Dual PanelTo Benyamin didakaran lalan anna tontong tu bati’na
1Dio Mizpa umpalaomi sumpa tu to Israel nakua: Moi misa’ tau te kita mintu’ tae’ tu la umben to Benyamin anakna baine napobaine.
2Saemi tu bangsa iato lako Betel, anna torro dio oloNa Puang Matua sae lako makaroenna, anna tumangi’ umpekapuai gamaranna, nakua:
3O PUANG, Kapenombanna to Israel, umba nakua dadi dio lu to Israel kumua allo iate la pa’de misa’ suku dio mai to Israel?
4Iatonna masiangmo melambi’ bangsiapa napabendanmi bangsa iato tu misa’ inan pemalaran inde to dio, anna pennoloanni tu pemala’ ditunu pu’pu’ sia pemala’ kasalamaran.
5Ma’kadami tu to Israel nakua: Mindara dio mai mintu’ suku to Israel tu tae’ nasae lako kombongan, la umpennoloi PUANG? Belanna umpalaomo sumpa kapua tu tau iato mai untampakki ropu minda-minda tu tang sae lako PUANG dio Mizpa, kumua: Manassa la dipatei.
6Massemi penaanna tu to Israel lako Benyamin, siulu’na, anna ma’kada nakua: Allo iate ratomo misa’ suku dio mai to Israel;
7umbara la takua umpadenanni baine tu tau iato mai tu torronapa, belanna mangkamoki’ umpalao sumpa ussa’bu’ sanganNa PUANG, kumua tae’ misa’ tu anakta baine la taben tau iato mai napobaine?
8Iamoto nama’kada tu tau iato mai nakua: Denraka misa’ dio mai mintu’ suku to Israel tu tae’ nasae mennolo lako PUANG dio Mizpa? Payanmi kumua dio mai Yabesh, lili’na Gilead, moi misa’ tau tae’ sae lako to’ tenda, lako tu kombongan.
9Belanna iatonna dibilangmo tu bangsa iato, manassami kumua moi misa’ tu to Yabesh lan lili’na Gilead tae’ bang sae.
10Nasuami kasirampunan tu to barani sangpulo dua sa’bu male lako, nakua: Malekomi ammi patei pa’dang tu to Yabesh lan lili’na Gilead, ia duka tu mintu’ baine sia pia.
11Apa susite tu la mipogau’: Ia manna tu mintu’ muane sia mintu’ baine, tu lakonamo muane, la misabu’i.
12Naapparammi dio lu to Yabesh lan lili’na Gilead tu a’pa’ratu’ pia baine, anak dara, tu tae’pa nasangampa’ muane, anna solanni te pia baine iate lako to’ tenda dio Silo lan padang Kanaan.
13Mangkato nasuami mintu’ kasirampunan tu ba’tu pira-pira pesua lako to Benyamin, tu dao buntu batu Rimon, anna pokadanni kasitaman tu tau iato mai.
14Attu iato sulemi tu to Benyamin, anna diben tau iato tu mintu’ baine dipatuo dio mai Yabesh, lan lili’na Gilead. Apa tae’ dukapa naganna’ baine tu tau iato.
15Massemi penaanna tu bangsa iato lako to Benyamin, belanna Napoka sia Nasanggang PUANG tu mintu’ suku to Israel.
16Ma’kadami tu mintu’ pekaamberanna kasirampunan iato, nakua: Umbara la takua umpadenanni baine tu tau iato mai, tu torronapa? Belanna mintu’ baine dio lu to Benyamin puramo disabu’i.
17Sia nakuapa tu tau iato mai: Iatu mana’na to tilendok la torro napomana’ to Benyamin, kumua da naden misa’ tu suku to Israel diputtai.
18Apa tae’ tama’din la umbenni anakta baine tu tau iato la napobaine. Belanna umpalaomo sumpa tu mintu’ to Israel nakua: Tampakan ropu lako minda-minda tu umben to Benyamin misa’ baine la napobaine.
19Ma’kadami tu tau iato mai nakua: Manassa iake taunoi den misa’ pa’gauran umpakaraya PUANG dio Silo, tu rampe rekkena Betel, sia rampe matallona batatta lompo, tu ma’palu dio mai Betel lako Sikhem, sia rampe sau’na Lebona.
20Naada’imi tau iato mai tu to Benyamin nakua: Malekomi mangodo’ tama pa’lak anggoro’.
21Tiro meloi, ianna tassu’ tu pia baine dio mai Silo la ma’gellu’, tassu’mokomi lan mai to’ pa’lak anggoro’, ammi pada unnalai simisa’ tu pia baine Silo la mipobaine, mimane sule lako tondok Benyamin.
22Iake saei tu mai ambe’na sia siulu’na la ussite’gerangkanni, la kikua lako, kumua: Pamasorokki tu penaammi umbenkanni, belanna lan kasirarian iato tae’mo tu baine la dipapantananni tu tau iato mai. Tonganna, tae’ nakamu umbenni; iamoto tae’ nakamu sala.
23Napogau’mi to Benyamin susito, pantan nabaami tau iato mai simisa’ tu pia baine ma’gellu’, tu narampa, anna sule lako taa mana’na, anna bangunni sule tu mintu’ kota, anna torro dio.
24Attu iato ke’de’mi tu to Israel inde to dio mai, anna pantan sule lako sukunna sia pa’rapuanna; ke’de’mi tu tau iato mai inde to dio mai, napantan sule lako taa mana’na.
25Attu iato tae’ datu dio lu Israel; pantan napogau’ bangmi tau tu nasanganna melo.