu padang mana’ dio lu mintu’ suku to Israel.
2Iamoto nasuami to Dan tu lima muane dio mai mintu’ pa’rapuanna, iamotu to barani dio mai Zora sia Estaol la usserre’i sia umparessai tu tondok. Ma’kadami nakua: Malekomi umparessai tu tondok. Tonna rampomo lako buntunna Efraim dio banuanna Mikha torromi ma’bongi dio.
3Iatonna rampomo lako banuanna Mikha napegamarai tu baenan kadanna pia muane to Lewi iato; nareke’mi lako sia nakutanai nakua: Mindara ussolangkomi sae indete sia apara mipogau’ inde sia matumbari katuoammi?
4Mebalimi lako tau iato nakua: Susito sia susite napogau’ Mikha lako kaleku; napopareananna’ sia dadina’ to minaanna.
5Ma’kadami tu tau iato lako nakua: La mekutanapakomi lako Puang Matua, angki issanni kumua ba’tu maupa’ siakan lan te kalingkangki.
6Mebalimi tu to minaa iato lako nakua: Male marampa’mokomi! Iate kalingkammi nakalo’ penaanNa PUANG.
7Ke’de’mi male tu tau lima narampo lako Lais. Natiromi tu tau dio torro marampa’ susi a’ganna to Sidon, manaman sia rapa’; tae’ tu to ma’parenta lan tondokna, ussussai tu tau iato mai, moi diona misa’ duka apa. Iatu katorroanna sikambela to Sidon sia moi misa’ tau tae’ bang nasikadamakan.
8Iatonna sulemo tu tau iato mai lako to nasangsukuan dio Zora sola Estaol, nakutanaimi to nasangsukuan nakua: Umbara nakua patiromi dio?
9Ma’kadami nakua: Maimokomi, tamalemo ullaoi, belanna iatu tondok kitiro melo tongan. Ma’apai ammi torro bangra unno’ko’ indete! Da mimatukkun male ullaoi tu tondok iato ammi alai mipomana’.
10Iammi rampo lako la mitiro tu misa’ bangsa tang marea, sia iatu pa’padanganna tiku lao malona’ tongan. Manassa Nasorongmo Puang Matua tama limammi; lan tondok iato tae’ misa’ apa kurang tu mintu’ apa lan te lino.
11Attu iato ke’de’mi inde to dio mai, iamotu dio mai Zora sola Estaol, tu tau annan ratu’ dio mai pa’rapuanna Dan, sakka’ nasang pa’bunona.
12Ke’de’mi tu tau iato nama’tenda sikandappi’ Kiryat-Yearim lan Yehuda. Iamoto nasangai tau tu tondok iato Mahane-Dan sae lako allo iate; iatu nanii tondok iato rampe matampu’na Kiryat-Yearim.
13Ke’de’mi inde to dio mai nalendu’i tu buntunna Efraim narampo lako banuanna Mikha.
14Ma’kadami sola limai tu to mangkamo male usserre’i lili’na Lais lako to nasangsukuan nakua: Miissan siaraka kumua lan te banua iate den misa’ epo’ sia balo’ tau sia rapang-rapang dipasisumbung pa’pa’ na pa’pati’no’? Totemo la miissan tu apa sipatu la mipogau’.
15Sepangmi tu tau iato lako, anna rampo lako banuanna pia muane to Lewi iato, iamotu banuanna Mikha, anna pekutananni tau iato mai tu diona kamalaga’-lagaranna.
16Iatu to Dan annan ratu’, tu sakka’ pa’bunona, torro bang bendan dio to’ babangan.
17Apa iatu tau sola limai tu mangkamo male usserre’i tondok iato, tarru’ bang tama, anna alai tu rapang-rapang dipa’, epo’, sia rapang-rapang dipati’no’. Iatu to minaa bendan bang dio to’ babangan sola tu to annan ratu’, tu sakka’ pa’bunona.
18Apa iatonna tamamo banuanna Mikha sia naalamo tu rapang-rapang dipa’, epo’, balo’ tau sia rapang-rapang dipati’no’, ma’kadami tu to minaa lako, nakua: Apara mipogau’ inde tu?
19Mebalimi tu tau iato lako nakua: Ma’loko-lokokomi, da mima’kada len; tamalemo sola, angki poambe’komi sia kipotominaakomi, umbara melo misanga: iaraka tu dadikomi to minaanna to lan banuanna misa’ tau, ba’tu iaraka tu dadi to minaanna misa’ suku sia misa’ pa’rapuan to Israel?
20Parannumi penaanna tu to minaa, naalai tu epo’, balo’ tau sia iatu rapang-rapang dipa’, anna undi unnula’ tau iato mai.
21Tibalikmi ke’de’ sule, anna padoloi tu pia’-pia’na sia mintu’ sapi sia domba sola bembe’ sia mintu’ pareanan.
22Iatonna mambelamo dio mai banuanna Mikha natambaimi Mikha tu to lan mintu’ banua nasikandappiran la unnula’i tu to Dan anna lambi’i.
23Undimi metamba-tamba tu tau iato lako to Dan, ta’kala namessaile sule tu to Dan, anna ma’kada lako Mikha nakua: Ma’apari te, ammu rampunni te mai tau?
24Mebalimi nakua: Mangkamo miala tu kapenombangku, tu mangka kugaragai, sia ia duka tu to minaa misolammo male. Apapara torro dio kaleku? Umbao mikua mima’kada lako kaleku kumua: Apara te?
25Ma’kadami tu to Dan nakua: Da muparangiikanni tu kadammu, den manii to mapalla penaanna unta’paiko, anna ka’tumo sunga’mu sola to lan banuammu.
26Tarru’mi male tu mintu’ to Dan, sia belanna natiro Mikha kumua mandu mawatang na ia, tibalikmi sule lako banuanna.
27Susimoto nanii to Dan unnalai tu apa nagaragai Mikha sia iatu to minaa dio kalena nasolan duka. Mangkato nalaoimi tu Lais, misa’ bangsa manaman sia rapa’, napatei pa’dang tu tau iato sia naballa tu kota iato.
28Moi misa’ tau tae’ bang sae untundui, belanna mambela dio mai Sidon na moi misa’ tau tae’ bang nasikadamakan; iatu inan kotana diong lombok sikandappi’ Bet-Rehob. Mangkato nabangun pole’mi to Dan tu kota iato, nanii ma’tondok.
29Nasangaimi Dan tu kota iato, susi sanganna Dan, nene’na tu nadadian Israel, apa iatu kota iato dolona disangai Lais.
30Napabendanammi kalena to Dan tu rapang-rapang dipa’, na Yonatan, anakna muane Gersom, anakna muane Musa, la ia la mintu’ anakna muane, dadi to minaanna to Dan sae lako allo kadipaliranna tu pa’tondokan iato.
31Napadenammi kalena tu rapang-rapang dipa’ tu mangka nagaragai Mikha, natorro dio sipeupu’ kabendananna banuanna Kapenomban dio Silo.