Dual PanelKadanna Malaeka’Na PUANG dio Bokhim
1Pakalan ke’de’mi tu malaeka’Na PUANG dio mai Gilgal lako Bokhim, anna ma’kada, Nakua: Mangkamokomi Kusolan sun lan mai tondok Mesir, angKu solangkomi tama tondok, tu Kupalaoan sumpa unnallu’i la umbenni nene’ to dolomi, sia ma’kadaNa’, Kukua: Tae’ kula umpokai tu basse tatanan sae lakona.
2Apa da misibasse tu to umpa’tondokki tondok iate, sangadinna la mirondon tu inan pemalaranna. Apa tae’ miperangii tu kadangKu. Apara tu mangka mipogau’?
3Sia mangka dukamo Kupokada, kumua: Tae’ Kula unnula’i dio tingayomi, sangadinna tau iato mai la unnea tongankomi na iatu deatanna misa’ pepoya lako kalemi.
4Iatonna mangkamo tu Malaeka’Na PUANG ma’kada susito lako mintu’ to Israel, randukmi tu bangsa iato unnurruk-urruk tumangi’.
5Iamoto nasangai tau tu inan iato Bokhim. Memala’mi tu tau iato mai inde to dio lako PUANG.
Randukmo tu to Israel umpenombai deata. PUANG umpadenanni to parengnge’
6Iatonna suami Yosua sule tu bangsa iato, pantan malemi tu to Israel lako to’ taa mana’na, la unnalai tu padang iato la napomana’.
7Iatu bangsa iato umpengkaolai PUANG lan mintu’ allo katuoanna Yosua sia pekaamberan, tu tuopa tonna matemo tu Yosua, sia iatu untironapi tu mintu’ penggauran kalle-kallean, tu Napogau’ PUANG lako to Israel.
8Matemi tu Yosua, anakna muane Nun, taunNa PUANG, tonna saratu’ sangpulomo taunna.
9Nalamunni tau lan lili’na padang mana’na dio Timnat-Heres, dao buntunna Efraim, daanna lu buntu Gaas.
10Iatonna tama nasangmo batu dilobang sola nene’ to dolona tu to sangosso’ iato, ombo’mi tu to sangosso’ senga’, tu tang untandai PUANG sia tang untandai penggauran, tu mangka Napogauran to Israel.
11Napogau’mi to Israel tu apa kadake dio pentiroNa PUANG sia umpengkaolaimo mintu’ Baal.
12Naboko’imo tu PUANG, Kapenombanna nene’ to dolona, tu ussolanni tassu’ lan mai tondok Mesir anna mengkaola lako kapenomban senga’, ba’tu pira-pirai tu kapenombanna tu mintu’ bangsa tiku lao, sia tukku umpenombai sia umpa’di’i penaanNa PUANG.
13Iake naboko’imi tu PUANG sia umpengkaolaimo Baal sola mintu’ Astoret,
14attu iato ma’lulu-lulumi tu kasengkeanNa PUANG lako to Israel: Nasorongi tama limanna pangrampa tu tau iato mai tu umpangrampai, sia Nasorong tama kuasanna ualinna tiku lao, naurunganni tang naattamo mangea lako ualinna.
15Umba-umba nanii tu tau iato male parari, inde dukato tu limanNa PUANG unneai naposanggangi, susitu mangka Napokadanni PUANG Napalaoi sumpa, naurunganni kapussakan tongan tu tau iato.
16Anna pake’de’i PUANG tu ba’tu pira-pira to parengnge’ tu ullendokan tau iato mai dio mai limanna to mangrampa.
17Apa tae’ duka naperangii tu to parengnge’na, sangadinna maleora umpengkaolai kapenomban senga’, sia tukku umpenombai, susito ma’gau’ sala. Madomi’ bang tu tau iato sepang dio mai lalanna tu napolalan nene’ to dolona tu umperangii pepasanNa PUANG. Tae’ nasipatu tu lalan penggauranna.
18Iake Napake’deranoi PUANG misa’ to parengnge’, Narondong PUANG tu to parengnge’ iato, anNa lendokanni tu tau iato dio mai kuasanna ualinna, tempon tuona tu to parengnge’, belanna maturu-turu tu PUANG umperangii sarrona tau iato mai tu diona to umpakario-rioi sia umpapussakki.
19Iake matemi tu to parengnge’, naparandukomi umpakadakei tu gau’na losong na iatu nene’ to dolona, belanna unturu’mo kapenomban senga’ sia napengkaolaimo sia tukkumo umpenombai; moi misa’ tae’ naboko’i tu mintu’ penggauran sia kedo makarra’na.
20Iake ma’lulu-lulumi tu kasengkeanNa PUANG lako to Israel, ma’kadaomi, Nakua: Belanna nalendai te bangsa iate tu basse Kualluran nene’ to dolona sia tae’ naperangii tu kadangKu,
21iamoto tae’mo Kula unnula’i dio mai tingayona moi misa’ dukai tu mintu’ bangsa, tu napatorropa Yosua, tonna matemo.
22La Kupolalan tu bangsa iato untobai tu to Israel, ba’tu la napalan penaai tu lalanNa PUANG anna turu’i, susitu nene’ to dolona, ba’tu tae’i.
23Belanna inang Napatorromo PUANG tu bangsa iato, sia tae’ Natarru’ unnula’i, sia tae’ Nasorongi tama limanna Yosua.